ខេត្តបាត់ដំបង ៖ សមត្ថកិច្ចបានចុះដកហូតម៉ូតូគ្រប់ម៉ាកចំនួន១៤គ្រឿងពីទីតាំងទទួលទិញនិងទទូលបញ្ចាំដែលគ្មានច្បាប់អនុញាតដែលសម្ងំលាក់ខ្លួននៅក្នុងផ្ទះសំណាក់មួយកន្លែង កាលពីវេលាម៉ោង៩ព្រឹក ថ្ងៃទី០៤ កក្កដានេះ នៅចំណុចភូមិដូង ឃុំបឹងរាំង ស្រុកកំរៀង ហើយថែមទាំងបានឃាត់ខ្លួនអ្នកទទូលខុសត្រូវកិច្ចការនេះម្នាក់ផងដែរ ។
យោងតាមសេចក្ដីរាយការណ៍បានឲ្យដឹងថា ទីតាំងទទួលទិញ និងទទួលបញ្ចាំម៉ូតូ និងរបស់របរមានតម្លៃគ្រប់ប្រភេទនោះគ្មានច្បាប់អនុញាតទេ ហើយជ្រកក្រោមស្លាកផ្ទះសំណាក់យីហោ «៨៨» ដែលមានម្ចាស់ឈ្មោះអែម បូរិន្ទ ភេទប្រុស អាយុ៣៨ឆ្នាំ ត្រូវបានកម្លាំងអធិការស្រុកកំរៀង និងកម្លាំងមូលដ្ឋានចុះបង្ក្រាប ក្រោយពីមានបណ្ដឹងជនរងគ្រោះដែលបាត់ម៉ូតូ ហើយរកឃើញពូនសម្ងំលាក់ខ្លួន នៅក្នុងទីតាំងទទួលបញ្ចាំនេះ ។
សេចក្ដីរាយការណ៍ដដែលបានបញ្ជាក់ថា ជាមួយនឹងកិច្ចប្រតិបត្តិការនេះសមត្ថកិច្ចបានឃាត់ខ្លួនបុរសម្នាក់ឈ្មោះសំ ឆាន់ ភេទប្រុស អាយុ៥៥ឆ្នាំ ដែលជាអ្នកយាម និងជាអ្នកទទួលបញ្ចាំឬទទួលទិញផ្ទាល់ ។ ពាក់ព័ន្ធនឹងទីតាំងទទួលទិញ ឬទទួលបញ្ចាំម៉ូតូ ឬរបស់មានតម្លៃដែលសម្ងំលាក់ខ្លួន នៅក្នុងផ្ទះសំណាក់យីហោ «៨៨» ខាងលើនេះបើតាមប្រភពព័ត៌មាននានាបានឲ្យដឹងថា ទីតាំងនេះបើកដំណើរការមុខរបរមិនប្រក្រតីនេះច្រើនឆ្នាំកន្លងមកហើយ សមត្ថកិច្ចមិនដែលរវីរវល់ម្ដងណាទេ ទើបតែចុះបង្ក្រាបនៅពេលនេះ ក្រោយពីមានជនរងគ្រោះប្ដឹង ។
ប្រភពដដែលបាននិយាយថា ម្ចាស់ទីតាំងនេះទទួលទិញ ឬទទួលបញ្ចាំម៉ូតូ ឬវត្ថុមានតម្លៃផ្សេងៗដោយមិនចាំបាច់មានឯកសារបញ្ជាក់ ឬសួរនាំអំពីប្រវត្តិនៃវត្ថុដែលត្រូវលក់ ឬបញ្ចាំទាំងនោះឡើយ ។ ពោលឲ្យតែម្ចាស់យកទៅដល់ចចារត្រូវថ្លៃគ្នា គឺឈ្មោះ សំ ឆាន់ ទទួលយកទាំងអស់ដោយមិនខ្វល់ថា ម៉ូតូ ឬវត្ថុមានតម្លៃទាំងនោះត្រូវបានលួចពីណាមកនោះទេ ។
ជុំវិញករណីនេះលោកឧត្តមសេនីយត្រី ជេត វណ្ណនី ស្នងការរងខេត្តបានថ្លែងថា ទីតាំងទទួលបញ្ចាំរបស់របរនោះ ពិតជាគ្មានច្បាប់អនុញ្ញាតមែន ហើយពេលនេះត្រូវបានកម្លាំងអធិការស្រុកកំរៀងចុះបង្ក្រាប និងដកហូតបានម៉ូតូជាង១០គ្រឿងផងដែរ ។ លោកស្នងការរងរូបនេះបានបញ្ជាក់ថា យើងមិនទាន់ដឹងថា តើម៉ូតូដែលបានដកហូតទាំងអស់នោះមានប៉ុន្មានគ្រឿងដែលស្របច្បាប់ និងមានប៉ុន្មានគ្រឿងដែលម្ចាស់ទីតាំងទទួលបញ្ចាំដោយមិនស្របច្បាប់? ព្រោះពេលនេះមន្ត្រីជំនាញនៃអធិការស្រុកកំពុងសួរនាំ និងកំពុងធ្វើការស្រាវជ្រាវតាមនីតិវិធីនៅឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ