ខេត្តមណ្ឌលគិរី ៖ ក្រុមអ្នកតាមដានបរិស្ថានបានឲ្យដឹងថា រាល់ថ្ងៃនៅស្រុកកែវសីមា យ៉ាងហោចណាស់ក៏មានម៉ូតូកែច្នៃដឹក ឈើចេញពីតំបន់ព្រៃអភិរក្ស ឆ្ពោះទៅស្រុកស្នូល ខេត្តក្រចេះ មិនតិចជាង៥០គ្រឿងឡើយ ។ ការដឹកជញ្ជូនឈើទាំងនោះ គឺតែងមានគ្រោះថ្នាក់ញឹកញាប់ណាស់ ព្រោះដឹកឈើសុទ្ធតែខ្នាតយក្សពេញផ្លូវជាតិ ។
រឿងដែលកើតឡើងដដែលៗ និងឆក់យកជីវិតអ្នកក្រអស់ជាច្រើននាក់ក្នុងឆ្នាំ២០១៩នេះ ទាំងអាជ្ញាធរនិងមន្ត្រីជំនាញបានត្រឹមនិយាយថា ពលរដ្ឋដឹកតិចតួចគ្រាន់ដូរបាយ និងមិនមានវិធានការបង្ក្រាបនោះឡើយ។ ប៉ុន្តែការបណ្ដែតបណ្ដោយបែបនេះ ក៏ជាការបង្កឱ្យមានការដឹកជញ្ជូនឈើតាមម៉ូតូព្រោងព្រាតប្រៀបដូចជាសត្វកណ្ដៀរ ហើយអ្វីដែលធ្វើឱ្យមានការរន្ធត់ចិត្តនោះគឺ បើអ្នកដឹកឈើតាមម៉ូតូនោះដួល ច្បាស់ជាកំណាត់ឈើដ៏ធំនោះសង្កត់ស្លាប់ជាមិនខាន ។
ជាក់ស្តែង កាលពីល្ងាចថ្ងៃទី១៦ ខែមិថុនា កន្លងទៅ បុរសម្នាក់បានជួបគ្រោះថ្នាក់ដោយម៉ូតូដួលសង្កត់ស្លាប់យ៉ាងអាណោធអាធ័មបំផុត។សេចក្តីរាយការណ៍បានឲ្យដឹងថា នៅវេលាម៉ោង៥និង២៥នាទីល្ងាច នៅជិតសាលាបឋមសិក្សាស្រែអំពិល ស្ថិតក្នុងភូមិស្រែអំពិល ឃុំស្រែខ្ទុម ស្រុកកែវសីមា មានករណីគ្រោះថ្នាក់ដែលអ្នកបើកម៉ូតូដឹកឈើដួល បណ្តាលឲ្យឈើសង្កត់ចំក្បាលស្លាប់ ។
ជនរងគ្រោះឈ្មោះ សុខ គឿន អាយុ២៥ឆ្នាំ ជនជាតិខ្មែរ ជាកសិករ មានស្រុកកំណើតនៅភូមិត្រពាំងផ្អេរ ឃុំស្រែខ្ទុម ស្រុកកែវសីមា បច្ចុប្បន្ននៅភូមិ ឃុំ កើតហេតុខាងលើ ។ បន្ទាប់ពីធ្វើការពិនិត្យកន្លែងកើតហេតុ សមត្ថកិច្ចបញ្ជាក់ថា ជនរងគ្រោះពិតជាដឹកឈើដួលនិងត្រូវឈើសង្កត់ស្លាប់ប្រាកដមែន ហើយសពត្រូវបានក្រុមគ្រួសារយកមកធ្វើបុណ្យតាមប្រពៃណី ។ (សម្រួលដោយ៖ ស្រីណា)
ចែករំលែកព័តមាននេះ