រាជធានីភ្នំពេញ ៖ បច្ចុប្បន្នការសាងសង់អគារតូចនិងធំនៅក្រុងភ្នំពេញនិងខេត្តព្រះសីហនុនាំមុខគេនៅទូទាំងប្រទេស ដែលនាំឲ្យតម្លៃដីធ្លីកន្លែងខ្លះមានតម្លៃជិតម៉ឺនដុល្លារអាមេរិកក្នុងមួយម៉ែត្រការ៉េ ។ ទន្ទឹមនឹងសំណង់រីកស្គុះស្គាយនៅរាជធានីភ្នំពេញ និងខេត្តព្រះសីហនុកំពុងទទួលបានការអភិវឌ្ឍ អ្នកជំនាញក៏សង្កេតឃើញថាមានខេត្តពីរផ្សេងទៀតដែលការសាងសង់កំពុងមានស្ទុះកើនឡើង ដោយសារទីតាំងភូមិសាស្ត្រនៃខេត្តទាំងពីរវាច្រកសេដ្ឋកិច្ចក្នុងការធ្វើពាណិជ្ជកម្មក្នុងតំបន់។
លោក វ៉ា វីរៈ នាយកក្រុមហ៊ុន Century 21 Fortuna Investment មានប្រសាសសន៍ថា ក្រៅពីភ្នំពេញ និងក្រុងព្រះសីហនុ ឃើញនៅក្រុងសៀមរាបមានអគារខ្ពស់ តែមិនទាន់មានច្រើនទេ តែចាប់ផ្តើមមានការកើនឡើង។ ប៉ុន្តែការសាងសង់អគារនិង អគារខ្ពស់ឃើញនៅមានច្រើនខាងនៅប៉ោយប៉ែត ខេត្តបន្ទាយមានជ័យ និងក្រុងបាវិត នៃខេត្តស្វាយរៀងទៅវិញ ។ ការសាងសង់នៅខេត្តទាំងពីរនេះមានច្រើន បើតាមលោក វ៉ា វីរៈបញ្ជាក់ថា « ទី១-ក្រុងទាំងពីរខាងលើ គឺមានទីតាំងភូមិសាស្ត្រនៅជាប់ព្រំដែន ហើយជាធម្មតារវាងប្រទេស និងប្រទេសតែងតែមានការធ្វើពាណិជ្ជកម្មច្រើន ។ ទី២- ក្រុងទាំងពីរនៅមានផ្ទៃដីតូច អីចឹងធ្វើឱ្យតម្លៃដីធ្លីនៅក្នុងក្រុងទាំងពីរហាក់ដូចជាថ្លៃ ។ ទី៣- ទីក្រុងទាំងពីរ ជាមាត់ច្រករបស់ប្រទេស ហើយក៏ជាមាត់ច្រកនៃសេដ្ឋកិច្ច ។ លើសពីនេះក្រុងទាំងពីរ វាស្ថិតនៅចំខ្សែក្រវ៉ាត់សូត្រដែលផ្តួចផ្តើមដោយប្រទេសចិនដែលអាចឆ្លងកាត់តំបន់ទាំងនេះបាន»។
លោកបានសង្កត់ធ្ងន់ថា «កត្តាខាងលើទាំងនេះជំរុញឱ្យតម្លៃដីធ្លី នៅតំបន់ទាំងនោះមានការកើនឡើង។ នៅថ្ងៃខាងមុខខេត្តទាំងពីរ អាចនឹងនៅតែរក្សាបានសក្តានុពល បន្ទាប់ពីខេត្តព្រះសីហនុ ព្រោះការធ្វើពាណិជ្ជកម្មចៀសមិនផុតពីការឆ្លងកាត់ព្រំដែនឡើយ»។
លោក សន សៀប នាយកក្រុមហ៊ុន Key Real Estate មានប្រសាសន៍ថាបើមើលតាមភាពជាក់ស្តែងនៅភ្នំពេញការសាងសង់នៅតែមានចំនួនច្រើនជាងគេ តែនៅក្រៅភ្នំពេញខ្ញុំសង្កេតឃើញនៅក្រុងបាវិត និងប៉ោយប៉ែត គឺមានការសម្រុកសាងសង់ច្រើន។លោកបានបន្តថា «ខ្ញុំគិតថាដោយសារទិសដៅនៃការអភិវឌ្ឍសេដ្ឋកិច្ចនៅក្នុងតំបន់អាស៊ានយើងនេះ ក៏ដូចជាប្រទេសយើងស្ថិតនៅចំកណ្តាលនៃប្រទេសមានសេដ្ឋកិច្ចធំពីរ ថៃនិងវៀតណាម ។ អីចឹងនៅតាមព្រំដែនថៃនិងវៀតណាមជាកន្លែងដឹក និងផ្ទេរទំនិញចុះឡើងដែលធ្វើឱ្យតំបន់ទាំងពីរនេះមានសក្តានុពល និងកំពុងមានការអភិវឌ្ឍច្រើន»។
បើតាមអ្នកជំនាញរូបនេះ ក្រៅពីច្រកសេដ្ឋកិច្ច ខេត្តទាំងពីរនេះស្ថិតនៅលើផ្លូវដែលផ្តួចផ្តើមដោយប្រទេសចិននោះគឺ ផ្លូវមួយខ្សែក្រវ៉ាត់មួយផងដែរ។លោកសន សៀប បានបន្ថែមថា «ម្យ៉ាងវិញទៀតយើងឃើញថាផ្លូវនៃខេត្តទាំងពីរវាចូលនៅក្នុងផ្លូវមួយខ្សែក្រវ៉ាត់មួយរបស់ប្រទេសចិន ដែលកំពុងអភិវឌ្ឍទំនិញចេញចូលនៅក្នុងតំបន់អាស៊ាន ហើយបើយើងមើលជាក់ស្តែងគម្រោងសាងសង់ឬវិនិយោគភាគច្រើនជាគម្រោងរបស់ចិនដែលបានធ្វើការសាងសង់នៅក្រុងប៉ោយប៉ែត និងក្រុងបាវិតនេះ»៕ កែសម្រួលដោយ ៖ សុឃាក់
ចែករំលែកព័តមាននេះ