ខេត្តបន្ទាយមានជ័យ ៖ ស្ត្រីម្នាក់ខណៈដើរជីកទំពាំងក្បែរបន្ទាត់ព្រំដែន បានជាន់មីនបណ្តាលឱ្យផ្ទុះដាច់ជើងស្តាំ កាលពីវេលាម៉ោងប្រមាណ៣និង៣០នាទីរសៀលថ្ងៃទី១ ខែឧសភា ស្ថិតក្នុងភូមិតាម៉ាំង ឃុំគោករមៀត ស្រុកថ្មពួក ។
ស្ត្រីរងគ្រោះឈ្មោះ ស្តុក ស្រីពៅ អាយុ៣៣ឆ្នាំ រស់នៅក្នុងភូមិ ឃុំ ខាងលើ ។ តាមអាជ្ញាធរមូលដ្ឋានឱ្យដឹងថា ក្រោយពេលឮស្នូរគ្រាប់មីនផ្ទុះ អ្នកជិតខាងនិងសាច់ញាតិបានរត់ទៅដល់ ឃើញស្ត្រីរងគ្រោះដេកដួលទៅហើយ និងបានដឹកយកទៅសង្គ្រោះនៅមន្ទីរពេទ្យមិត្តភាពកម្ពុជា-ជប៉ុន មង្គលបុរី ។
អាជ្ញាធរបញ្ជាក់ថា តំបន់ដែលស្ត្រីរងគ្រោះជាន់មីននេះ ពលរដ្ឋនៅក្នុងភូមិបានចូលទៅរកជីកទំពាំងនិងរកបន្លែជាញឹបញាប់ តែមិនដែលកើតមានគ្រោះថ្នាក់ទេ ហេតុនេះហើយទើបអ្នកភូមិចេះតែហ៊ានចូលទៅ ។
មន្ត្រីអង្គភាពកម្ចាត់មីនបញ្ជាក់ថា តំបន់ដែលប្រជាពលរដ្ឋរងគ្រោះដោយសារគ្រាប់មីននេះ គឺជាតំបន់ហាមឃាត់ដែលអង្គភាពកម្ចាត់មីនបានដាក់សញ្ញាក្បាលខ្មោចហាមមិនឱ្យចូលទេ ព្រោះមិនទាន់បានបោសសម្អាតមីនដែលសេសសល់ពីសម័យសង្គ្រាម ៕
ចែករំលែកព័តមាននេះ