ខេត្តកណ្ដាល ៖ បុរសម្នាក់ ព្រោះតែខឹងពេកបានក្លាយទៅជាអ្នកទោស ត្រូវនគរបាលចាប់ខ្លួន ក្រោយពេលបុរសនេះយកប្រេងសាំងទៅជះស្រោចលើរថយន្ត រួចគំរាមដុតសម្លាប់អ្នកបើក ព្រមទាំងចិន៤នាក់ទៀតកំពុងជិះក្នុងនោះទាំងអស់ បន្ទាប់ពីអ្នកបើកបរនោះជ្រុលប៉ះដៃចង្កូតគេហើយមិនព្រមសុំទោសសូម្បីមួយម៉ាត់ ហេតុការណ៍នេះកើតឡើងកាលពីម៉ោង១១និង៣០នាទីថ្ងៃត្រង់ ថ្ងៃទី២២ ខែមិថុនា ឆ្នាំ២០១៩ នៅលើកំណាត់ផ្លូវជាតិលេខ៤ ស្ថិតក្នុងភូមិអង្គស្នួលទី១ ឃុំពើក ស្រុកអង្គស្នួល ខេត្តកណ្ដាល។
ជនសង្ស័យខាងលើឈ្មោះ ជុំ វាសនា ហៅស្នា អាយុ៣៣ឆ្នាំ ជនជាតិខ្មែរ មុខរបរកសិករ ជិះ, ម៉ូតូម៉ាកគុប C-09 ជ្រុង ពាក់ស្លាកលេខកំពង់ស្ពឺ 1-C-8640 មានទីលំនៅក្នុងភូមិចំបក់កោង ឃុំទួលព្រិច ស្រុកអង្គស្នួល ខេត្តកណ្តាល រួមទាំងវត្ថុតាងប្រេងសាំងជាងកន្លះលីត្រសល់ពីការជះស្រោចលើរថយន្ត, ដែកកេស១។ ចំណែកបុរសអ្នកបើករថយន្តឈ្មោះ ស៊ុន នូច អាយុ៣៩ឆ្នាំ ជនជាតិខ្មែរ មុខរបរបើកបរ រថយន្តម៉ាក Lexus RX-300 ពណ៌ខ្មៅ ពាក់ស្លាកលេខភ្នំពេញ 2J-6857 ទីលំនៅបច្ចុប្បន្នភូមិចំការឪឡឹក សង្កាត់កាកាប២ ខណ្ឌពោធិ៍សែនជ័យ ។
តាមប្រភពព័ត៌មានឲ្យដឹងថា នៅមុនកើតហេតុ ជនសង្ស័យជិះម៉ូតូស្របគ្នាជាមួយរថយន្តខាងលើពីកើតទៅលិច ដោយក្នុងរថយន្តនោះមានដឹកភ្ញៀវជនជាតិចិន៤នាក់ផងដែរ លុះទៅដល់ត្រង់ចំណុចមុខធនាគារខាងកើតផ្សារបែកចាន រថយន្តក៏ជ្រុលប៉ះដៃចង្កូតម៉ូតូបន្តិចតែមិនបានបណ្ដាលឲ្យដួលឡើយ ។ ខណៈនោះភាគីទាំង២ ជជែកគ្នាយកត្រូវរៀងខ្លួនយ៉ាងតឹងសរសៃ.ក ប៉ុន្តែភ្លាមៗនោះមិនមានអំពើហិង្សាណាមួយកើតឡើងឡើយ ហើយកម្លាំងនគរបាលចរាចរណ៍ស្រុកអង្គស្នួលក៏បានសម្របសម្រួលបញ្ចប់រឿងដោយស្មើគ្នា ព្រោះពុំមានអ្នករងរបួស ឬបង្កឲ្យរងការខូចខាតអ្វីឡើយ។
ប្រភពដដែលបន្តថា ទោះបីជាមានការសម្រួលគ្នាចប់មែន ប៉ុន្តែគ្មានសំណងឡើយ ហើយបុរសអ្នកបើករថយន្តក៏មិនបានសុំទោសបុរសអ្នកជិះម៉ូតូសូម្បីតែមួយម៉ាត់ និងបើករថយន្តបន្តដំណើរទៅមុខបាត់ជាហេតុធ្វើឲ្យជនសង្ស័យរូបនេះអាក់អន់ស្រពន់ចិត្តយ៉ាងខ្លាំង។ បន្ទាប់មកជននេះទិញប្រេងសាំង២ដបចំណុះ២លីត្រ រួចជិះម៉ូតូដេញតាមរថយន្តរហូតដល់ភូមិអង្គស្នួលទី១ ឃុំពើក ស្រុកអង្គស្នួល ទើបតាមទាន់ហើយយកសាំងជះស្រោចលើរថយន្តជិតអស់១ដបទឹកក្រូចចំណុះ១លីត្រកន្លះ រីឯសាំង១ដបទឹកសុទ្ធចំណុះកន្លះលីត្រទៀត ជះមិនទាន់ទេ ព្រមទាំងកាន់ដែកកេស ហើយស្រែកគំរាមថា នឹងដុតសម្លាប់។
ប្រភពដដែលបន្តថា ភ្លាមៗនោះ អ្នកបើករថយន្ត ព្រមទាំងជនជាតិចិនមានការភ័យខ្លាចយ៉ាងខ្លាំង ហើយអ្នកបើកបររូបនោះចុះពីលើរថយន្តទាំងកំហឹងស្ទុះទៅដាល់លើជនសង្ស័យបញ្ចេញកំហឹងទៀតផង ដែលជាហេតុបង្កឲ្យមានការភ្ញាក់ផ្អើលពេញដងផ្លូវ បន្ទាប់មកនគរបាលប៉ុស្តិ៍ពើក និងនគរបាលព្រហ្មទណ្ឌស្រុកអង្គស្នួល ក៏ចុះទៅអន្តរាគមន៍ឃាត់ខ្លួនជនសង្ស័យតែម្ដង។
ប្រភពខាងលើបញ្ជាក់ទៀតថា ក្រោយពេលចាប់ខ្លួនជនសង្ស័យសារភាពថា ខ្លួនខឹងម្ចាស់រថយន្តនេះខ្លាំងពេកដែលមានចរឹកឡូយពេកក្រៃបើករថយន្តប៉ះខ្លួនហើយមិនទទួលកំហុសខ្លាចថោក គ្មានពាក្យសុំទោសសូម្បីតែ១ម៉ាត់សោះ រួចបើកឡានចេញទៅយ៉ាងព្រងើយ ទើបខ្លួនទិញប្រេងសាំង រួចជិះម៉ូតូចេញតាមយកសាំងទៅជះស្រោចលើរថយន្ត។ ប៉ុន្តែគ្រាន់តែជាការគំរាមឲ្យមានការភ័យខ្លាច និងព្រមានកុំឲ្យថ្ងៃក្រោយអ្នកបើករថយន្តម្នាក់នេះមានចរឹកឈ្លើយបើកប៉ះ ឬបុកគេហើយ អត់សុំទោសបែបនេះអញ្ចឹងទៀត សូមមានសុជីវធម៌ខ្លះផង ហើយខ្លួនមិនមានបំណងដុតរថយន្តនោះឡើយ។
ក្រោយពេលស្តាប់ចម្លើយសារភាពរួច នគរបាលបាននាំជនសង្ស័យ ព្រមទាំងវត្ថុតាងដែលដកហូតខាងលើ រួមជាមួយរថយន្ត និងម៉ូតូផងទៅកាន់អធិការដ្ឋាននគរបាលស្រុកអង្គស្នួល ដើម្បីសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្តកណ្ដាលចាត់ការតាមច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ