ខេត្តសៀមរាប ៖ កម្លាំងការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋានខេត្តសៀមរាបបាននាំខ្លួនបុរសជនជាតិកូរ៉េម្នាក់ ករណីលួចស្នាក់នៅខុសច្បាប់ទម្លាប់គ្មានលិខិតឆ្លងដែន និងទិដ្ឋាការស្នាក់នៅផុតសុពលភាព រយៈពេលប្រហែល៤ឆ្នាំ៥ខែមកហើយ ។
លោកឧត្តមសេនីយ៍ត្រី ជា គឹមសាន ស្នងការរងទទួលផែនអន្តោរប្រវេសន៍នៃស្នងការដ្ឋានខេត្តសៀមរាបបានឱ្យដឹងនៅរសៀលថ្ងៃទី១២ ខែមិថុនា ឆ្នាំ២០១៩នេះថា ប្រតិបត្តិការនោះដឹកនាំដោយលោកវរសេនីយ៍ឯក តូច សុគន្ធ នាយការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋានខេត្តសៀមរាបបានចុះស្រាវជ្រាវនៅវេលាម៉ោង១៤និង០០នាទីរសៀលថ្ងៃទី១១ ខែមិថុនា ឆ្នាំ២០១៩ បានចុះទៅចំណុចផ្ទះជួលក្នុងភូមិគ្រួស សង្កាត់ស្វាយដង្គំ ក្រុង-ខេត្តសៀមរាប និងអញ្ជើញជនបរទេសម្នាក់មកសាកសួរនៅការិយាល័យពាក់ព័ន្ធនឹងករណីលួចស្នាក់នៅខុសច្បាប់ ។
លោកបានបញ្ជាក់ថា ជនបរទេសនេះមានឈ្មោះ YOO JEEUNG ភេទប្រុស អាយុ៥៨ឆ្នាំ ជនជាតិកូរ៉េខាងត្បូងកាន់លិខិតឆ្លងដែន (ថតចម្លង) លេខ M១៨៨១៦៤៦៧ មុខរបរបុគ្គលិកហាងលក់ផ្សិត ស្នាក់នៅផ្ទះជួល ភូមិគ្រួស សង្កាត់ស្វាយដង្គំ ក្រុង-ខេត្តសៀមរាប ។ លោកបានបញ្ជាក់បន្ថែមថា ក្រោយពីបានសាកសួរជនបរទេសរូបនេះរួចមករូបគេបានឆ្លើយថា ខ្លួនបានចូលមកព្រះរាជាណាចក្រកម្ពុជា កាលពីថ្ងៃទី១០ ខែមីនា ឆ្នាំ២០១០ តាមច្រកទ្វារព្រំដែនអន្តរជាតិប៉ោយប៉ែត ។
លិខិតឆ្លងដែនបានបាត់ កាលពីអំឡុងខែមីនា ឆ្នាំ២០១៤ ទិដ្ឋាការស្នាក់នៅក៏បានផុតសុពលភាពតាំងពីអំឡុងខែមករា ឆ្នាំ២០១៥ រហូតដល់សព្វថ្ងៃផងដែរ ។ មូលហេតុមិនបានធ្វើលិខិតឆ្លងដែនថ្មី និងបន្តទិដ្ឋាការស្នាក់នៅឱ្យបានត្រឹមត្រូវ ដោយសារពុំមានថវិកាគ្រប់គ្រាន់សម្រាប់បង់អាករទិដ្ឋាការស្នាក់នៅ ព្រោះពេលនោះខ្លួនពុំមានការងារធ្វើ ។ បច្ចុប្បន្នជនបរទេសរូបនេះត្រូវបានបញ្ជូនទៅស្នាក់ការត្រៀមបណ្តេញចេញប្រចាំខេត្តសៀមរាបចាត់ការបន្តតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ