ខេត្តបាត់ដំបង ៖ ជុំវិញការចិញ្ចឹមកណ្ដូបនេះ លោក សឺន (ជាម្ចាស់កសិដ្ឋានចិញ្ចឹមសត្វកណ្ដូប) ក៏បានធ្វើ ការប៉ាន់ប្រមាណដែរថា បើតាមលោកដឹងទំនងបែបមិនទាន់មានកសិករខ្មែរណាម្នាក់ ដែលប្រកបរបរចិញ្ចឹមសត្វកណ្ដូបដូចលោកទេ សម្រាប់នៅប្រទេសយើងនេះ ។ ព្រោះនេះ ជាការចិញ្ចឹមបែបស្រមើរស្រមៃ ដែលលោកមើលឃើញតាមរយៈ YouTube ដែលណែ នាំដោយកសិករនៅប្រទេសចិនតែប៉ុណ្ណោះ ។ ប៉ុន្តែយ៉ាងណាក៏ដោយ លោកនឹងព្យាយាមតស៊ូជាមួយនឹងសត្វកណ្ដូបនេះបន្តទៀត ក្រែងទទូលបានលទ្ធផលល្អប្រសើរ ដូចកាលដែលលោកចិញ្ចឹមសត្វលើកដំបូង កាលពីប៉ុន្មានឆ្នាំមុន ។
គួរបញ្ជាក់ថា នេះអាចចាត់ទុកថា ជាមុខរបរដ៏កម្របំផុតមួយ ហើយទំនងអាចមានតែមួយកន្លែងគត់ សំរាប់ប្រទេសកម្ពុជា ដែលកសិករម្នាក់បានសម្រេចបោះបង់មុខរបរចិញ្ចឹម«សត្វគ្រួច» ដោយសារតែទីផ្សារកាន់តែតូចចង្អៀត ហើយងាកមកផ្ដូចផ្ដើមគំនិតបើកកសិដ្ឋានចិញ្ចឹម«សត្វកណ្ដូប»ដ៏ធំដុំមួយកន្លែងវិញ ដោយគ្រាន់តែបានចេះចាំខ្លះៗ ពីការណែនាំនៃវិធីចិញ្ចឹម«សត្វកណ្ដូប»នេះ តាមរយៈការមើល«You Tube» ដែលរៀបចំបង្ហាញដោយកសិករនៅប្រទេសចិន ។
ពិតមែនតែការបើកកសិដ្ឋានចិញ្ចឹម«សត្វកណ្ដូប»នេះ មិនទាន់ទទូលបានជោគជ័យជាដុំកំភួននៅឡើយក្តី ប៉ុន្តែម្ចាស់កសិដ្ឋាននេះ បានអះអាងថា «ពេលនេះ ខ្ញុំកំពុងប្រឹងប្រែងយ៉ាងខ្លាំង ក្នុងការស្វះស្វែងរកវិធី សាស្ត្រនៃការចិញ្ចឹមសត្វកណ្ដូបនេះ» ។ នេះជាការលើកឡើងរបស់កសិករម្នាក់ឈ្មោះសឺន ភេទប្រុស ដែលជាម្ចាស់កសិដ្ឋានចិញ្ចឹម«សត្វកណ្ដូប» នៅក្នុងឃុំស្ដៅ ស្រុករតនមណ្ឌល ។
កសិករវ័យ៥០ឆ្នាំផ្លាយរូបនេះបាននិយាយថា នេះគ្រាន់តែជាការសាកល្បងយ៉ាងប្រថុយប្រថានបំផុត ក្នុងការបើកទីតាំងចិញ្ចឹម«សត្វកណ្ដូប» ខណៈកន្លងទៅគាត់មិនធ្លាប់ចិញ្ចឹមសត្វប្រភេទនេះទាល់តែសោះ ។ គាត់និយាយថា កន្លងទៅគាត់ធ្លាប់តែចិញ្ចឹមសត្វគ្រូច មាន់ឬសត្វពពែ ប៉ុន្តែជាង២ឆ្នាំកន្លងទៅនេះ គាត់បានបោះបង់មុខរបរចិញ្ចឹមសត្វគ្រូច ដោយសារតែទីផ្សារកាន់តែតូចចង្អៀតទៅៗ ។
លោក សឺន បាននិយាយពីគំនិតផ្ដូចផ្ដើមចិញ្ចឹមកណ្ដូបនេះយ៉ាងដូច្នេះថា «តាំងពីដើមរហូតមក ខ្ញុំមិនដែលនឹកឃើញពីមុខរបរចិញ្ចឹមសត្វកណ្ដូបនេះទេ តែខ្ញុំបានឆែករកឃើញពីរបៀបចិញ្ចឹមកណ្ដូបនេះនៅក្នុង YouTubeដែលរៀបចំឡើងដោយកសិករនៅប្រទេសចិន ។ ស្របពេលដែលទីផ្សារសត្វគ្រូចកាន់តែរួមតូចចង្អៀតផង ទើបខ្ញុំសម្រេចបោះបង់របរចិញ្ចឹមគ្រួចនេះជាបណ្ដើរៗ ហើយងាកមកចាប់ផ្ដើមរៀបចំទីតាំងចិញ្ចឹមសត្វកណ្ដូបនេះម្ដងវិញ » ។ កសិកររូបនេះបញ្ជាក់ដែរថា «ខ្ញុំបានយកចិត្តទុកដាក់តាមដានពីការណែនាំដោយសង្ខេប អំពីវិធីសាស្ត្រ នៃការចិញ្ចឹមសត្វកណ្ដូបនេះ ដែលរៀបរាប់ពីទីតាំងចិញ្ចឹម របៀបធ្វើរោង របៀបចិញ្ចឹម និងការថែទាំ» ។
កណ្ដូប គឺជាសត្វដែលរស់នៅជាមួយនឹងធម្មជាតិ ព្រៃភ្នំនៅគ្រប់ទីកន្លែង ហើយវាស៊ីស្មៅឬស្លឹកឈើជាអាហារ ។ បើតាមការពិនិត្យ សត្វកណ្ដូបដែលកសិករចិញ្ចឹមនេះ វាគឺជាសត្វកណ្ដូបរស់នៅក្នុងព្រៃឬនៅតាមចម្ការ ដែលអ្នកស្រុកធ្លាប់ប្រទះឃើញរាល់ថ្ងៃ ហើយធ្លាប់ចាប់លក់ដូរទៀតផង ។ អ្នកស្រុកតែងហៅឈ្មោះទៅតាមតំបន់ថា ជាសត្វ«កណ្ដូបប៉ារ៉ា ឬកណ្ដូបត្រប់» ។
នៅខេត្តបាត់ដំបងគេតែងប្រទះឃើញសត្វកណ្ដូបប្រភេទនេះ ភាគច្រើនរស់នៅតាមចម្ការពោត ឬនៅតាមកន្លែងដែលសំបូរស្មៅឬដើមត្រែង ។ បើពិនិត្យពីជីវិតរស់នៅ នៃពពួកសត្វកណ្ដូបនេះហាក់ងាយស្រូលក្នុងការចិញ្ចឹមបំផុត ព្រោះវាស៊ីតែស្មៅឬស្លឹកឈើផ្សេងៗជាអាហារ ។ ប៉ុន្តែផ្ទុយពីការមើលឃើញជាក់ស្ដែង នៃសត្វកណ្ដូបនេះ ចំពោះកសិករដែលចិញ្ចឹមកណ្ដូបនេះវិញ បានបង្ហាញពីផលវិបាកខ្លះៗ នៅពេលគាត់បានឆ្លងកាត់ នៃការចិញ្ចឹមសាកល្បងអស់មួយរយៈកន្លងទៅនេះ ។
លោកសឺន ហាក់គ្មានពេលផ្ដល់បទសម្ភាសន៏តាមសម្រូលជាមួយកោះសន្តិភាពទេ ដោយសាររវល់ខ្លាំងនឹងចំណីកណ្ដូប តែគាត់អាចនិយាយបាន ដោយដៃកាន់កណ្ឌៀវកាត់ស្មៅបណ្ដើរនិយាយបណ្ដើរយ៉ាងដូច្នេះថា «ការចិញ្ចឹមកណ្ដូបងាយស្រូលទេ វាស៊ីតែស្មៅមួយមុខប៉ុណ្ណោះ តែវាស៊ីស្មៅច្រើនខ្លាំងបំផុត ក្នុងមួយថ្ងៃៗអស់រាប់រយគីឡូក្រាម» ។ ដៃម្ខាងកាន់បាច់ស្មៅត្រកងទ្រដោយផ្លែកណ្ដៀវ ដើរសំដៅទៅកាន់ម៉ូតូសណ្ដោងរ៉ឺម៉កកញ្ចាស់របស់គាត់ដែលដឹកស្មៅ លោកសឺន បានគ្រវីក្បាល ហើយពោលថា «ការចិញ្ចឹមមិនសូវពិបាកទេ ព្រោះវាស៊ីតែស្មៅមួយមុខ តែខ្ញុំនឿយហត់នឹងការរកស្មៅឲ្យកណ្ដូបស៊ីណាស់ ព្រោះវាស៊ីស្មៅចង់ច្រើនជាងសត្វគោទៅទៀត» ។
បើទោះជាការចញ្ចឹមកណ្ដូបនេះជួបផលវិបាកខ្លះៗក្តី ប៉ុន្តែកសិកររូបនេះបានប្រាប់ថា ការចាប់ផ្ដើមចិញ្ចឹម សត្វកណ្ដូបនេះបានរយៈពេលជិត២ឆ្នាំកន្លងមកហើយមែន ប៉ុន្តែនៅមិនទាន់ទទូលបានផ្លែផ្កាទេ ព្រោះកំពុងស្ថិតនៅក្នុងគម្រោងសាកល្បងនៅឡើយ ។ បច្ចុប្បន្ននេះ គាត់បានពង្រីកទ្រុង ឬរោងចិញ្ចឹមកណ្ដូបនៅក្នុងកសិដ្ឋានបានប្រមាណជាង២០កន្លែង នៅលើផ្ទៃដីជាងកន្លះហិកតា ។
សត្វកណ្ដូបដែលកំពុងចិញ្ចឹមទាំងមេពូជនិងកូនទើបញាស់ រៀបចំពង្រីកដាក់ទ្រុងបានត្រិម៤ឬ៥ទ្រុងតែប៉ុណ្ណោះ ដែលរោងឬទ្រុងនីមួយៗមានទំហំ៥ម៉ែត្រគុណនឹង១២ម៉ែត្រ ។ គាត់បានបញ្ជាក់ដែរថា កាលដំបូងឡើយគាត់បានទិញពូជកណ្ដូបនេះពីប្រជាពលរដ្ឋដែលដើរចាប់តាមចម្ការយកទៅលក់ ហើយកាលនោះគាត់បានទិញសត្វកណ្ដូបដែលនៅរស់ តែប៉ុន្មានគីឡូប៉ុណ្ណោះយកមកចិញ្ចឹមនិងបានបន្តពូជរហូតមកដល់សព្វថ្ងៃនេះ ។
លោក សឺន បាននិយាយថា បើពិនិត្យលើជីវិតរស់នៅពិតប្រាកដរបស់សត្វកណ្ដូបដែលនៅក្នុងព្រៃ ហាក់មិនលំបាកចិញ្ចឹមទេ ព្រោះវាស៊ីតែស្មៅ តែនៅពេលយកវាមកចិញ្ចឹមនៅក្នុងទ្រុងឬនៅក្នុងរោងដែលគ្របជិតដោយសំពត់ស្បៃជ័រ វាអាចជួបបញ្ហាច្រើនគួរសមដែរ ។ គាត់និយាយថា សព្វថ្ងៃអ្វីដែលជាបញ្ហាគឺសត្វកណ្ដូបងាប់ដោយមិនទាន់ដឹងមូលហេតុ សត្វស្រមោចឬកណ្តុរវាខាំស៊ីកណ្ដូបផ្ទាល់ដី រីឯសត្វស្លាបវាទុំចឹកទម្លុះស្បៃផ្នែកខាងលើដើម្បីស៊ីកណ្ដូប និងធ្វើឲ្យសត្វកណ្ដូបអាចហើរចេញពីទ្រុងបានដូច្នេះត្រូវការមើលថែទាំណាស់ ។
កសិករដែលមានជំនាញខាងចិញ្ចឹមសត្វរូបនេះ បានបង្ហាញពីការព្យាយាមតស៊ូដោយអំណត់ចំពោះការចាប់អាជីពចិញ្ចឹមកណ្ដូបនេះ ព្រោះគាត់យល់ថា បច្ចុប្បន្នសត្វកណ្ដូបមានទីផ្សារល្អ ហើយទំនងក៏គ្មានអ្នកចិញ្ចឹមទៀតផង ។ ជាមួយនឹងការយល់ឃើញបែបនេះ លោកសឺន បាននិយាយថា ប៉ុន្មានខែមុននេះ លោកធ្លាប់លក់សាកល្បងអស់ជាច្រើនគីឡូដែរ ដោយ១គីឡូក្រាមលក់បានតម្លៃជិត២ម៉ឺនរៀល ថ្លៃជាងសត្វគ្រូច ហើយសម្បូរទីផ្សារទៀតផង ។ (សម្រួលដោយ៖ ស្រីណា)
ចែករំលែកព័តមាននេះ