ទីក្រុងវ៉ាស៊ីនតោន៖ អាមេរិកត្រៀមបញ្ជូនកងទ័ពម៉ារីន និងកងជើងទឹករាប់ពាន់នាក់បន្ថែមទៀតទៅមជ្ឈិមបូព៌ា។ នាវាយូអែសអែស បក់សឺ (USS Boxer) ជាប្រភេទនាវាវាយប្រហារលើគូសត្រូវ រួមទាំងកងអង្គភាពទ័ពម៉ារីន និងនាវាចម្បាំងមួយគ្រឿងទៀតសម្រាប់អមដំណើរនឹងចាកចេញដំណើរឆាប់ៗនេះស្របទៅនឹងការចុះផ្សាយរបស់ទីភ្នាក់ងារព័ត៌មានរ៉យទ័រដែលថារដ្ឋាភិបាលរបស់លោកដូណាល់ត្រាំកំពុងពិចារណាបញ្ជូនកងទ័ពរាប់ពាន់នាក់ថែមទៀតដើម្បីពង្រឹងប្រតិបត្តិការសឹកនៅមជ្ឈិមបូព៌ា។ លោកត្រាំថ្លែងកាលពីយប់មិញថាលោកនឹងមិនបញ្ជូនកងទ័ពទៅទីណាទេ។ ប៉ុន្តែបើសិនលោកមានគម្រោងធ្វើដូច្នេះមែន លោកនឹងមិនប្រាប់អ្នកសារព័ត៌មានឱ្យដឹងនោះឡើយ។
ប្រភពបីនាក់នៅក្នុងរដ្ឋាភិបាលអាមេរិកដែលស្នើសុំមិនបញ្ចេញឈ្មោះមិនបានបញ្ជាក់ថាតើកងទ័ពដែលត្រៀមបញ្ជូនទៅថ្មីនោះនឹងទៅបំពេញតួនាទីជាអ្វីទេ។ មន្ត្រីរដ្ឋាភិបាលអាមេរិកម្នាក់បង្ហើបឱ្យដឹងថាកងទ័ពទាំងនោះបានចាកចេញដំណើរពីតំបន់ឆ្នេរសមុទ្រខាងលិច (នៃប្រទេសអាមេរិក) ប្រហែលបីសប្ដាហ៍មុនកាលកំណត់។ អ្នកសារព័ត៌មានព្យាយាមទាក់ទងទៅក្រសួងការពារជាតិ និងសេតវិមានដើម្បីស្នើសុំការឆ្លើយបំភ្លឺ។ ប៉ុន្តែគ្មានចម្លើយតបទេ។ ប្រភពខ្លះថាអាមេរិកបញ្ជូននាវាចម្បាំងបីគ្រឿង កងទ័ពម៉ារីនប្រហែល២៥០០នាក់ទៅមជ្ឈិមបូព៌ា។
គោលដៅចម្បងនៃបេសកកម្មលើកនេះដើម្បីការពារច្រកចេញចូលនៃកប៉ាល់ដឹកទំនិញ និងទប់ទល់នឹងការគំរាមកំហែងពីកងទ័ពជើងទឹក និងមីស៊ីលរបស់អ៊ីរ៉ង់។ រដ្ឋបាលរបស់លោកត្រាំអះអាងថាគោលដៅរបស់ខ្លួនគឺត្រូវតែចាត់ការកងទ័ពជើងទឹកអ៊ីរ៉ង់ នុយក្លេអ៊ែរអ៊ីរ៉ង់ និងមីស៊ីលអ៊ីរ៉ង់។ គោលដៅទាំងនេះនៅរក្សាទុកដដែល មិនផ្លាស់ប្ដូរទេ។ លោកត្រាំនៅតែប្រកាន់យកវិធានការយោធាជាជម្រើសនៅលើតុជានិច្ចចាប់តាំងពីសង្គ្រាមផ្ទុះឡើងដំបូង។ មានន័យថាភាគីទាំង២មិនទាន់ចង់ចរចាគ្នានៅឡើយទេ។ រដ្ឋមន្ត្រីការបរទេសអ៊ីរ៉ង់ថ្លែងថារដ្ឋាភិបាលរបស់លោកមិនដែលស្នើសុំឱ្យមានបទឈប់បាញ់ម្ដងណាឡើយ។
នាវាឈ្មោះយូអែសអែស បក់សឺ (USS Boxer) និងនាវាបុត្រសម្ព័ន្ធរបស់ខ្លួនបានចាកចេញដំណើរពីកំពង់ផែនៃទីក្រុងសាន់ឌីអេហ្គោ (San Diego)។ មន្ត្រីរដ្ឋាភិបាលអាមេរិកខ្លះទទួលស្គាល់ថាពិតជាមានការចាកចេញដំណើរនៃនាវាទាំងនោះមែន។ ប៉ុន្តែពួកគេមិនបានបញ្ជាក់ឱ្យច្បាស់ថាតើនាវាទាំងនោះធ្វើដំណើរទៅកន្លែងណាទេ។ អ៊ីរ៉ង់ប្រកាសថាប្រសិនបើខ្លួនរងការវាយប្រហារជាថ្មីទៀត ខ្លួននឹងមិនបន្ធូរដៃឡើយ៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ