រាជធានីភ្នំពេញ៖អ្នកនាងលី ម៉ារីណា នៅឃើញមុខនៅក្នុងពិភពសិល្បៈ មិនបោះបង់ដូចតារាមួយចំនួនទេ ដោយនាងបានបង្ហាញស្នាដៃសម្តែងភាពយន្តតាមបណ្តាស្ថានីយទូរទស្សន៍ជាបន្តបន្ទាប់ ។ ម៉ារីណា នៅតែពេញចិត្តអាជីពសិល្បៈគ្រាន់តែមិនសកម្មដូចកាលពីនៅភ័យក្មេងប៉ុណ្ណោះ ។
លី ម៉ារីណា បានសម្រេចចិត្តវិលត្រឡប់ពីអាមេរិកមករស់នៅមាតុភូមិកម្ពុជាវិញ ហើយស្វាមីរបស់នាងក៏សម្របសម្រួលតាមចិត្តភរិយា។ រស់នៅលើទឹកដីកំណើតអ្នកនាងម៉ារីណា តែងតែបង្ហាញមុខក្នុងកម្មវិធី ផ្សេងៗក្នុងសង្គមសិល្បៈ ។ ខណៈដឹងថានាងមកនៅស្រុកខ្មែរវិញ ផលិតករជាច្រើនបានទាក់ទងឲ្យចូលរួមសម្តែង ។ ជាក់ស្តែងបច្ចុប្បន្ននេះទស្សនិកជនឃើញនាងសម្តែងរឿងភាគមួយចំនួន ដូចជារឿង«ពស់កេងកង» រឿង«រាជនីភូមិគ្រឹះ»ជាដើម ។
លី ម៉ារីណា កាលពីពេល ថ្មីៗកន្លងមកនិយាយថា«ដ្បិតតែនាងខ្ញុំប្រកាសសម្តែង តែនាងខ្ញុំទទួលថតតិចតួចប៉ុណ្ណោះ អាចនិយាយថា១ឆ្នាំទទួលថតមួយរឿង ឬពីររឿងគឺគ្រប់គ្រាន់ យោងលើវ័យ កាលពេលវេលា ។ ជាការណ៍ពិតនាងខ្ញុំគិតថាផ្អាកសម្តែងដែរ តែមកពីចិត្តមិនដាច់ ក្រោយពេលរកបានមុខរបរផ្ទាល់មកចេះតែមមាញឹក ។
អុីចឹងហើយនាងខ្ញុំមិនអាចទទួលថតឲ្យបានពេញទំហឹងដូចកាលនៅពីក្មេងឡើយទុកការងារឲ្យ ប្អូនៗរលកក្រោយគេទទួលវិញម្តង ។ វិស័យសិល្បៈនាងខ្ញុំនៅតែពេញចិត្តព្រោះនាងខ្ញុំបានមកដល់ពេលនេះក៏ព្រោះសិល្បៈទើបចោលមិនបាន»។
លី ម៉ារីណា បានរៀបការកាលពីថ្ងៃទី២៧ ខែឧសភា ឆ្នាំ២០១៣ ហើយពេលនេះមានកូនប្រុសម្នាក់ឈ្មោះសាត ថៃសាន់ អាយុជាង៤ឆ្នាំ ។ នាង និងប្តី មានគម្រោងយកកូនថែមមួយទៀតក្នុងពេល ឆាប់ៗខាងមុខនេះ ប៉ុន្តែនាងថា ដោយសារជាប់ថតកុនរឿង«ទារុណកម្មស្នេហ៍» ហើយនាង និងប្តីរស់នៅឆ្ងាយពីគ្នាពេក ហេតុនេះហើយការយកកូនដោយអន្ទះសាពេក គឺមិនអាចទៅរួចឡើយ ៕ (កែសម្រួលដោយ៖ បុប្ផា)
ចែករំលែកព័តមាននេះ