ខេត្តបាត់ដំបង ៖ ជនមិនស្គាល់មុខដែលអាចមានបក្សពួកលើសពី២នាក់ បានធ្វើសកម្មភាពគាស់ផ្ទះប្រជា ពលរដ្ឋចូលលួចយកលុយនិងគ្រឿងអលង្ការអស់គ្មានសល់ទាំងថ្ងៃ ខណៈម្ចាស់ផ្ទះបិទទ្វារទុកចោលរវល់ទៅចម្ការដែលគេសន្និដ្ឋានថា អាចកើតឡើងនៅចន្លោះពីម៉ោង១២ថ្ងៃត្រង់់ ទៅម៉ោង៥ល្ងាចថ្ងៃទី១ ខែ មិថុនា…
ខេត្តបាត់ដំបង ៖ ជនមិនស្គាល់មុខដែលអាចមានបក្សពួកលើសពី២នាក់ បានធ្វើសកម្មភាពគាស់ផ្ទះប្រជា ពលរដ្ឋចូលលួចយកលុយនិងគ្រឿងអលង្ការអស់គ្មានសល់ទាំងថ្ងៃ ខណៈម្ចាស់ផ្ទះបិទទ្វារទុកចោលរវល់ទៅចម្ការដែលគេសន្និដ្ឋានថា អាចកើតឡើងនៅចន្លោះពីម៉ោង១២ថ្ងៃត្រង់់ ទៅម៉ោង៥ល្ងាចថ្ងៃទី១ ខែ មិថុនា នៅក្នុងភូមិជ្រៃកោង សង្កាត់ស្លាកែត ក្រុងបាត់ដំបង ។ នេះបើតាមសេចក្ដីរាយការណ៍របស់សមត្ថ កិច្ច ។
មន្ត្រីនគរបាលអធិការដ្ឋានក្រុងបាត់ដំបងនិយាយថា ហេតុការណ៍គាស់លំនៅឋានពលរដ្ឋចូលលួចទ្រព្យ សម្បត្តិនេះ បានកើតឡើងនៅពេលម្ចាស់ផ្ទះបិទទ្វារទុកចោលហើយរវល់ទៅចម្ការ លុះត្រឡប់មកវិញពេលល្ងាចទើបដឹង និងប្ដឹងទៅសមត្ថកិច្ចឲ្យជួយអន្តរាគមន៍ ។ ម្ចាស់ផ្ទះរងគ្រោះឈ្មោះ ជា កុសល ភេទប្រុស អាយុ៣១ឆ្នាំ ហើយក្រោយពីមានពាក្យបណ្តឹង មន្ត្រីសមត្ថកិច្ចបានទៅកាន់កន្លែងកើតហេតុភ្លាមៗដើម្បីត្រួតពិនិត្យ ។ បើតាមការពិនិត្យជាក់ស្ដែង ជនដៃដល់បានចូលទៅក្នុងរបងរួចគាស់ទ្វារចូលទៅខាង ក្នុងផ្ទះ ។
ក្រោយមក បានគាស់ទ្វារបន្ទប់ខាងក្នុងទៀត និងរើកកាយលួចយកលុយនិងគ្រឿងអលង្ការអស់គ្មានសល់ ហើយគេចខ្លួនទៅបាត់ដោយមិនរំខានដល់សមត្ថកិច្ចឡើយ។ គេសង្ស័យជនដៃដល់អាចមានបក្សពួកយ៉ាងតិច២នាក់ ក្នុងការចូលធ្វើសកម្មភាពគាស់លំនៅឋាននេះ ។ បើតាមការរៀបរាប់របស់ម្ចាស់ផ្ទះ ត្រូវបានសមត្ថកិច្ចស្រង់សម្តីថា គាត់មិនបាននៅផ្ទះទេ គឺបិទទ្វារទុកចោលព្រោះរវល់ទៅចម្ការ ។
លុះល្ងាចឡើងពេលត្រឡប់មកពីចម្ការវិញ ស្រាប់តែឃើញទ្វារផ្ទះត្រូវបានគេគាស់ផ្ដាច់ ហើយចូលទៅក្នុងបន្ទប់ ឃើញអីវ៉ាន់រាយប៉ាយ និងមានស្នាមគាស់កកាយ ថែមទាំងបាត់លុយនិងគ្រឿងអលង្ការអស់គ្មានសល់ ទើបមានការភ្ញាក់ផ្អើល និងបានដឹងយ៉ាងច្បាស់ថា ពិតជាមានចោរចូលលួចទ្រព្យសម្បត្តិនៅក្នុងផ្ទះ ក៏រាយការណ៍ប្ដឹងទៅសមត្ថកិច្ចតែម្ដង ។
ជាមួយគ្នានេះ ជនរងគ្រោះបានរាយការណ៍ប្រាប់សមត្ថកិច្ចអំពីទ្រព្យសមប្បត្តិដែលបាត់បង់រួមមាន លុយ៣០លានរៀលនិង១០០ដុល្លារ ខ្សែក១ខ្សែ និងបន្តោងប្លាទីនដាំត្បូងពេជ្រ១ មានតម្លៃសរុប១.៧៦០ដុល្លារ ចិញ្ចៀនប្លាទីនដាំត្បូងពេជ្រ១វង់ មានតម្លៃ៦០០ដុល្លារ ខ្សែដៃប្លាទីន១ខ្សែមានតម្លៃ៨៥០ដុល្លារ និងខ្សែកមាស១ខ្សែ មានតម្លៃ២.៧០០ដុល្លារ ។
ជុំវិញករណីនេះ លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត មានប្រសាសន៍ថា ពិតជាមានការគាស់លំនៅឋានចូលលួចទ្រព្យសម្បត្តិរបស់ពលរដ្ឋមែន ។ ជនដៃដល់អាចមានបក្សពួក២នាក់ ទើបអាចធ្វើសកម្មភាពនេះ បាន ។ ប៉ុន្តែលោកស្នងការរងមិនទាន់អាចធ្វើការសន្និដ្ឋានឲ្យជាក់លាក់បានទេ អំពីការកំណត់មុខសញ្ញាជនសង្ស័យ តែលោកគ្រាន់តែបង្ហើបឲ្យដឹងខ្លះៗថា អាចជាក្រុមដែលធ្លាប់ប្រព្រឹត្តកន្លងមកដែលមានមធ្យោបាយដឹកជញ្ជូនបក្សពួកទម្លាក់ឲ្យធ្វើសកម្មភាពនេះ ។
ប៉ុន្តែបើតាមប្រភពពីមន្ត្រីខ្លះវាយតម្លៃថា ក្រុមជនដៃដល់អាចជាជនដែលធ្លាប់ធ្វើសកម្មភាពបែបនេះកន្លងមក ហើយក្រុមជនសង្ស័យនេះ ហាក់កំពុងស្ថិតក្នុងក្រុងបាត់ដំបងតែម្ដង ។ កន្លងមក នៅក្នុងភូមិជ្រៃកោងនេះមានក្រុមចោរគាស់លំនៅឋានចូលលួចទ្រព្យសម្បត្តិបែបនេះញឹកញាប់បំផុត ដែលកើតឡើងស្ទើរទាំងយប់ទាំងថ្ងៃ ។
មានការកត់សម្គាល់ផងដែរពាក់ព័ន្ធនឹងអំពើចោរកម្មនេះថា បើតាមការពិនិត្យលើបទល្មើសនានាដែលបានកើតមានឡើងនាពេលកន្លងមក នៅក្នុងខេត្តបាត់ដំបង គឺហាក់ដូចជាមិនទាន់មាន សញ្ញាណាមួយដែលអាចបង្ហាញថា មានការថមថយឡើយ ។ បើពិនិត្យលើរបាយការណ៍របស់សមត្ថកិច្ចសព្វថ្ងៃនេះ បទល្មើសដែលបាន និងកំពុងកើតឡើងបណ្ដាក់គ្នាមិនដាច់នាបច្ចុប្បន្ននេះ ភាគច្រើនគឺជាអំពើ«ចោរកម្ម»និងបទល្មើស«គ្រឿងញៀន»។
បទល្មើសចោរកម្មដែលកំពុងកើតពេញបន្ទុក នៅពេលនេះមានដូចជា «ចោរឆក់ ចោរលួច ចោរកាច់សោ.កម៉ូតូ និងចោរគាស់លំនៅឋាន។ល។»។ ដោយឡែក ជនប្រព្រឹត្តបទល្មើសគ្រឿងញៀនវិញ ក៏កំពុងប្រណាំងប្រជែងគ្នាយ៉ាងខ្លាំង ក្លាដែរ ដែលបទល្មើសនេះកំពុងរីករាលដាលកាន់ តែខ្លាំងឡើងៗ តាំងពីទីប្រជុំជនរហូតដល់ទីជនបទឆ្ងាយដាច់ស្រយាល ។
ទោះជាយ៉ាងណា ចំពោះមុខសញ្ញាជួញដូរគ្រឿងញៀន គេពុំសូវឃើញសមត្ថកិច្ចបង្ក្រាបបានពួកមេខ្លោងណាស់ ភាពច្រើនបង្ក្រាបបានតែពួកចែកចាយ ឬជនជួញដូរបន្តពីមេខ្លោងតែប៉ុណ្ណោះ ហើយក៏មិនដែលឃើញសមត្ថកិច្ចបន្តនីតិវិធីតាមចាប់បានមេខ្លោងដែរ ចាប់បានត្រឹមតែពួកជួញដូរកំប៉ិកកំប៉ុកបន្តពីមេខ្លោង ។ ឯចំពោះបទល្មើស«ចោរកម្ម»វិញ ភាគច្រើនកើត ឡើងនៅក្នុងក្រុងបាត់ដំបង និងតាមបណ្ដាស្រុកមួយចំនួនទៀត ។
ពាក់ព័ន្ធនឹងបទល្មើសដែលកំពុងកើតឡើងយ៉ាងពេញបន្ទុកនេះ មន្ត្រីស្នងការដ្ឋាននគរបាល ខេត្តបានបង្ហើបថា លោកអធិការឬមន្ត្រីជំនាញតាមស្រុកមួយចំនួន បានព្យាយាមបិទបាំងមិនរាយការណ៍ជួនថ្នាក់លើទេ នៅពេលបទល្មើសកើតឡើងនៅក្នុងមូលដ្ឋានរបស់ខ្លួន ។ ពួកគេមិនចង់ឲ្យថ្នាក់លើដឹងថា ទឹកដីដែលខ្លួនគ្រប់គ្រងសម្បូរបទល្មើសកើតឡើងមិនឈប់ ឬខ្លាចគេរិះគន់អំពីភាពអសកម្មដែលខ្លួនទប់ស្កាត់ឬបង្ក្រាបមិនបាន ។ ដូច្នេះហើយទើបធ្វើឲ្យជនល្មើសនៅតែបន្តដើរប្រព្រឹត្តបទល្មើសជាបន្តបន្ទាប់បានស្ទើរគ្រប់ទីកន្លែងតាមទំនើងចិត្ត ។
មន្ត្រីដដែលក៏បានផ្ដល់ជាយោបល់ដែរថា ដើម្បីគ្រប់គ្រង់មុខសញ្ញា និងឈានដល់ការបង្ក្រាបមុខសញ្ញាបាន លោកអធិការ ឬមន្ត្រីជំនាញតាមបណ្តាស្រុក ឬនៅក្នុងក្រុងបាត់ដំបង មិនត្រូវបិទបាំង ឬមិនរាយការណ៍បទល្មើស ដែលបានកើតមានក្នុងទឹកដីខ្លួនទេ ត្រូវតែរាយការណ៍ជួនទៅលោកស្នងការ និងលោកស្នងការរងទទូលបន្ទុក ឬជូនដល់ការិយាល័យជំនាញឲ្យបានដឹង ដើម្បីពិភាក្សារកវិធីដោះស្រាយនិងចាត់ការតាមនីតិវិធីច្បាប់ មិនត្រូវនាំគ្នាបិទបាំងបទល្មើស ព្រោះតែខ្លាចថ្នាក់លើស្ដីបន្ទោស ឬខ្លាចគេរិះគន់ថា
«ខ្លួនអន់ និងអសមត្ថភាពនោះទេ បើមិនដូច្នេះទេ បទល្មើសនៅតែបន្តកើតមានដដែលៗកាន់តែខ្លាំង» ៕ (សម្រួលដោយ៖ ស្រីណា)
ចែករំលែកព័តមាននេះ