ខេត្តកំពង់ឆ្នាំង ៖ «ទឹកធ្លាក់ស្រែអំពិល» គឺជារមណីយដ្ឋានមួយដែលត្រូវបានរៀបចំឡើងដោយសហគមន៍នៅក្នុងតំបន់ ក្រោមកិច្ចផ្តួចផ្តើមពីអាជ្ញាធរស្រុកនិងខេត្ត បច្ចុប្បន្នបានដំណើរការប្រមាណជាង80%ហើយ ដោយមានភ្ញៀវទេសចរទៅលេងកំសាន្តមិនលោះថ្ងៃនោះដែរ ។ ជាមួយគ្នានេះ អាជ្ញាធរឃុំក៏ដូចជាសហគមន៍បានអំពាវនាវដល់ប្រជាពលរដ្ឋទៅលេងព្រោះថា ទីនោះមានទឹកជ្រោះ និងព្រៃភ្នំយ៉ាងស្រស់ស្អាត ស្ថិតក្នុងភូមិស្រែអំពិល ឃុំក្តុលសែនជ័យ ស្រុកទឹកផុស ។
លោក ម៉ឹង វិសាលសុខ មេឃុំក្តុលសែនជ័យបានឲ្យដឹងថា បច្ចុប្បន្នរមណីយដ្ឋានទឹកធ្លាក់ស្រែអំពិល ត្រូវបានរៀបចំប្រមាណជាង៨០%ហើយ ដោយបានធ្វើផ្លូវចូលចាប់ពីថ្នល់រថភ្លើង មកតំបន់ទឹកធ្លាក់ ដើម្បីសម្រួលការធ្វើដំណើររបស់ភ្ញៀវ ។ សហគមន៍បានរៀបចំក្យូស សម្រាប់អង្គុយលេងច្រើនកន្លែង មានរៀបចំផ្សារមួយកន្លែង ដែលមានបណ្ដោយជាង២០ម៉ែត្រ សម្រាប់អោយប្រជាពលរដ្ឋលក់ដូរ និងបានកសាងស្ពានតូចៗសម្រាប់ឆ្លងអូរ បានជាច្រើនកន្លែង ។
លោកមេឃុំបានបញ្ជាក់ថា បច្ចុប្បន្នភ្ញៀវទេសចរមកលេងច្រើននៅថ្ងៃសៅរ៍-អាទិត្យ និងថ្ងៃបុណ្យទាន ចំណែកក្រៅពីថ្ងៃនោះ ក៏នៅមានមកលេងដែរតែតិចតួច ។ សម្រាប់ភ្ញៀវទេសចរទៅលេងកំសាន្ត ដែលបានអង្គុយតាមក្យូស គឺនៅមិនទាន់យកប្រាក់នៅឡើយទេ ព្រោះយើងទើបតែដំណើរការ ហើយចំពោះការចូលទៅលេងកម្សាន្តក៏ដូចគ្នាដែរ គឺមិនយកប្រាក់ រួមទាំងថ្លៃចតរថយន្តផងដែរ ប៉ុន្តែលើកលែងតែម៉ូតូដែលមានអ្នកយាម ទើបយកប្រាក់ខ្លះ។
ចុងក្រោយក្នុងនាមលោកជាអាជ្ញាធរឃុំ ជំនួសមុខអោយសហគមន៍ ទឹកធ្លាក់ស្រែអំពិល លោក សូមអំពាវនាវ ដល់បងប្អូនប្រជាពលរដ្ឋក្នុងស្រុកនិងក្រៅស្រុក សូមអញ្ជើញមកលេងកំសាន្តនៅទឹកធ្លាក់ស្រែអំពិលដែលជារមណីយដ្ឋានមានទឹកធ្លាក់ដ៏ស្អាត ព្រមទាំងមានសុវត្ថិភាព ជាងនេះទៅទៀតក៏មានព្រៃព្រឹក្សា មានភ្នំក្រំថ្ម សម្រាប់ទស្សនាកំសាន្តទៀត។
រមណីយដ្ឋានទឹកធ្លាក់ស្រែអំពិល ស្ថិតតាមផ្លូវជាតិលេខ៥ ចេញពីទីរួមខេត្តកំពង់ឆ្នាំង ប្រមាណជាង៣០គីឡូម៉ែត្រ ទៅដល់ជាប់របងវត្តវត្តផ្សារ ជិតផ្សារបរិបូណ៌ បត់ឆ្វេងចូលតាមផ្លូវលំជាង៣០គីឡូម៉ែត្រទៀត ទៅដល់ផ្សារក្តុល ហើយបត់ឡើងឆ្លងថ្នល់រថភ្លើង តាមផ្លូវធ្វើថ្មីចម្ងាយ១២គីឡូម៉ែត្រ ។
ចែករំលែកព័តមាននេះ