ខេត្តកំពង់ធំ ៖ ខណៈដល់ម៉ោងហៅហូបបាយបាត់មិនឃើញ ក៏នាំគ្នាដើររក ទើបដឹងថានាងក្រមុំម្នាក់លង់ទឹកស្រះស្លាប់បង្កការឱ្យមានការភ្ញាក់ផ្អើលកាលពីវេលាម៉ោង១១និង៣០នាទីថ្ងៃត្រង់ថ្ងៃទី ១៨ ឧសភា ២០១៩ ត្រង់ចំណុចស្រះទឹកដីស្រែរបស់ឈ្មោះ សួន ឡុញ ស្ថិតនៅតំបន់ត្រពាំងក្រឡង់ជ័យ ក្នុងឃុំនីពេជ ស្រុកកំពង់ស្វាយ ខេត្តកំពង់ធំ នៅភូមិបាគង ឃុំត្បែង ស្រុកកំពង់ស្វាយ ។
តាមប្រភពពីសមត្ថកិច្ចប្រាប់ថា ជនរងគ្រោះដែលស្លាប់ឈ្មោះ រ៉ែម សាសែម ភេទស្រី អាយុ១៦ឆ្នាំ រស់នៅភូមិឬស្សីជះ ឃុំត្បែង ស្រុកកំពង់ស្វាយ ។
តាមការបំភ្លឺពីឈ្មោះ បួន ឃឹម ភេទស្រី អាយុ៣៩ឆ្នាំ បានឲ្យដឹងថា កាលពីវេលាម៉ោង៧ព្រឹកថ្ងៃទី១៨ ឧសភា គាត់បានជួលមនុស្សចំនួន២នាក់ (ម្នាក់គឺជនរងគ្រោះ និងម្នាក់ទៀតឈ្មោះ ឈី វ៉ាន់នី ភេទស្រី ដែលអ្នកទាំង២រស់នៅភូមិឃុំជាមួយគ្នា) ដើម្បីជួយធ្វើការងាររបស់គាត់ ។
តាមប្រភពដដែលបានបន្តថា គាត់បានជួលអ្នកទាំងពីរឱ្យដើររើសគល់ឈើ និងមែកឈើនៅក្នុងដីស្រែមួយកន្លែងដែលគាត់បានជួលដីស្រែនេះពីឈ្មោះ សួន ឡុញ ដោយឲ្យពួកគេទាំង២នាក់នាំគ្នារើសគល់ឈើយកទៅពូកគរទុកនៅក្បែមាត់ស្រះទឹកទុកដុតកំទេចចោល ។
តាមប្រភពដដែលបានបន្តទៀតថា លុះដល់វេលាម៉ោងប្រហែល១១ថ្ងៃត្រង់ថ្ងៃដដែល ពួកគាត់ទាំងអស់នាំគ្នាឈប់រើស ហើយក៏រៀបចំហូបបាយជុំគ្នាដែលមានចម្ងាយពីស្រះទឹកប្រហែល២០០ម៉ែត្រ ។ ពេលជុំគ្នាហូបបាយនោះ ស្រាប់តែបាត់ជនរងគ្រោះមិនឃើញមកហូបបាយ លុះដល់ម៉ោង១១និង៣០នាទីថ្ងៃដដែល គាត់បានប្រើឲ្យឈ្មោះ ឈី វ៉ាន់នី ទៅតាមហៅជនរងគ្រោះ ស្រាប់តែឈ្មោះឈី វ៉ាន់នី ស្រែកឆោឡោប្រាប់គាត់ និងប្តីរបស់គាត់ថា ជនរងគ្រោះបានចុះងូតទឹកស្រះលង់ហើយ ។ ពេលឮដូច្នេះប្តីរបស់គាត់ក៏រត់ចុះទៅរាវរកក្នុងទឹកស្រះ រួចប្រទះឃើញជនរងគ្រោះនៅក្នុងទឹកស្រះ ហើយស្រង់ឡើងពីទឹក តែនាងបានស្លាប់បាត់ទៅហើយ រួចក៏នាំគ្នាដឹកសពជនរងគ្រោះយកមកផ្ទះ និងរាយការណ៍ប្រាប់សមត្ថកិច្ចដើម្បីឱ្យចុះមកពិនិត្យ។
ក្រោយពីទទួលបានព័ត៌មានខាងលើនេះភ្លាម កំលាំងជំនាញ និងប៉ុស្តិ៍ គ្រូពេទ្យ ព្រមទាំងអាជ្ញាធរមូលដ្ឋានបានចូលរួមពិនិត្យសព រកមិនឃើញមានស្លាកស្នាមអ្វីគួរឱ្យកត់សម្គាល់ឡើយ ក៏សន្និដ្ឋានថា ជនរងគ្រោះពិតជាស្លាប់ដោយសារលង់ទឹកស្រះប្រាកដមែន ហើយមូលហេតុ បណ្តាលមកពីឆ្លៀតពេលសំរាកហូបបាយ ជនរងគ្រោះចុះងូតទឹកស្រះតែម្នាក់ឯង ទើបលង់ស្លាប់បែបនេះ ។ ក្រោយពិនិត្យរួច សពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសាររៀបចំធ្វើបុណ្យតាមប្រពៃណី ៕
ចែករំលែកព័តមាននេះ