របប​អាហារ​មួយចំនួនដែល​អ្នក​មាន​បញ្ហា​ខ្លាញ់​រុំ​ថ្លើមគួរ​តែ​ទទួលទាន


បញ្ហា​ខ្លាញ់​រុំ​ថ្លើម គឺជា​មូលហេតុ​ចម្បង​បំផុត​មួយ​នៃ​ជំងឺ​ខ្សោយ​ថ្លើម ហើយ​អាច​វិវត្តន៍​ទៅ​ជា​ជំងឺ​ក្រិន​ថ្លើម ឬ​ជំងឺ​​រលាក​ថ្លើម​។ ប៉ុន្តែ​មិន​ថា​អ្នក​កំពុង​ជួប​ប្រទះ​បញ្ហា​ខ្លាញ់​រុំ​ថ្លើម​ប្រភេទ​ណា​នោះ​ទេ​អ្នក​អាច​ទប់ស្កាត់​ស្ថានភាព​មុន​នឹង​ឈាន​ដល់​ដំណាក់កាល​ធ្ងន់ធ្ងរ​បាន ដោយ​គ្រាន់តែ​ជ្រើសរើស ​និង​រក្សា​អោយ​បាន​នូវ​របប​អាហារ​មួយ​ដែល​ត្រឹមត្រូវ​។ ថា​ តើ​អាហារ​ដែល​អ្នកជំងឺ​ខ្លាញ់​រុំ​ថ្លើម​គួរ​ទទួលទាន​ឲ្យ​បាន​ច្រើន​មាន​អ្វី​ខ្លះទៅ? ខាងក្រោម​វេ​ប​សាយ​សុខភាព Health.com.kh នឹង​បង្ហាញ​អោយ​ដឹង​ពី​អាហារ​ទាំងនោះ ៖

១. ទឹកខ្មេះ​ផ្លែ​ប៉ោម ៖ មាន​ប្រសិទ្ធិ​ភាព​រំលាយ​ខ្លាញ់​ដែល​ប្រមូលផ្ដុំ​ក្នុង​ថ្លើម​។ អ្វី​ដែល​អ្នក​ត្រូវធ្វើ គឺ​គ្រាន់តែ​លាយ​ទឹកខ្មេះ​ផ្លែ​ប៉ោម ១ ស្លាបព្រា​បាយ​ជាមួយ​ទឹក​ក្ដៅ​ឧណ្ហ​ៗ ១ កែវ​។ កូរ​អោយ​សព្វ សឹម​ទទួលទាន ២ ដង​មុន​ពេល​អាហារ​។

២. រមៀត ៖ ជា​ប្រភព​ដ៏​ប្រសើរ​នៃ​សារធាតុ​ប្រឆាំង​អុកស៊ីតកម្ម​ច្រើន​ប្រភេទ​ដែល​អាច​ទប់ស្កាត់​បញ្ហា​ខ្លាញ់​រុំ​ថ្លើម​។ ការ​ទទួលទាន​អាហារ​លាយ​ជាមួយ​រមៀត​ក៏​ជួយ​បង្កើន​សុខភាព​ប្រព័ន្ធ​រំលាយ​អាហារ​ផង​ដែរ​។ អ្វី​ដែល​អ្នក​ត្រូវធ្វើ គឺ​លាយ​ម្ស៉ៅ​រមៀត​ធម្មជាតិ ១/៤ ស្លាបព្រា​កាហ្វេ​ក្នុង​ទឹកដោះគោ​ក្ដៅ​ឧណ្ហ​ៗ ឬ​ទឹក​ដាំ​ពុះ​។​កូរ​អោយ​សព្វ សឹម​ទទួលទាន​។

៣. តែ​បៃតង ៖ តែ​បៃតង​ជា​ប្រភព​ដ៏​ល្អ​បំផុត​នៃ​សារធាតុ catechins ដែល​ចាំបាច់​សម្រាប់​រក្សា​សុខភាព​ថ្លើម​ទប់ស្កាត់​បញ្ហា​។ ដូច្នេះ​ការ​ទទួលទាន​តែ​បៃតង​ពី ៣ ទៅ ៤ ពែង​ក្នុង​មួយ​ថ្ងៃ​អាច​ជួយ​ព្យាបាល​បញ្ហា​ខ្លាញ់​រុំ​ថ្លើម​បាន​។

៤. បន្លែ​ផ្លែ​ឈើ ៖ ក្រៅពី​មាន​ផ្ទុក​សម្បូរ​ទៅ​ដោយ​សារធាតុចិញ្ចឹម វីតាមីន និង​ជាតិ​រ៉ែ​សំខាន់​ៗ​ហើយ​នោះ​បន្លែ​ផ្លែ​ឈើ​ក៏​ជា​ប្រភព​ដ៏​ប្រសើរ​នៃ​សារធាតុ​ប្រឆាំង​អុកស៊ីតកម្ម​ដែល​ជួយ​ជម្រុញ​ពង្រឹង​ប្រព័ន្ធ​ភាពស៊ាំ​នៃ​រាង​កាយ​ប្រយុទ្ធ​ប្រឆាំង​នឹង​មេរោគ​បាក់តេរី​ដែល​បង្ក​ឱ្យ​ថ្លើម​ទទួល​រង​ការ​រលាក​។ បន្លែ​បៃតង​និង​ផ្លែ​ឈើ​មិន​ត្រឹមតែ​ប្រសើរ​ជួយ​ដោះស្រាយ​បញ្ហា​ខ្លាញ់​រុំ​ថ្លើម​ប៉ុណ្ណោះ​ទេ ប៉ុន្តែ​ល្អ​សម្រាប់​សុខភាព​រាង​កាយ​ទាំងមូល​តែ​ម្ដង​។ ដូច្នេះ​ចូរ​ព្យាយាម​ទទួលទាន​បន្លែ​ផ្លែ​ឈើ​ឱ្យ​បាន​ច្រើន​។

៥. សាច់​គ្មាន​ខ្លាញ់ ៖ ប្រភេទ​នៃ​អាហារ​ដទៃ​ទៀត​ដែល​អ្នកជំងឺ​ខ្លាញ់​រុំ​ថ្លើម​គួរ​ដាក់​បញ្ចូល​ក្នុង​របប​អាហារ​ប្រចាំ​ថ្ងៃ គឺ​ប្រូតេអុីន​។ ហើយ​សាច់​ជា​ប្រភព​ដ៏​ប្រសើរ​នៃ​ប្រូតេអ៊ីន ប៉ុន្តែ​ទោះជា​យ៉ាងណា​ប្រសិនបើ​អ្នក​កំពុង​​ជួប​ប្រទះ​បញ្ហា​ខ្លាញ់​រុំ​ថ្លើម ចូរ​ជៀសវាង​ការ​ទទួលទាន​សាច់​ខ្លាញ់​និង​ស្បែក​។ ដើម្បី​ទទួលទាន​ជាតិ​ប្រូតេអ៊ីន​គ្រប់គ្រាន់ ការ​ជ្រើសរើស​ទទួលទាន​សាច់​គ្មាន​ខ្លាញ់ គឺ​ប្រសើរ​បំផុត​សម្រាប់​អ្នកជំងឺ​ខ្លាញ់​ក្នុង​ថ្លើម។

៦. ក្រូចឆ្មារ ៖ ការ​ទទួលទាន​ក្រូច​ឆា្ម​រ ឬ​ទឹកក្រូច​ឆ្មារ គឺជា​គន្លឹះ​ដ៏​ងាយ ប៉ុន្តែ​មាន​ប្រសិទ្ធភាព​ខ្ពស់​បំផុត​មួយ​ជួយ​ទប់ស្កាត់​ហានិភ័យ​នៃ​បញ្ហា​ខ្លាញ់​រុំ​ថ្លើម​។ នោះ​ក៏​ព្រោះតែ​ផ្លែ​ឈើ​នេះ​មាន​ផ្ទុក​សម្បូរ​ទៅ​ដោយ​វីតាមីន C ជម្រុញ​ការ​ផលិត glutathione របស់​ថ្លើម​ដើម្បី​សម្រួល​ដល់​ដំណើរការ​មុខងារ​កាន់តែ​ល្អ​ប្រសើរ​។ ដូច្នេះ​ចូរ​ព្យាយាម​ទទួលទាន​ទឹកក្រូច​ឆ្មារ​អោយ​បាន​ពី ២ ទៅ ៣ ដង​ក្នុង​មួយ​ថ្ងៃ​។

៧. ផ្លែ​បឺ​រ ៖ ជា​ប្រភព​ដ៏​ប្រសើរ​នៃ​សារធាតុ glutathione រួម​ទាំង​សារធាតុ​ប្រឆាំង​បាក់តេរី និង​អុកស៊ីតកម្ម​ដែល ជួយ​សម្អាត​ថ្លើម ក៏​ដូច​ជា​កម្ចាត់​ជាតិ​ខ្លាញ់​មិនល្អ​។ ផ្លែ​បឺ​រ​ក៏​ជួយ​ថ្លើម​ក្នុង​ដំណើរការ​បន្សាប​ជាតិពុល ឬ​បញ្ចេញ​ជាតិពុល ក៏​ដូច​ជា​សារធាតុ​គីមី​គ្រោះថ្នាក់​ចេញពី​រាង​កាយ​តាម​រយៈ​ទឹកនោម​និង​លាមក​ផង​ដែរ​។ ដូច្នេះ​ដើម្បី​ជា​ការ​ប្រសើរ ចូរ​ព្យាយាម​ទទួលទាន​ផ្លែ​ឈើ​នេះ​ជា​ប្រចាំ​។

៨. ប៉េងប៉ោះ ៖ មាន​ផ្ទុក​សារធាតុ glutathione ដែល​ជួយ​សម្អាត​ថ្លើម​។ លើស​ពី​នេះ​ទៅ​ទៀត ប៉េង​ប៉ោះ​ក៏​ជា​ប្រភព​ដ៏​ប្រសើរ​នៃ​សារធាតុ lycopene ដែល​ជួយ​ទប់ស្កាត់​ជំងឺ​ផ្សេង​ៗ រួម​ទាំង​ជំងឺ​ខ្លាញ់​រុំ​ថ្លើម មហារីក​ថ្លើម មហារីក​ស្បែក មហារីក​សុដន់ និង​មហារីក​សួត​ផង​ដែរ (​ប្រភព​ពី​៖ Health.com.kh)៕ (​កែសម្រួល​ដោយ ៖ បុប្ផា​)

Facebook Google Twitter Email

សុខភាព

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ