ខេត្តកណ្តាល ៖ តាមរយៈលោក កែវ រ៉េមី ប្រធានក្រុមការងារចុះជួយឃុំព្រែកអំបិល សម្តេចតេជោ ហ៊ុន សែន នាយករដ្ឋមន្ត្រីបានផ្តល់អំណោយផ្លូវបេតុងស្របតាមមាត់ស្ទឹងព្រែកអំបិល ស្រុកស្អាងប្រវែងជាង១០គីឡូម៉ែត្រដល់ប្រជាពលរដ្ឋ ហើយបើកការដ្ឋានចាប់ផ្តើមធ្វើនៅពេលឆាប់ៗខាងមុខនេះ ។
ដើម្បីឆ្លើយតបនឹងសេចក្តីត្រូវការរបស់ប្រជាពលរដ្ឋដែលរស់នៅឃុំព្រែកអំបិលយ៉ាងខ្លាំងតាមរយៈការស្នើសុំរបស់លោក កែវ រ៉េមី ប្រតិភូអមនាយករដ្ឋមន្ត្រី និងជាប្រធានក្រុមការងារចុះជួយឃុំព្រែកអំបិល ស្រុកស្អាង ខេត្តកណ្តាលត្រូវបានសម្តេចតេជោ ហ៊ុន សែន នាយក រដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជាសម្រេចឱ្យសាងសង់ផ្លូវបេតុងកាត់ មាត់ស្ទឹងព្រែកអំបិល ប្រវែង១០,៥០០ម៉ែត្រ ទន្ទឹង៨ម៉ែត្រ ជូនប្រជាពលរដ្ឋ ។
ការផ្តល់នូវអំណោយរបស់សម្តេចតេជោ ហ៊ុន សែន ទៅតាមសំណូមពររបស់ប្រជាពលរដ្ឋដែលកំពុងជួបការខ្វះខាតនេះត្រូវបានលោក កែវ រ៉េមី លើកឡើងទៅកាន់ប្រជាពលរដ្ឋ កាលពីថ្ងៃទី០៩ ខែមិថុនា ឆ្នាំ២០១៩ នៅក្នុងឱកាសដែលលោកបានដឹកនាំក្រុមការងាររៀបចំហូបនំបញ្ចុកសាមគ្គី ដើម្បីសន្តិភាពនៅឃុំជ្រោយអំបិល ស្រុកស្អាង ខេត្តកណ្តាល កន្លងមកនេះ ។ លោក កែវ រ៉េមី បានលើកឡើងយ៉ាងដូច្នេះថា ក្រោមការដឹកនាំរបស់សម្តេចតេជោ ហ៊ុន សែន គឺតែងតែគិតគូរពីសុខទុក្ខរបស់ប្រជាពលរដ្ឋនៅតាមមូលដ្ឋានជានិច្ច ទោះបីជាសម្តេចជាប់រវល់ក្នុងកិច្ចការងារជាតិយ៉ាងណាក៏ដោយក៏សម្តេចមិនដែលភ្លេចចាត់ឱ្យមន្ត្រីក្រោមឱវាទចុះសិក្សាស្វែងយល់ និងក្តាប់ពីស្ថានភាពនានារបស់ប្រជាពលរដ្ឋនៅតាមមូលដ្ឋានជានិច្ច ។
ចំពោះសមិទ្ធផលផ្លូវបេតុងមួយខ្សែនេះលោក កែវ រ៉េមី ក៏សូមថ្លែងអំណរគុណដល់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយកមន្ត្រី ប្រធានក្រុមការងារថ្នាក់កណ្តាលចុះជួយខេត្តកណ្តាល និងឧបនាយករដ្ឋមន្ត្រីប្រាក់ សុខុន ប្រធានក្រុមការងារថ្នាក់កណ្តាលចុះជួយស្រុកស្អាង ដែលលោកទាំងពីរបានគិតគូរផ្តួចផ្តើមគំនិតស្ថាបនាផ្លូវមួយខ្សែនេះឡើងទៅតាមសំណូមពររបស់ប្រជាពលរដ្ឋ ហើយនេះ គឺជាកាដូថ្មីមួយសម្រាប់លោកដែលមកទទួលតួនាទីជាប្រធានក្រុមការងារចុះជួយឃុំ ដើម្បីផ្តល់ជូនដល់ប្រជាពលរដ្ឋ នៅក្នុងឃុំទាំងមូលផងដែរ ។ នៅចំពោះមុខប្រជាពលរដ្ឋ លោកកែវ រ៉េមី បានបន្តថា ក្នុងនាមប្រធានក្រុមការងារចុះជួយឃុំព្រែកអំបិល លោកនឹងសហការជាមួយអាជ្ញាធរមូលដ្ឋាន សិក្សាស្វែងយល់ពីតម្រូវការជាចាំបាច់ និងភាពខ្វះខាតមួយចំនួន ដើម្បីអភិវឌ្ឍនៅក្នុងមូលដ្ឋានឆ្លើយតបទៅនឹងសំណូមពរដែលប្រជាពលរដ្ឋបានស្នើសុំផ្លូវពីរខ្សែនៅក្នុងភូមិចំនួនពីរបន្ថែមទៀត ដើម្បីសម្រួលដល់ការធ្វើដំណើររបស់ពួកគាត់ ។
ពាក់ព័ន្ធនឹងសំណូមពរនេះលោកកែវ រ៉េមី នឹងខិតខំប្រឹងប្រែងជំរុញឱ្យគម្រោងផ្លូវទាំងពីរខ្សែខាងលើដែលជាគម្រោងរបស់ខេត្តនោះឱ្យអនុវត្តឱ្យបានឆាប់រហ័ស ដើម្បីចូលកាត់បន្ថយភាពក្រីក្រ និងការលំបាករបស់ប្រជាពលរដ្ឋនៅតាមមូលដ្ឋានផងដែរ ។ តាមលោកមេឃុំ ព្រែកអំបិលបានឲ្យដឹងថា ផ្លូវមួយខ្សែនេះនឹងបើកការដ្ឋានសាងសង់នៅថ្ងៃទី២៦ ខែមិថុនា ខាងមុខនេះ ក្រោមអធិបតីភាពលោកប្រាក់ សុខុន ឧបនាយករដ្ឋមន្ត្រីរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងជាប្រធានគណៈពង្រឹងស្រុកស្អាងផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ