ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា ឃាត់ខ្លួនជនសង្ស័យម្នាក់លួចគាស់ផ្ទះយកទ្រព្យសម្បត្តិដែលគិតជាលុយ២០ម៉ឺនដុល្លារ និងលុយបាត៥០ម៉ឺនបាត ត្រូវសាច់ញាតិប្រមាណ៤០នាក់តវ៉ាសុំដោះលេង និងរកយុត្តិធម៌ កាលពីថ្ងៃទី១២ ខែកក្កដានេះ នៅមុខសាលាដំបូងខេត្តបន្ទាយមានជ័យ…
ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា ឃាត់ខ្លួនជនសង្ស័យម្នាក់លួចគាស់ផ្ទះយកទ្រព្យសម្បត្តិដែលគិតជាលុយ២០ម៉ឺនដុល្លារ និងលុយបាត៥០ម៉ឺនបាត ត្រូវសាច់ញាតិប្រមាណ៤០នាក់តវ៉ាសុំដោះលេង និងរកយុត្តិធម៌ កាលពីថ្ងៃទី១២ ខែកក្កដានេះ នៅមុខសាលាដំបូងខេត្តបន្ទាយមានជ័យ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យបានប្រាប់ថា ជនសង្ស័យដែលត្រូវបានឃាត់ខ្លួនតាមដីកាមានឈ្មោះ តែម វាសនា ហៅទិត អាយុ២៦ឆ្នាំ រស់នៅភូមិថ្មីឃុំរលួសស្រុកស្វាយចេក ។ លោកបានបញ្ជាក់ថា ក្រោយទទួលដីកាបញ្ជាអោយចូលខ្លួនរបស់សាលាដំបូងខេត្តបន្ទាយមានជ័យហើយ កម្លាំងកងរាជអាវុធហត្ថខេត្តបន្ទាយមានជ័យបានសហការជាមួយកម្លាំងសមត្ថកិច្ចថៃបានឃាត់ខ្លួនជនសង្ស័យឈ្មោះ តែម វាសនា ហៅទិត កាលពីថ្ងៃទី០៨ ខែកក្កដានេះ នៅទីក្រុងបាងកក ប្រទេសថៃ ហើយត្រូវបានចាប់បញ្ជូនមកទីបញ្ជាការកងរាជអាវុធហត្ថខេត្តបន្ទាយមានជ័យ ។
លោកវរសេនីយ៍ឯក ម៉ែន ភិរម្យ បានបញ្ជាក់ថា ជនសង្ស័យដែលត្រូវបានចោទប្រកាន់លួចគាស់ផ្ទះយកទូដែកមានទ្រព្យសម្បត្តិមានគ្រឿងអលង្ការ គិតជាទឹកប្រាក់ប្រមាណ២០ម៉ឺនដុល្លារ និងលុយបាត៥០ម៉ឺនបាត ដែលធ្វើសកម្មភាព កាលពីថ្ងៃទី០៦ ខែមេសា ឆ្នាំ២០១៩ នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ។ ហើយត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់ ។
គួរបញ្ជាក់ថា ក្រោយពេលដែលកម្លាំងកងរាជអាវុធហត្ថខេត្តបញ្ជូនទៅសាលាដំបូងខេត្តបន្ទាយមានជ័យត្រូវបានប្រជាពលរដ្ឋប្រមាណ៤០នាក់ ដែលជាសាច់ញាតិបាននាំគ្នាធ្វើការតវ៉ា នៅថ្ងៃទី១២ ខែកក្កដានេះ នៅមុខសាសាដំបូងខេត្តបន្ទាយមានជ័យ ដោយសុំអោយមន្ត្រីសាលាដំបូងខេត្តបន្ទាយមានជ័យជួយរកយុត្តិធម៌ និងសុំដោះលេងយុវជនឈ្មោះ តែម វាសនា អោយមានសេរីភាពវិញ ។
តំណាងប្រជាពលរដ្ឋបានបញ្ជាក់ថា មូលហេតុដែលពួកគាត់នាំគ្នាមកតវ៉ានៅមុខសាលាដំបូងខេត្តបន្ទាយមានជ័យនេះ គឺសុំអោយជួយរកយុត្តិធម៌ និងដោះលេងយុវជនឈ្មោះ តែម វាសនា ដោយពួកគាត់ធានាមុខច្បាប់ថា យុវជននេះជាមនុស្សល្អ ហើយមិនពាក់ព័ន្ធករណីលួចគាស់ផ្ទះយកទ្រព្យសម្បត្តិឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ