ខេត្តកំពង់ស្ពឺ ៖ មនុស្សជាង១០នាក់ ត្រូវបានសមត្ថកិច្ចបញ្ជូនទៅសង្គ្រោះបន្ទាន់ បន្ទាប់ពីជួបហេតុការណ៍គ្រោះថ្នាក់រថយន្តដឹកទំនិញរេចង្កូតមកបុករថយន្តរបស់ជនរងគ្រោះ ដែលកំពុងធ្វើដំណើរទៅចូលរួមមង្គលការបងប្អូននៅម្តុំភ្នំប្រសិទ្ធិ៍ ស្រុកពញាឮ ខេត្តកណ្តាល ។ គ្រោះថ្នាក់នេះ កើតឡើងកាលពីវេលាម៉ោង១និង៤០នាទីរសៀលថៃ្ងទី១១ ខែឧសភា នៅផ្លូវជាតិលេខ៥១ ចន្លោះគីឡូម៉ែត្រលេខ២និងលេខ៣ ក្នុងភូមិស្រះកែវ ឃុំវាំងចាស់ ស្រុកឧដុង្គ ។
រថយន្តដឹកទំនិញម៉ាកហុីយ៉ាន់ដាយ ប្រភេទភ្លៅ២ ពណ៌ស ពាក់ផ្លាកភ្នំពេញ ៣D-១៨២០ បានបុកជាមួយរថយន្តសាំយ៉ុង ពណ៌លឿង ពាក់ផ្លាក ភ្នំពេញ ២Y-៧៣៩៤ បើកបរដោយឈ្មោះ សេង ហៀង ភេទប្រុស អាយុ៥៤ឆ្នាំ នៅភូមិព្រែកប្រសព្វ ឃុំព្រះប្រសព្វ ស្រុកព្រែកប្រសព្វ ខេត្តក្រចេះ ។ ប្រភពពីមន្ត្រីមានសមត្ថកិច្ចបានស្រង់សម្តីសាក្សីឲ្យដឹងថា រថយន្តដឹកទំនិញបើកបរក្នុងទិសដៅពីខាងត្បូងទៅខាងជើង លុះមកដល់ចំណុចខាងលើ ស្រាប់តែរេចង្កូតទៅបុករថយន្តសាំយ៉ុងែលធ្វើដំណើរបញ្ច្រាសទិសគ្នាពេញទំហឹង បណ្ដាលឲ្យអ្នកដំណើរក្នុងរថយន្ដសាំយ៉ុង រងរបួសធ្ងន់ និងស្រាលជាច្រើននាក់ ។
លោកវសេនីយ៍ឯក ខឹម សាម៉ុន អធិការនគរបាលស្រុកឧដុង្គ បញ្ជាក់ថា គ្រោះថ្នាក់នេះគឺមកពីអ្នកបេីកបររថយន្តហុីយ៉ាន់ដាយបាត់ម្ចាស់ការ ដោយសាររថយន្តបែកកង់ ។ ក្រោយកើតហេតុ អ្នកបេីកបររថយន្តដឹកទំនិញបានចុះរត់គេចខ្លួនបាត់ ។ ឯអ្នកដំណើរដែលរងរបួសជិះក្នុងរថយន្ដសាំយ៉ុងទាំង១១នាក់ ត្រូវបានសមត្ថកិច្ចហៅរថយន្តសង្គ្រោះបន្ទាន់ ដឹកបញ្ជូនទៅកាន់មន្ទីរពេទ្យបង្អែកស្រុកឧដុង្គ និងបន្តទៅរាជធានីភ្នំពេញទៀត ។
អ្នកជិះរថយន្តសាំយ៉ុងដែលរងរបួសស្រាល បានប្រាប់សមត្ថកិច្ចថា ពួកគាត់ទាំងអស់គ្នាធ្វើដំណើរពីខេត្ត ក្រចេះមកម្តុំភ្នំប្រសិទ្ធិ៍ ក្នុងគោលបំណងចូលរួមមង្គលការបងប្អូន លុះមកដល់ចំណុចខាងលើក៏ជួបហេតុការណ៍អាក្រក់បែបនេះតែម្តង ។ លោកអធិការបញ្ជាក់ថា អ្នករងរបួសទាំង
អស់រួមមាន ៖
១-អ្នកបើកបរឈ្មោះ សេង ហៀង របួសធ្ងន់ ២-ឈ្មោះ លាង លក្ខិណា ភេទស្រី អាយុ៣៥ ឆ្នាំ របួសធ្ងន់ ៣-ឈ្មោះ អេង វុឌ្ឍី ភេទស្រី អាយុ៥១ឆ្នាំ របួសធ្ងន់ ៤-ឈ្មោះ នៀន ហ្គេចនីភេទស្រី អាយុ៦២ឆ្នាំ របួសធ្ងន់ ៥-ឈ្មោះ សួន គីមអាន ភេទស្រី អាយុ៦៤ឆ្នាំ របួសធ្ងន់ ៦-ឈ្មោះ អេង ពៅ ភេទស្រី អាយុ៤៩ឆ្នាំ របួសធ្ងន់ ៧-ឈ្មោះ ឡោ គីមឆេង ភេទប្រុស អាយុ១៧ឆ្នាំ របួសស្រាល ៨-ឈ្មោះ សុង គឹមយិន ភេទស្រី អាយុ៣៩ឆ្នាំ របួសស្រាល ៩-ឈ្មោះ ភន គីមនៀង ភេទស្រី អាយុ៤២ឆ្នាំ របួសស្រាល ១០-ឈ្មោះ អេង ចិន្ដា ភេទប្រុស អាយុ៥៣ឆ្នាំ របួសស្រាល និង១១-ឈ្មោះ អេង វណ្ណា ភេទប្រុស អាយុ៥៦ឆ្នាំ របួសស្រាល) ។ ទាំងអស់គ្នា មានទីលំនៅក្នុងភូមិព្រែកប្រសព្វ ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។
រថយន្តទាំង២គ្រឿង ត្រូវបាននគរបាលចរាចរណ៍ស្ទូចយកទៅរក្សាទុកនៅអធិការដ្ឋាននគរបាលស្រុកឧដុង្គ និងកសាងសំណុំរឿងបញ្ជូនទៅ ការិយាល័យនគរបាលចរាចរណ៍ខេត្ដ ព្រមទាំងស្រាវជ្រាវរកអ្នកបេីកបររថយន្ដដឹកទំនិញ ដេីម្បីចាត់ការតាមនីតិវិធីច្បាប់ ។ រហូតមកដល់ព្រឹកថ្ងៃទី១២ ខែឧសភា ពុំមានជនរងគ្រោះណាម្នាក់់់់់់់ក្នុងហេតុការណ៍នេះ ស្លាប់បាត់បង់ជីវិតដូចពាក្យចចាមអារ៉ាមនោះទេ ៕
ចែករំលែកព័តមាននេះ