រាជធានីភ្នំពេញ ៖ កាលពីថ្ងៃទី ១១ ខែមិថុនា ឆ្នាំ ២០១៩ នៅសាលប្រជុំធំ អគារសែនសុខ ធនាគារជាតិនៃកម្ពុជាបានរៀបចំសិក្ខាសាលាស្តីពី…
រាជធានីភ្នំពេញ ៖ កាលពីថ្ងៃទី ១១ ខែមិថុនា ឆ្នាំ ២០១៩ នៅសាលប្រជុំធំ អគារសែនសុខ ធនាគារជាតិនៃកម្ពុជាបានរៀបចំសិក្ខាសាលាស្តីពី «តួនាទីធនាគារកណ្តាលក្នុងសភាពការណ៍បច្ចុប្បន្ន» ក្រោមអធិបតីភាពឯកឧត្តម ជា ចាន់តូ អគ្គទេសាភិបាលធនាគារជាតិនៃកម្ពុជា និងមានសិក្ខាកាមចូលរួមប្រមាណជាង ៤០០ នាក់ ។
សិក្ខាសាលានេះ មានគោលបំណង បណ្តុះបណ្តាលផ្ទៃក្នុងដល់មន្ត្រីបុគ្គលិកធនាគារជាតិនៃកម្ពុជា ឱ្យទទួលបានការចែករំលែកព័ត៌មានបច្ចុប្បន្នភាព និងចំណេះដឹងថ្មីៗពាក់ព័ន្ធនឹងធនាគារកណ្តាល ជាពិសេសយល់ច្បាស់ពីបេសកកម្ម និងទិសដៅការងាររបស់ធនាគារជាតិនៃកម្ពុជា ប្រកបដោយសង្គតិភាព ក្នុងបរិការណ៍នៃការផ្លាស់ប្តូរយ៉ាងឆាប់រហ័សនៃនិម្មាបនកម្មហិរញ្ញវត្ថុ និងសមាហរណកម្មទៅក្នុងតំបន់ និងពិភពលោក ។
សិក្ខាសាលានេះ ក៏មានការចូលរួមធ្វើបទអន្តរាគមន៍ពីឯកឧត្តម ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជា ស្តីពី «ការធ្វើកំណែទម្រង់ក្របខ័ណ្ឌ និងយន្តការនៃការត្រួតពិនិត្យគ្រឹះស្ថានធនាគារ និងហិរញ្ញវត្ថុ ដោយផ្អែកលើហានិភ័យ និងទស្សនវិស័យនាពេលអនាគត» និងបទអន្តរាគមន៍របស់លោក ឃូ វុឍ្ឍី អគ្គនាយករងបច្ចេកទេស ស្តីពី «មុខងារ និងតួនាទីរបស់ធនាគារកណ្តាលនៃបណ្តាប្រទេសជុំវិញសកលលោក ជាពិសេសប្រទេសដែលមានសេដ្ឋកិច្ចជឿនលឿនក្នុងតំបន់អឺរ៉ូ» ។
នាពេលកន្លងមក ធនាគារជាតិនៃកម្ពុជាតែងតែខិតខំបំពេញមុខងារ-ភារកិច្ចចម្បងៗដូចជាអាជ្ញាធរដឹកនាំគោលនយោបាយរូបិយវត្ថុ អាជ្ញាធរ និងអាណាព្យាបាលត្រួតពិនិត្យលើប្រព័ន្ធធនាគារ អាជ្ញាធរអភិវឌ្ឍប្រព័ន្ធទូទាត់សងប្រាក់ ជាពិសេសភារកិច្ចស្នូលក្នុងការរក្សាស្ថិរភាពថ្លៃ ។
ក្រៅពីតួនាទីចម្បងៗទាំងនេះ ធនាគារជាតិនៃកម្ពុជា បានយកចិត្តទុកដាក់បន្ថែមលើមុខងារ-ភារកិច្ចដូចជា គោលនយោបាយទំនាក់ទំនងជាមួយសាធារណៈដើម្បីពង្រឹងជំនឿទុកចិត្ត លើកកម្ពស់ការយល់ដឹង ផ្នែកហិរញ្ញវត្ថុ និងជំរុញបរិយាប័ន្នហិរញ្ញវត្ថុ ដើម្បីស្របតាមការវិវត្តរីកចម្រើនយ៉ាងឆាប់រហ័សនៃបច្ចេកវិទ្យា និងការប្រែប្រួលនៃសមាហរណកម្មសេដ្ឋកិច្ចក្នុងតំបន់និងពិភពលោក ។
លើសពីនេះ ធនាគារជាតិនៃកម្ពុជា ក៏បានពង្រឹងក្របខ័ណ្ឌនៃការត្រួតពិនិត្យគ្រឹះស្ថានធនាគារ និងហិរញ្ញវត្ថុ ពិសេសផ្តោតទៅលើ ការត្រួតពិនិត្យដោយផ្អែកលើហានិភ័យនិងទស្សនវិស័យអនាគត ដើម្បីឱ្យស្របតាមឧត្តមានុវត្តអន្តរជាតិ គោលការណ៍គ្រឹះទីក្រុងបាសែលស្តីពីការត្រួតពិនិត្យគ្រឹះស្ថានធនាគារ និងហិរញ្ញវត្ថុ សំដៅធានាឱ្យបាននូវប្រព័ន្ធធនាគារមួយដែលមានសុខភាពល្អ និងមានស្ថិរភាពហិរញ្ញវត្ថុ រួមចំណែកដល់ការអភិវឌ្ឍសេដ្ឋកិច្ចជាតិ។
ឆ្លៀតក្នុងឱកាសនៃការជួបជុំក្នុងសិក្ខាសាលានេះ ក៏មានរៀបចំកម្មវិធីពិសារនំបញ្ចុកសាមគ្គី បន្ទាប់ពីសម្តេចតេជោនាយករដ្ឋមន្ត្រីបានអំពាវនាវឱ្យប្រជាពលរដ្ឋទូទាំងប្រទេសពិសារនំបញ្ចុកសាមគ្គីជាតិ ដើម្បីបញ្ជាក់អំពីសាមគ្គីភាព និងឯកភាពជាតិ ព្រមទាំងលើកស្ទួយផលិតផលខ្មែរ និងវប្បធម៌ខ្មែរ ។ កម្មវិធីនេះប្រព្រឹត្តទៅក្រោមបរិយាកាសប្រកបដោយសាមគ្គីភាព ភាតរភាព និងភាពសប្បាយរីករាយក្រៃលែង ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ