រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បាន អះអាងថាប្រទេសមហាអំណាចខ្លះចង់ក្តោបយកកម្ពុជាធ្វើជាអាណានិគមរបស់ខ្លួនតែប៉ុណ្ណោះ ។ ការលើកឡើងរបស់អ្នកនាំពាក្យនេះ ខណៈដែលប្រទេសមហាអំណាចមួយចំនួនបានកំពុងចោទប្រកាន់មកលើកម្ពុជាថា កំពុងតែងាកទៅរកមហាអំណាចចិនតាមរយៈទទួលជំនួយសម្រាប់អភិវឌ្ឍន៍ប្រទេស ។
លោក សុខ ឥសាន អ្នកនាំពាក្យបានឲ្យដឹងតាមប្រព័ន្ធតេឡេក្រាម នៅថ្ងៃទី១៨ ខែមិថុនាថា គេថា កម្ពុជាលំអៀងទៅខាងចិនខ្លាំង ប៉ុន្តែជាការនិយាយលាបព៌ណរាជរដ្ឋាភិបាលកម្ពុជា ។ ព្រោះថា កម្ពុជាមាននយោបាយការបរទេសរាប់អាន និងមានទំនាក់ទំនងមិត្តភាព សាមគ្គី ភាព សហប្រតិបត្តិការជាមួយគ្រប់ប្រទេសលើសកលលោកដោយឈរលើមូលដ្ឋានស្មើភាពគោរព គ្នាទៅវិញទៅមក និងមិនជ្រៀតជ្រែកចូលកិច្ចការផ្ទៃក្នុងផងគ្នា ។
លោកបានលើកឡើងទៀតថា កម្ពុជាជាភូមិសាស្ត្រនយោបាយរវាងមហាអំណាចសកលលោក ហើយមានមហាអំណាចខ្លះច្រណែន និងចង់រំលោភសិទ្ធិឯករាជ្យ និងអធិបតេយ្យភាព កម្ពុជា ។ លោកបញ្ជាក់ថា«ជាមិត្តភក្តិត្រូវជួយរំលឹកដាស់តឿនគ្នា ។ តែមានចំពោះមហា អំ ណាចខ្លះមិនមែនរំលឹកដាស់តឿនទេ គឺចង់ក្តោបយកកម្ពុជាធ្វើជាអាណានិគមខ្លួនតែម្តង »។
ជាមួយគ្នានោះដែរ អ្នកនាំពាក្យគណបក្សកាន់អំណាចក៏បានលើកឡើងថា មានប្រទេសខ្លះដែលអួតខ្លួនជាអ្នកគោរពសិទ្ធិមនុស្ស ហើយចង់ឲ្យកម្ពុជាងាកមករកលទ្ធិប្រជាធិបតេយ្យ និងគោរពសិទ្ធិមនុស្សឡើងវិញផងដែរ ។ លោកថា បានអីនឹងងាកបើអត់មានខូចខាតអីផងនោះ ។ ការលើកឡើងរបស់អ្នកនាំពាក្យនេះក៏បានបង្ហាញពីការលើកឡើងរបស់ក្រុមប្រឆាំងថា ពេលធ្វើបាតុកម្មតវ៉ាម្តងត្រូវបានបិទសិទ្ធិដោយសមត្ថកិច្ចបានបង្ក្រាបជាដើម ។
លោកក៏បានលើកឡើងថា បាតុកម្មតវ៉ា គឺគឺជាសិទ្ធិ ហើយការចាត់វិធានការណ៍ទប់ស្កាត់ និងបង្ក្រាប គឺជាតួនាទី និងភារកិច្ចរបស់សមត្ថកិច្ច ។ សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចនេះ ខណៈដែលប្រទេសមហាអំណាចមានអាមេរិក និងចិនបានកំពុងតែចោទប្រកាន់គ្នាទៅវិញទៅមកថា កម្ពុជាកំពុងតែងាកទៅរកខាងនេះ ខាងនោះ ៕ កែសម្រួលដោយ ៖ សុឃាក់
ចែករំលែកព័តមាននេះ