រាជធានីភ្នំពេញ ៖ សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃអះអាងថា បើនៅកម្ពុជាមានរឹតត្បិតការគោរពសាសនានោះមិនអាចបង្រួបបង្រួម និងផ្សះផ្សារជាតិបានឡើយ ។…
រាជធានីភ្នំពេញ ៖ សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃអះអាងថា បើនៅកម្ពុជាមានរឹតត្បិតការគោរពសាសនានោះមិនអាចបង្រួបបង្រួម និងផ្សះផ្សារជាតិបានឡើយ ។ សម្តេចបានលើកឡើងថា នៅសម័យប៉ុត ពត ទោះបីមានការរឹតត្បិត ក៏ប៉ុល ពត មិនអាចប្រឆាំងនឹងជំនឿរបស់ប្រជាពលរដ្ឋបានទេ ។
សម្តេចស ខេង បានលើកឡើងក្នុងពិធីបញ្ចុះខណ្ឌសីមាព្រះវិហារថ្មី និងសម្ពោធសមិទ្ធផលនានា ក្នុងវត្តបុញ្ញខេត្តនារាម ហៅវត្តអន្លង់តាម៉ុក ខេត្តបាត់ដំបងកាល ពីថ្ងៃទី១១ ខែឧសភាថា ក្រោមការដឹកនាំដ៏ត្រឹមត្រូវរបស់គណប ក្សប្រជាជនកម្ពុជាក៏ដូចជា រដ្ឋាភិបាលសាធារណរដ្ឋ ប្រជាមានិតកម្ពុជាក៏ដូចជា រដ្ឋកម្ពុជា និងបច្ចុប្បន្ននេះរាជរដ្ឋាភិបាលដែលកើតចេញពីគណប ក្សប្រជាជនកម្ពុជាបានចាត់ទុកវិស័យសាសនាជាវិស័យសំខាន់មួយ ។ សម្តេចបន្តថា«យើងមិនអាចលើករំលងលើកវិស័យសាសនាឡើយរហូតដល់ចែង ក្នុងរដ្ឋធម្មនុញ្ញថា ព្រះពុទ្ធសាសនាជាសាសនារបស់រដ្ឋ ។
ការចែងបែបនេះក្នុងន័យរក្សាឬគោរពទៅតាមឆន្ទៈរបស់ប្រជាពលរដ្ឋ ។ ពលរដ្ឋ៩០%គោរពព្រះពុទ្ធសាសនា ។ អីញ្ចឹងទេ ដើម្បីតាមការចង់បានរបស់ពលរដ្ឋ ហើយម្យ៉ាងតាមប្រវត្តិសាស្ត្រដែលបំផ្លិចបំផ្លាញផងនោះ ហើយក្នុងគោលបំណងឲ្យវិស័យសាសនានេះ ស្ថិតស្ថេរទើប យើងចែងក្នុងរដ្ឋធម្មនុញ្ញ» ។ យ៉ាងណាក្តីសម្តេចក៏បានបញ្ជាក់ថា ការចែងដាក់ព្រះពុទ្ធសាសនាក្នុងរដ្ឋធម្មនុញ្ញមិនមែនថា កម្ពុជាមានតែព្រះពុទ្ធសាសនានោះទេ ។ តាមការជាក់ស្តែងនៅកម្ពុជាមានសាសនាដទៃច្រើនទៀតដែរ ព្រោះថា នៅរដ្ឋធម្មនុញ្ញក៏បានចែងឲ្យពលរដ្ឋមានសិទ្ធិសេរីភាពក្នុងការជ្រើសរើសជំនឿ និងសាសនា ដែលខ្លួនគិតថាល្អ និងត្រឹមត្រូវ ។
សម្តេចបញ្ជាក់ថា«នៅកម្ពុជាយើងមានព្រះពុទ្ធសាសនាផង ឥស្លាមសាសនាផង មានគ្រឹះសាសនា ហើយអាចមានសាសនាតូចៗផ្សេងៗទៀត ។ នេះ គឺជាគោលនយោបាយរបស់គណបក្សប្រជាជនផង និងជារបស់រាជរដ្ឋាភិបាលនៅពេលបច្ចុប្បន្នផង» ។ សម្តេចក៏បានសង្កត់ធ្ងន់យ៉ាងដូច្នេះថា «ប្រសិនបើមានកាបែងចែកសាសនានៅកម្ពុជានោះនឹងនាំឲ្យមានបញ្ហាត្រង់ថា ការផ្សះផ្សារបង្រួមបង្រួមជាតិ គឺចង់ឲ្យមានភាពសុខដុមរមនានៅក្នុងផ្ទៃក្នុងជាតិរបស់យើងតែមួយ ។
ដូច្នេះបានជាយើងអនុញ្ញាតមានការគោរពសាសនាតាមសិទ្ធិសេរី ព្រោះថា សាសនាទាំងអស់មិនអប់រំឲ្យមនុស្សខិលខូចនោះទេ ។ គឺតែងតែអប់រំមនុស្សឲ្យធ្វើអំពើល្អ និងជាអំពើកុសល» ៕
ចែករំលែកព័តមាននេះ