រាជធានីភ្នំពេញ ៖ ភ្លៀងធ្លាក់មួយមេលាយឡំនឹងខ្យល់កន្ទ្រាក់ បណ្តាលឲ្យបាក់បង្គោលភ្លើងអស់ចំនួន១៩ដើម ហើយសង្កត់លើអ្នកលក់តាមចិញ្ចើមផ្លូវ ព្រមទាំងសង្កត់លើរថយន្តដែលឈប់ចតតាមដងផ្លូវ រងការខូចខាតយ៉ាងធ្ងន់ធ្ងរ ។ ហេតុការណ៍ខាងលើបង្កអោយមានការភ្ញាក់ផ្អើលកាលពីវេលាម៉ោង៥និង៤០នាទីល្ងាចថ្ងៃទី៤ ខែមិថុនា…
រាជធានីភ្នំពេញ ៖ ភ្លៀងធ្លាក់មួយមេលាយឡំនឹងខ្យល់កន្ទ្រាក់ បណ្តាលឲ្យបាក់បង្គោលភ្លើងអស់ចំនួន១៩ដើម ហើយសង្កត់លើអ្នកលក់តាមចិញ្ចើមផ្លូវ ព្រមទាំងសង្កត់លើរថយន្តដែលឈប់ចតតាមដងផ្លូវ រងការខូចខាតយ៉ាងធ្ងន់ធ្ងរ ។
ហេតុការណ៍ខាងលើបង្កអោយមានការភ្ញាក់ផ្អើលកាលពីវេលាម៉ោង៥និង៤០នាទីល្ងាចថ្ងៃទី៤ ខែមិថុនា ឆ្នាំ២០១៩ នៅតាមបណ្តោយផ្លូវជាតិលេខ៤ បុរីពិភពថ្មី ផ្សារកំបូល ដែលស្ថិតនៅភូមិគល់ សង្កាត់កន្ទោក ខណ្ឌពោធិ៍សែនជ័យ ។
បើតាមប្រភពព័ត៌មានពីសមត្ថកិច្ចប៉ុស្តិ៍នគរបាល២ជាប់គ្នា គឺប៉ុស្តិ៍នគរបាលសង្កាត់កន្ទោក និងប៉ុស្តិ៍នគរបាលសង្កាត់កំបូល បានអោយដឹងថា នៅមុនពេលកើតហេតុ ដោយមានភ្លៀងធ្លាក់មួយមេយ៉ាងធំ ព្រមទាំងមានខ្យល់កន្ទ្រាក់ ដែលបង្កឲ្យបាក់បង្គោលភ្លើងអស់ចំនួន១៧បង្គោល និងបាក់សង្កត់ទៅលើបង្គោលភ្លើងបំភ្លឺផ្លូវចំនួន២ដើមទៀត ហើយបាក់សង្កត់ទៅលើរថយន្តកុងតឺន័រដែលឈប់ចតតាមដងផ្លូវប្រមាណ២គ្រឿង ព្រមទាំងបាក់សង្កត់លើអ្នកលក់ដូរលក់ខោអាវជជុះ និងជួសជុលម៉ូតូនៅតាមចិញ្ចើមផ្លូវ បណ្តាលឱ្យប្រជាពលរដ្ឋភ័យខ្លាចនាំគ្នារត់ចោលអីវ៉ាន់អស់ ព្រមទាំងស្លាកប៉ាន់ណូបុរីខាងលើក៏បានដួល រលំបាក់អស់ជាច្រើនកន្លែង និងបណ្តាលឲ្យរងការខូចខាតយ៉ាងធ្ងន់ធ្ងរផងដែរ ។
តាមប្រភពដដែលបានបញ្ជាក់ទៀតថា គេមិនទាន់ដឹងនៅឡើយថា អ្នកលក់ដូរតាមចិញ្ចើមផ្លូវខាងលើ មានអ្នករងរបួសប៉ុន្មាននាក់នោះទេ ព្រោះក្រោយពេលកើតហេតុ ទីតាំងខាងលើមិនទាន់ឃើញមានអ្នកមកលក់ដូរនៅឡើយ ព្រោះខ្លាចឆ្លងចរន្តអគ្គិសនីឆក់។ បន្ទាប់មកសមត្ថកិច្ចបានទាក់ទងទៅផ្នែកអគ្គិសនីដើម្បីបិទប្រព័ន្ធភ្លើង និងបណ្តាលឲ្យងងឹតជាច្រើនកន្លែងនៅក្នុងខណ្ឌពោធិ៍សែនជ័យផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ