រូបភាពដុំភ្លើងដ៏ចំលែកមួយដែលអណ្តែតពីលើវិហារមាសនៃយេរូសាឡឹម (Dome of the Rock) បានក្លាយជាវត្ថុមួយដែលគេជឿថា ថាសហោះ(UFO)។ រឿងនេះបញ្ជាក់ថា ពិតជាមានជីវិតនៅក្រៅភព។ គេថតរូបភាពវីដេអូបាន ខណៈពេលដុំភ្លើងដែលមានពន្លឺចាំងអណ្តែតនៅពីលើវិហារយេរូសាឡឹម គឺជាទីតាំងសាសនាបុរាណរបស់ជនមូស៊្លឹម។ ភ្លើងដ៏ចំលែកនេះអណ្តែតខ្ពស់នៅលើមេឃ និងធ្លាក់ចុះទាបជាថ្មីនៅមុនពេលបាត់ពីក្រសែភ្នែក។ បាតុភូតនោះកើតឡើងកាលពីម៉ោង១រំលងអធ្រាត្រក្នុងថ្ងៃសៅរ៍ ទី២៩ មករា ហើយមានអ្នកថតរូបភាពបានយ៉ាងច្រើន។ រូបភាពវីដេអូនេះបានទទួលចំណាប់អារម្មណ៍ពីមនុស្សជាច្រើននាក់នៅលើសាកលលោក និងបង្កឱ្យកើតមានការវែកញែកដ៏ក្តៅគគុករវាងអ្នកនិយមជឿលើ UFO និងអ្នកគ្មានជំនឿ។
លោកនិក ប៉ុប អតីតអ្នកជំនាញផ្នែក UFO របស់ក្រសួងការពារប្រទេសអង់គ្លេសថ្លែងឱ្យដឹងតាមរយៈកាសែតដឹសាន់ថា ប្រសិនបើបញ្ហានេះកើតឡើងពិត រូបវីដេអូនេះជាការថតរូប UFO ដ៏ច្បាស់លាស់ ប៉ុន្តែបើសិនជាមិនពិតវាគឺជាការបំភាន់ភ្នែកដើម្បីឱ្យមនុស្សជឿជាក់ថា UFO មានយ៉ាងពិតប្រាកដ។ លោកប៉ុបបញ្ជាក់ថា លក្ខណៈនៃការឡើងខ្ពស់លើលំហអាកាសយ៉ាងឆាប់រហ័សនៃដុំភ្លើងនេះបង្ហាញឱ្យឃើញថា ជាវត្ថុគ្មានមនុស្សបញ្ជានៅខាងក្នុង។
យើងដឹងថា កងទ័ពអ៊ីស្រាអែលមានយន្តហោះប្រភេទគ្មានមនុស្សបើកបរដ៏ទំនើប ប្រសិនបើរឿងនេះជាផ្នែកមួយនៅ ក្នុងនោះប្រហែលជាបច្ចេកវិទ្យាដ៏ទាន់សម័យមួយរបស់មនុស្ស ៕
ចែករំលែកព័តមាននេះ