ប្រទេសថៃ ៖ លោកព្រេមទិនស៊ូឡាណន់ជាមនុស្សមានឥទ្ធិពលបំផុតមួយរូប នៃព្រះរាជាណាចក្រថៃ ទើបទទួលមរណភាពកាលពីថ្ងៃទី២៦ឧសភាក្នុងជន្មាយុ៩៨ឆ្នាំ។ ឧត្ដមសេនីយព្រេមទិនស៊ូឡាណន់ អតីតនាយករដ្ឋមន្ត្រីជាអ្នកក្ដាប់ល្បែងនៃអំណាចរបស់ប្រទេសថៃ។ លោកជាប្រធានទីប្រឹក្សាឯកជនរបស់ព្រះមហាក្សត្រថៃ ជាមនុស្សដែលប្ដូរផ្ដាច់ជាមួយបណ្ដាអ្នកអភិរក្សនិយមបំផុត ដោយធ្វើសកម្មភាពជាចំហឬជាសម្ងាត់ ហើយលោកក្លាយជាមនុស្សសំអប់របស់ពួកអ្នកប្រឆាំង ប្រកាន់លទ្ធិប្រជាធិបតេយ្យ ដែលមើលឃើញថាលោកជាមេខ្យល់មានឥទ្ធិពលណាស់។
កើតនៅសុងក្លានាថ្ងៃទី២៨សីហាឆ្នាំ១៩២០នៅភាគខាងត្បូងប្រទេសថៃ លោកព្រេមជាកូនប្រុសរបស់នាយកពន្ធនាគារម្នាក់ហើយចេញទៅសិក្សានៅក្រុងបាងកក ដែលនៅទីនោះលោកបានចូលក្នុងបណ្ឌិតសភាយោធាក្នុងឆ្នាំ១៩៤១។ ឆ្នាំបន្ទាប់ពីនេះលោកបានចូលរួមក្នុងយុទ្ធនាការមួយ ហៅយុទ្ធនាការភាគខាងខាងជើង ដែលសំដៅដណ្ដើមយកដែនដីសានពីមីយ៉ាន់ម៉ាដែលពេលនោះហៅភូមា ជាមួយការជួយជ្រោមជ្រែងរបស់ចក្រភពជប៉ុន។ បទពិសោធន៍ដែលលោកព្រេមទទួលបាននៅទីនោះ និងបណ្ដាទេពកោសល្យរបស់លោក នាំឲ្យឈ្មោះលោកកាន់តែល្បីល្បាញ។ តែបណ្ដាក្ដីស្រមៃវាទទីនិយមរបស់ថៃ ត្រូវជីកកប់ក្រោយសង្គ្រាមលោកលើកទី២ និងការចាញ់សង្គ្រាមរបស់ជប៉ុន។ សម្ព័ន្ធមិត្តថ្មីរបស់ថៃគឺអាមេរិក។ លោកព្រេមទិនស៊ូឡាណន់បានទៅស្នាក់នៅអាមេរិកជាច្រើនលើក ដើម្បីទទួលការបណ្ដុះបណ្ដាលខាងយោធាឲ្យកាន់តែសុក្រិត។
ក្នុងឆ្នាំ១៩៧៣លោកត្រូវបានតែងតាំងជាមេបញ្ជាការនៃយោធភូមិភាគពាយ័ព្យ ដែលមានការបះបោររបស់ពួកកុំមុយនីស្តនិងបានបង្ក្រាបពួកនោះយ៉ាងសាហាវ។ លោកព្រេមទិនស៊ូឡាណន់ក្រោយមកបានអនុវត្តយុទ្ធសាស្ត្រថ្មីមួយគឺៈ ដណ្ដើមយកជ័យជម្នះពីពួកបដិវត្តន៍ ដោយមិនចាំចាច់បង្ហូរឈាម តែដោយឆ្លើយតបចំពោះបណ្ដាបំណងប្រាថ្នាខាងសង្គមកិច្ចរបស់ប្រជាជន។ ក្នុងឆ្នាំ១៩៨០ខណៈដែលពួកបះបោរត្រូវបានក្រុងប៉េកាំងបោះបង់ចោលបន្តិចម្ដងៗ ពួកកុំមុយនីស្តភាគច្រើន បាននាំគ្នាចាកចេញពីព្រៃម៉ាគី ដោយសារច្បាប់លើកលែងទោស។
លោកព្រេមជាអ្នករៀបចំំយុទ្ធសាស្ត្រសំខាន់នៃព្រះបរមរាជវាំងថៃ ជាមនុស្សមានឥទ្ធិពលបំផុតលើនយោបាយថៃ។ លោកត្រូវបានបណ្ដាសម្ព័ន្ធមិត្តចាត់ទុកជាកម្លាំងស្ថេរភាពរបស់ពួកគេ តែពួកប្រឆាំងពុំចូលចិត្តឡើយ ដោយមើលឃើញថារូបលោកជាសត្រូវនៃលទ្ធិប្រជាធិបតេយ្យ។ លោកព្រេមជាសហការីសំខាន់បំផុត ក្នុងចំណោមសហការីសំខាន់ៗរបស់អតីតព្រះមហាក្សត្រថៃភូមីបុលអាឌុលយ៉ាដេត ហើយជាអ្នករួមចំណែក ក្នុងការពង្រឹងទំនាក់ទំនងមិនអាចខ្វះបាន រវាងព្រះបរមរាជវាំងនិងកងទ័ព។
ការស្លាប់របស់លោកព្រេមទិនស៊ូឡាណន់ ដោយសាររោគខ្សោយបេះដូង។ នេះជាការអះអាងរបស់ខុន្ទកាល័យព្រះបរមរាជវាំង តាមរយៈសេចក្ដីប្រកាសមួយ។ ក្នុងឋានៈជាប្រធានទីប្រឹក្សាឯកជនរបស់ព្រះមហាក្សត្រ លោកព្រេមជាអ្នកជួយចាត់ចែងគ្រប់គ្រងដំណាក់កាលនៃការឡើងគ្រងរាជ ក្រោយការចូលព្រះទិវង្គតនៃព្រះមហាក្សត្រភូមីបុលអាឌុលយ៉ាដេតកាលពីឆ្នាំ២០១៦។
លោកធ្លាប់ជាអ្នកគ្រប់គ្រងរាជបល្លង្កក្នងរយៈពេលខ្លីមួយ មុនពេលព្រះបុត្រាមហាវ៉ាជីរ៉ាឡុងកនឡើងគ្រងរាជ។ កាលពីថ្ងៃទី៣ឧសភាលោកបានដឹកនាំពិធីរៀបអភិសេកគួរឲ្យភ្ញាក់ផ្អើលនៃព្រះមហាក្សត្រថ្មីជាមួយព្រះមហាក្សត្រីយានីស៊ូធីដា ប៉ុន្មានថ្ងៃមុនព្រះអង្គឡើងគ្រងរាជជាផ្លួវការ៕ (កែសម្រួលដោយ ៖ បុប្ផា)
ចែករំលែកព័តមាននេះ