ខេត្តសៀមរាប ៖ បដិមាធំមួយ ដែលលម្អដោយសំពត់រំយោលទម្លាក់មកខាងមុខ មានប្រវែងបណ្តោយ១១៤សង្ទីម៉ែត្រ ទំហំស្មា៥៤សង្ទីម៉ែត្រ និងចង្កេះទំហំ៤៤សង្ទីម៉ែត្រ ត្រូវបានប្រទះឃើញនៅជ្រុងឦសាននៃកសិន្ធុប្រាសាទព្រះគោ នាព្រឹកថ្ងៃទី៨ កក្កដា ។ ព្រឹត្តិការណ៍ប្រទះឃើញបដិមានេះ ស្ថិតក្នុងស្ថានភាពចៃដន្យដោយប្រជាជនដែលរស់នៅភូមិឪឡោក ឃុំបាគង ស្រុកប្រាសាទបាគង ប្រទះឃើញពេលជីកយកដីទៅចាក់បំពេញកន្លែងទឹកដក់ក្រោយផ្ទះ ។
លោក ថៃ មិច ដែលជាប្រជាពលរដ្ឋ រស់នៅភូមិឪឡោក ឃុំបាគង ស្រុកប្រាសាទបាគង ខេត្តសៀមរាប ជាអ្នកប្រទះឃើញ បដិមា បានឱ្យដឹងថា កន្លងមកលោកតែងជីកយកដី នៅកន្លែងនេះបន្តិច កន្លែងនោះបន្តិចក្នុងកសិន្ធុក្បែរប្រាសាទព្រះគោដើម្បីចាក់បំពេញកន្លែងទឹកដក់ក្រោយផ្ទះរបស់គាត់ ។
លោក មិច បន្តថា ដំបូងឡើយមិននឹកស្មានថាជាបដិមានោះទេ តែមើលតាមសណ្ឋានថ្ម លោកមានការសង្ស័យ រួចក៏បានកាយដីបន្ត ទើបដឹងថាជាបដិមា ដែលកប់ក្នុងដីហើយបញ្ឈប់សកម្មភាព និងបានរាយការណ៍ទៅនគរបាលបេតិកភណ្ឌដើម្បីមានវិធានការយកទៅរក្សាទុកនៅកន្លែងមានសុវត្ថិភាព ។
លោកអនុសេនីយិ៍ទោ អួន យ៉ង់ នគរបាលបេតិកភណ្ឌប្រចាំឧទ្យានរលួសបានឱ្យដឹងថា ក្រោយពីទទួលបានដំណឹងភ្លាម លោកបានស្នើសុំឱ្យផ្អាកសកម្មភាព រង់ចាំលោកចុះមកពិនិត្យដល់ទីតាំងផ្ទាល់ និងរាយ ការណ៍ដល់អាជ្ញាធរពាក់ព័ន្ធ ។
អនុសេនីយិ៍ទោរូបនេះបានបញ្ជាក់ថា កន្លងមកមានប្រជាជនបានជួបប្រទះនូវបដិមាផ្សេងៗដូចករណីនេះជាច្រើនដងមកហើយ និងបានរាយការណ៍ដល់សមត្ថកិច្ចជាប្រចាំ ដែលនេះជាសកម្មភាពដ៏គំរូគួរយក តម្រាប់តាម។ លោកបានអំពាវនាវដល់ប្រជាជនក៏ដូចជាសាធារណជនទាំងអស់ដែលបានប្រទះឃើញនូវបដិមា សំណល់បុរាណវត្ថុនៅកន្លែងណាក៏ដោយ សូមប្រគល់ឬរាយការណ៍ដល់អាជ្ញាធរកុំបីខាន ។
លោក ឈូក សុម៉ាឡា បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរា បានលើកឡើងថា ជាបឋមទាក់ទងនឹងភិនភាគបដិមានេះ ភ្លាមៗមិនអាចសន្និដ្ឋានបាននៅឡើយថាជាទ្វារបាល ឬព្រះវិស្ណុ ឬអ្វីផ្សេងនោះទេ ដោយហេតុនៃការបាត់បង់ផ្នែកសំខាន់ៗនៃតួខ្លួនច្រើន ។
ជាកិច្ចការបន្តដើម្បីអភិរក្សបដិមានេះ លោក សុម៉ាឡា ក៏បានឱ្យដឹងថា ក្រុមការងារ នឹងគូររូប ថតរូប វាស់វែង ចងក្រងឯកសារ បន្ទាប់មកយកទៅរក្សាទុកនៅរោងជាង ដើម្បីឱ្យអ្នកជំនាញផ្នែកជួសជុលថ្មសម្អាត និងតភ្ជាប់នូវបំណែកបដិមានេះឡើងវិញមុននឹងតាំងបង្ហាញជាសាធារណៈ ។
សូមបញ្ជាក់ថា បដិមាដែលរកឃើញនេះមិនពេញលក្ខណៈ ពេញលេញជាតួខ្លួននោះទេ ព្រោះព្រះកេស
ព្រះហស្ថទាំងសងខាង និងព្រះបាទទាំងពីរត្រឹមជង្គង់ត្រូវបានបាត់បង់ និងត្រូវបានប្រគល់ជូនអាជ្ញាធរជាតិអប្សរាយកទៅរក្សាទុកនៅសារមន្ទីរព្រះនរោត្តម សីហនុ-អង្គរដោយមានការចូលរួម ពីតំណាងនគរបាលការពារបេតិកភណ្ឌ នគរបាលប៉ុស្តិ៍រដ្ឋបាលស្រុកប្រាសាទបាគង មន្ទីរវប្បធម៌និងវិចិត្រសិល្បៈនៃខេត្ត សៀមរាប ៕
ចែករំលែកព័តមាននេះ