រាជធានីភ្នំពេញ ៖ អាកាសយានដ្ឋានអន្តរជាតិតារាសាគរ ខេត្តកោះកុង គ្រោងដាក់ឲ្យដំណើរសាកល្បងនៅពាក់កណ្តាលឆ្នាំ២០២០ ស្របពេលនឹងមានសាងសង់កំពង់ផែអន្តរជាតិថ្មីមួយទៀតស្ថិត ក្នុងគម្រោងតារាសាគរដែលមានទុនវិនិយោគ៣,៨ ពាន់ដុល្លារអាមេរិក ខណៈតំបន់ទេសចរណ៍តារាសាគរនេះរំពឹងថា នឹងមានភ្ញៀវអន្តរជាតិជាច្រើនទៅកាន់ទៅតំបន់នេះ ហើយនឹងអាចប្រែខ្លួនជាតំបន់ពាណិជ្ជកម្មចំរុះ។
យ៉ាងណាមិញ កន្លងមកសហរដ្ឋអាមេរិកដែលមានលោក Mike Pence ដែលជាអនុ ប្រធានាធិបតី បានធ្វើការចោទប្រកាន់និងបានរិះគន់ថាតំបន់អភិវឌ្ឍន៍តារាសាគរ របស់វិនិយោគិនចិន ដូចជាការកសាងហេដ្ឋារចនាសម្ព័ន្ធផ្លូវ នៅក្នុងខេត្តជាប់មាត់សមុទ្រនេះ រួមទាំងព្រលានយន្តហោះនេះ ត្រូវបានគេថាអាចបម្រើបានទាំងផ្នែកយោធា និងទាំងផ្នែកស៊ីវិល ។ ហើយវាជាទីតាំងមួយដែលប្រទេសចិននឹងប្រើប្រាស់ទីតាំងកងទ័ពចិន ដែលការចោទប្រកាន់របស់មហាអំណាចមួយនេះ ត្រូវបានប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន ធ្វើការច្រានចោលជាច្រើនដង ហើយសម្តេចតេជោចាត់ទុកការចោទប្រកាន់នោះជារឿងអយុត្តិធម៌បំផុតសម្រាប់កម្ពុជា។
ពាក់ព័ន្ធនឹងការអភិវឌ្ឍន៍នេះផងដែរ លោកឧបនាយករដ្ឋមន្ត្រី ហោ ណាំហុង បានធ្វើដំណើរទស្សនៈកិច្ចនៅទីក្រុងតារាសាគរ ក្នុងទឹកដីខេត្តកោះកុង កាលដើមសប្តាហ៍នេះ បានថ្លែងឲ្យដឹងថា ទីក្រុងនេះមិនសម្រាប់តែវិស័យវិស័យទេសចរណ៍ទេ ប៉ុន្តែសម្រាប់វិស័យសំខាន់ៗជាច្រើន ដែលមានដូចជាអាកាសយានថ្មី ដែលគ្រោងនិងដាក់ឲ្យដំណើរនៅពាក់កណ្តាលឆ្នាំ ២០២០ នាពេលខាងមុខដែលអាចនឹងនាំមកនូវភ្លៀវទេសចរណ៍កាន់តែច្រើនមកកម្ពុជា។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍បន្តថា «ជាមួយនេះក៏មានកំពង់ផែទឹកជ្រៅ ដែលនាវាអាចផ្ទុកទំនិញ១០ម៉ឺនតោននៅតំបន់តារាសាគរ និងជាកំពង់ផែអន្តរជាតិសំខាន់មួយ បន្ទាប់ពីកំពង់ផែសឹង្ហបុរី »។ លោក បានបន្តថា ដោយសារកន្លងមកនេះ មាននាវាជាច្រើនដឹកភ្ញៀវទេសចររាប់ពាន់នាក់ចូលនៅកំពុងផែខេត្តព្រះសីហនុ ដូច្នេះការសាងសង់កំពង់ថ្មីនេះនឹងជួយទាក់ទាញភ្ញៀវទេសចបន្ថែមទៀត ។ ចំណែកលោក Li Tao ប្រធានក្រុម ប្រឹក្សាភិបាលក្រុមហ៊ុនយូញៀនគ្រុប (Union Group) បានថ្លែងថា រហូតដល់ពេលនេះអាកាសយានដ្ឋានអន្តរជាតិតារាសាគរ សាងសង់បាន៦០ភាគរយ និងជាប្រភេទ 4E ដែលគ្រោងនឹងបញ្ចប់ការសាងសង់ និងដាក់ដំណើរការសាកល្បងនៅខែ ឧសភា ឆ្នាំ ២០២០ខាងមុខ ដោយមានលទ្ធភាពទទួលអ្នកដំណើរបានពី៤ ទៅ៥លាននាក់ក្នុងមួយឆ្នាំ។ លោក Li Tao បានបន្ថែមថា «ដោយឡែកកំពង់ផែទឹកជ្រៅ ក្រុមហ៊ុនកំពុងរចនាផែនការ និងឈួសឆាយដីធ្លីលើផ្ទៃដី២០គីឡូម៉ែត្រការ៉េ ហើយនៅពេលបញ្ចប់ផែនការរចនានឹងបន្តសាងសង់ជាបន្តបន្ទាប់ទៀត ដោយមានមូលដ្ឋានដឹកជញ្ជួន ទីតាំងឧស្សាហកម្ម និងមូលដ្ឋានសម្រាប់មជ្ឍមណ្ឌលហិរញ្ញវត្ថុ»។
លោកវ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនបានឲ្យដឹងកាលពីពេលថ្មីៗនេះថា ការតភ្ជាប់ផ្លូវពីស្រុកសំឡូតមកកាន់ខេត្តកោះកុង មិនត្រឹមតែជាការធ្វើសមាហរណកម្មផ្ទៃក្នុងកម្ពុជាប៉ុណ្ណោះទេ តែជាការលើកកំពស់វិស័យសេដ្ឋកិច្ចពាណិជ្ជកម្មកម្ពុជា តាមរយៈការកាត់បន្ថយការពឹងផ្អែកប្រទេសជិតខាង ដោយប្រើប្រាស់ផ្លូវនេះសំរាប់ដឹកជញ្ជូនកសិផលពីភូមិភាគពាយ័ព្យ មកកាន់កំពង់ផែទឹកជ្រៅនៅក្នុងខេត្តនេះ ហើយបន្តដឹកទៅកាន់ប្រទេសចិន និងបណ្តាប្រទេសមួយចំនួន
ទៀត។ លោកបានបន្តថា «នេះការវិនិយោគដ៏ត្រឹមត្រូវរបស់រដ្ឋាភិបាល ដើម្បីជំរុញកំនើន សេដ្ឋកិច្ច ព្រោះដើម្បីសេដ្ឋកិច្ចរីកចម្រើនបន្ថែមទៀត រដ្ឋាភិបាលត្រូវវិនិយោគលើហេដ្ឋារចនាសម្ព័ន្ឋជាចាំបាច់» ។
សូមបញ្ជាក់ថា សម្តេច ហ៊ុន សែន កាលពីថ្ងៃទី១៩ ខែវិច្ឆិកា ឆ្នាំ២០១៨ បានថ្លែងការណ៍ដោយប្រកាសបដិសេធជាថ្មីថា កម្ពុជាមិនអនុញ្ញាតឲ្យមានកងទ័ពបរទេស ណាបោះទីតាំងឈរជើងនោះទេ ។ រដ្ឋធម្មនុញ្ញរបស់កម្ពុជា បានកំណត់យ៉ាងច្បាស់ ដោយមិនអនុញ្ញាតឲ្យមានមូលដ្ឋានកងទ័ពបរទេសណាមួយ នៅលើទឹកដីរបស់ខ្លួនឡើយ។ ម្យ៉ាងទៀត កម្ពុជាក៏មិនមានមូលហេតុណាមួយ ដើម្បីឲ្យបរទេស មកបង្កើតមូលដ្ឋានទ័ពនោះដែរ។ សម្តេចតេជោ បានថ្លែងនាពេលនោះថា «ខ្ញុំសូមគូសបញ្ជាក់ជូនបងប្អូនរួមជាតិ ក៏ដូចជាមិត្ត បរទេសទាំងអស់ថា តើកម្ពុជាមានការចាត់តាំង ដើម្បីនឹង រំលោភលើរដ្ឋធម្មនុញ្ញរបស់ខ្លួនឬទ?រដ្ឋធម្មនុញ្ញរបស់កម្ពុជា ត្រូវបានហាមឃាត់ជាមួយវត្តមានកងទ័ពបរទេស ឬ មូលដ្ឋានយោធាបរទេសនៅក្នុងទឹកដីរបស់ខ្លួន ហើយកងទ័ពរបស់ខ្លួន ក៏ត្រូវបានហាមឃាត់មិនឲ្យចូលរួមនៅក្នុង ប្រតិបត្តិការជាមួយប្រទេសណាទាំងអស់ លើកលែងតែ ក្រោមឆត្ររបស់អង្គការសហប្រជាជាតិ ដូចដែលយើង កំពុងស្ថិតនៅប្រទេសលីបង់ស៊ូដង់ ស៊ូដង់ខាងត្បូង ម៉ាលី អាហ្វ្រិកកណ្តាល ។
នេះជាចំណុចមួយ ដែលសុំបញ្ជាក់ទៅកាន់សាធារណជន ទៅកាន់មិត្តភក្តិបរទេស ហើយខ្ញុំក៏នឹងឆ្លើយលិខិតរបស់អនុប្រធានាធិបតីអាមេរិក ដើម្បី បញ្ជាក់អំពីជំហររបស់កម្ពុជាទាក់ទងទៅនឹងរដ្ឋធម្មនុញ្ញ របស់ខ្លួន ដែលហាមឃាត់នូវវត្តមានមូលដ្ឋានកងទ័ពបរទេសនៅក្នុងប្រទេសកម្ពុជា មិនថាជើងគោកជើងទឹក ឬជើងអាកាសនោះទេ» ៕
ចែករំលែកព័តមាននេះ