សហរដ្ឋអាមេរិក-ចិន ៖ ប្រធានាធិបតីអាមេរិកលោកដូណាល់ត្រាំនិងសមភាគីចិនលោកស៊ីជីនពីង កាលពីថ្ងៃទី២៩មិថុនាបានសម្រេច លើការឈប់បាញ់គ្នាក្នុងសង្គ្រាមពាណិជ្ជកម្មរវាងមហាយក្សទាំង២ នាឱកាសនៃកិច្ចប្រជុំកំពូលG20នៅក្រុងអូសាកាជប៉ុន។ ទោះបីបែបនេះក្ដីពុំទាន់មានកាលបរិច្ឆេទកំណត់ណាមួយ សម្រាប់ការចរចាគ្នាខាងពាណិជ្ជកម្មបន្តទៀតនៅឡើយ។
លោកត្រាំថ្លែងថាយើងបានជួបគ្នាដ៏ល្អជាមួយប្រធានាធិបតីចិនលោកស៊ីជីនពីន ហើយខ្ញុំអាចនិយាយថាជាការជួបគ្នាល្អប្រសើរបំផុតមួយ។ លោកយល់ថាគូប្រជែងគ្នាទាំង២ដើរលើផ្លូវល្អជាថ្មី។ លោកពុំមានបំណងបន្ថែមពន្ធគយលើការនាំចូលផលិតផលចិនទៀតឬក៏លុបចោល យ៉ាងហោចណាស់ក៏សម្រាប់ពេលនេះដែរ។ លោកថាការចរចារវាងប្រទេសទាំង២នឹងធ្វើបន្តទៀត។
ការចរចាពាណិជ្ចកម្មរវាងមហាយក្សទាំង២ ត្រូវបានកាត់ផ្ដាច់កាលពីខែឧសភា ហើយក្រុងវ៉ាស៊ិនតោនបន្ទាប់មក គំរាមបន្ថែមពន្ធគយលើការនាំចូលផលិតផលចិន ដែលនឹងដល់សរុបជាង៥០០ពាន់លានដុល្លារ។ ទោះបីបទឈប់បាញ់គ្នានៃសង្គ្រាមពាណិជ្ចកម្មនោះមានបំណងចៀសវាង ការបាក់ស្រុតចុះនៃសេដ្ឋកិច្ចពិភពលោក តែទាំងចិនទាំងអាមេរិកពេលនេះនៅមិនទាន់ផ្ដល់ភាពលម្អិត លើបណ្ដាលក្ខខណ្ឌនៃការផ្អាកសង្គ្រាមនេះ ហើយក៏មិនទាន់មានកាលបរិច្ឆេទច្បាស់លើការបន្តចរចានៅឡើយ។
បន្ទាប់ពី២ថ្ងៃនៃការជួបគ្នានិងការពិភាក្សាគ្នា នាថ្ងៃទី២៩មិថុនានាយករដ្ឋមន្ត្រីជប៉ុនលោកស៊ីនហ្សូអាបេ បានថ្លែងបិទការជួបគ្នាកំពូលG20នៅក្រុងអូសាកា។ ការជួបគ្នានោះតាមពិតទៅពុំអាចដោះស្រាយបណ្ដាការខ្វែងគំនិតគ្នានានាឡើយ។ សហរដ្ឋអាមេរិកនៅតែមានការខ្វែងគំនិតជាមួយប្រទេសឯទៀតៗ។
ប្រទេស១៩បានសម្រេចអះអាងជាថ្មីពីការសន្យារបស់ពួកគេ ប្រកាន់យកកិច្ចព្រមព្រៀងក្រុងប៉ារីសស្ដីពីបរិយាកាស តែអាមេរិកនៅតែប្រឆាំងយ៉ាងម៉ឺងម៉ាត់។ គេកត់សម្គាល់ឃើញថាការជួបគ្នាកំពូលនោះហាក់បានត្រឹមតែ ការចាប់ដៃស្វាគមន៍គ្នានិងការញញឹមដាក់គ្នាតែលើបបូរមាត់៕ (កែសម្រួលដោយ ៖ បុប្ផា)
ចែករំលែកព័តមាននេះ