រាជធានីភ្នំពេញ ៖ ក្មេងស្រីអាយុ៥ឆ្នាំម្នាក់ ត្រូវបានជនមានសន្ដានចិត្តអាក្រក់ម្នាក់ចាប់យកទៅធ្វើទារុណកម្មរំលោភនៅក្នុងគុម្ពោធព្រៃមួយកន្លែង ខណៈពេលដែលឪពុកម្ដាយជាប់រវល់ផឹកស៊ី នៅក្នុងពិធីខួបកំណើតកូនរបស់បងប្រុសភ្លេចខ្លួន ។ លុះក្រោយពេលនឹកឃើញដល់កូនស្រាប់តែបាត់មិនឃើញមិនដឹងជាទៅណាទើបឪពុកម្ដាយបាននាំគ្នាតាមរក និងស្រែកហៅ ពេលនោះស្រាប់តែឃើញកូនស្រីដើរចេញពីក្នុងគម្ពោធព្រៃ និងស្រែកយំខ្លាំងៗ ក្នុងស្ថានភាពភិតភ័យ និងឈឺចាប់បំផុត ។
ហេតុការណ៍នោះបានកើតឡើង កាលពីវេលាម៉ោង៩និង៣០នាទីយប់ ថ្ងៃទី០១ ខែមិថុនា ឆ្នាំ២០១៩ នៅក្នុងគុម្ពោតព្រៃស្ថិតនៅសង្កាត់រលួស រាជធានីភ្នំពេញ ។ ជនស្ទាវខាងលើមានឈ្មោះ ចេង ណុប អាយុ២១ឆ្នាំ មុខរបរមិនពិតប្រាកដ ស្នាក់នៅជាមួយយាយ នៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
បន្ទាប់ពីរកឃើញឪពុកម្ដាយក៏សួរនាំពីមូលហេតុដែលនាងយំ ទើបដឹងថា នាងត្រូវជនស្ទាវអន្ធពាលខាងលើចាប់ឲ្យបៀមប្រដាប់ភេទ និរំលោភនៅក្នុងគម្ពោធព្រៃ ដែលនាងរត់ចេញមកនោះ ។ ចំណែកក្មេងស្រីរងគ្រោះមានអាយុ៥ឆ្នាំ បានរងរបួសជាំប្រដាប់ភេទ ជាំភ្លៅស្ដាំ២កន្លែង និងឆ្អឹងជំនីខាងឆ្វេង២កន្លែង ដោយជននោះធ្វើទារុណកម្មក្ដិចមួល មិនឲ្យស្រែកពេលចាប់រំលោភ ។
មន្ត្រីនគរបាលខណ្ឌដង្កោបានឲ្យដឹងថា នៅវេលាយប់ថ្ងៃកើតហេតុខាងលើ អ៊ុំប្រុសបង្កើតរបស់ក្មេងស្រីរងគ្រោះ ដែលមានផ្ទះជាប់របងគ្នាបានធ្វើពិធីខួបកំណើតឲ្យកូន និងបានអញ្ជើញឪពុកម្ដាយរបស់នាងឲ្យទៅចូលរួមសប្បាយ និងហូបចុកអាហារដែលបានរៀបចំនៅក្នុងពិធីនោះ ។ លុះដល់ពេលកម្មវិធីចាប់ផ្ដើមនាងត្រូវបានឪពុកម្ដាយយកទៅជាមួយដែរ ហើយខណៈនោះដោយអាងថា ផ្ទះកម្មវិធី និងផ្ទះរបស់ខ្លួន ស្ថិតនៅជាប់គ្នាហើយនោះនឹកឃើញថា មិនមានរឿងអ្វីកើតឡើងទេ ។ ទើបឪពុកម្ដាយហាក់មានការធ្វេសប្រហែសបន្តិចដោយសប្បាយភ្លេចខ្លួនមិនបានមើលកូនស្រី ឬហៅនាងឲ្យនៅក្បែរខ្លួននោះឡើយ ។
ប្រភពដដែលបានបន្តថា ពេលនោះជនសង្ស័យបានចាប់កូនស្រីនាំយកទៅក្នុងគម្ពោធព្រៃឆ្ងាយពីផ្ទះបន្តិច រួចធ្វើទារុណកម្មដោយក្ដិចមួលនាងមិនឲ្យស្រែក និងបង្ខំឲ្យនាងបៀមប្រដាប់ភេទ ព្រមទាំងរំលោភសេពសន្ថវៈ ដែលជាហេតុធ្វើឲ្យនាងតូចមានការឈឺចាប់ស្រែកយំខ្លាំងៗ ប៉ុន្តែពេលនោះពុំមាននរណាបានដឹងឡើយ ។ ចំណែកឪពុកម្ដាយក្រោយពីសប្បាយរីករាយមួយសន្ទុះទើបនឹកឃើញដល់កូនស្រី ស្រាប់តែបាត់មិនឃើញនាងក៏បាននាំគ្នាតាមរកស្រាប់តែឃើញកូនស្រីរត់ចេញពីក្នុងគម្ពោធព្រៃ និងស្រែកយំខ្លាំងថែមទៀតផង ។ បន្ទាប់មកពួកគាត់ក៏បានសួរនាំទើបកូនស្រីប្រាប់ថា ត្រូវបានជនពាលម្នាក់នោះចាប់ឲ្យបៀមប្រដាប់ភេទ និងរំលោភ បង្កឲ្យមានការភ្ញាក់ផ្អើលទាំងយប់ រួចហើយពួកគាត់បានខលប្ដឹងនគរបាលប៉ុស្តិ៍រលួសឲ្យជួយអន្តរាគមន៍ ។
នគរបាលបានបញ្ជាក់បន្ថែមថា ក្រោយពីទទួលបានដំណឹងនោះភ្លាម លោកវរៈសេនីយ៍ឯក ជឹម ស៊ី ថា អធិការនគរបាលខណ្ឌដង្កោបានបញ្ជាកម្លាំងនគរបាលប៉ុស្តិ៍ខាងលើឲ្យចុះទៅចាប់ខ្លួនជននោះបានភ្លាមៗ រួចបាននាំទៅសាកសួរនៅប៉ុស្តិ៍ ព្រមទាំងឲ្យឪពុកម្ដាយក្មេងស្រីខាងលើទៅដាក់ពាក្យបណ្ដឹង ជាលាយលក្ខណ៍អក្សរតាមច្បាប់ ។
បន្ទាប់ពីការសាកសួរជនសង្ស័យបានសារភាពថា ខ្លួនពិតជាបានធ្វើសកម្មភាពបែបនេះមែន ប៉ុន្តែមិនទាន់បានសម្រេចនៅឡើយទេ ដោយត្រូវបានឪពុកម្ដាយនាងទៅទាន់ ខ្លួនក៏បញ្ឃប់សកម្មភាព និងលែងឲ្យនាងត្រឡប់ទៅវិញ ក្រោយមកក៏ត្រូវនគរបាលចាប់ខ្លួនតែម្ដង ។ លោកវរៈសេនីយ៍ឯក ជឹម ស៊ីថា អធិការនគរបាលខណ្ឌដង្កោបានប្រាប់ថា នេះ គឺបទល្មើសរំលោភសេពសន្ថវៈ មានស្ថានទម្ងន់ទោស ហើយក្រោយពេលចាប់ខ្លួនកម្លាំងបានសាកសួរ និងកសាងសំណុំរឿង ដើម្បីចាត់ការជននោះតាមច្បាប់ហើយ ។
ទន្ទឹមនឹងនេះដែរ លោកក៏សូមក្រើនរម្លឹកផងដែរ ដល់ឪពុកម្ដាយអាណាព្យាបាលទាំងអស់ត្រូវតែប្រុងប្រយ័ត្នមើលកូនចៅតូចៗឲ្យបានល្អ ដើម្បីចៀសវាងត្រូវជនអគតិធ្វើបាបបែបនេះ ៕ កែសម្រួលដោយ ៖ សុឃាក់
ចែករំលែកព័តមាននេះ