ខេត្តសៀមរាប ៖ រថយន្តកែច្នៃដឹកដីពេញបម្រុងដាក់លេខទៅមុខបែរជាច្រឡំដាក់លេខថយក្រោយកិនក្មេងប្រុស-ស្រីស្លាប់១ របួសស្រាល២ ខណៈម៉ូតូកំពុងឈប់ រួចចុះគេចខ្លួនបាត់បន្សល់ទុកនៅវត្ថុតាងបង្កឱ្យមានការភ្ញាក់ផ្អើលពេញភូមិ ។ ដែលហេតុការណ៍គ្រោះថ្នាក់ចរាចរណ៍នោះបានកើតឡើងនៅវេលាម៉ោង៩និង៣០នាទី ថ្ងៃទី០១ ខែឧសភា…
ខេត្តសៀមរាប ៖ រថយន្តកែច្នៃដឹកដីពេញបម្រុងដាក់លេខទៅមុខបែរជាច្រឡំដាក់លេខថយក្រោយកិនក្មេងប្រុស-ស្រីស្លាប់១ របួសស្រាល២ ខណៈម៉ូតូកំពុងឈប់ រួចចុះគេចខ្លួនបាត់បន្សល់ទុកនៅវត្ថុតាងបង្កឱ្យមានការភ្ញាក់ផ្អើលពេញភូមិ ។ ដែលហេតុការណ៍គ្រោះថ្នាក់ចរាចរណ៍នោះបានកើតឡើងនៅវេលាម៉ោង៩និង៣០នាទី ថ្ងៃទី០១ ខែឧសភា ឆ្នាំ២០១៩ នៅចំណុចលើផ្លូវលំក្រាលគ្រួសក្រហម ក្នុងភូមិស្នួល ឃុំស្នួល ស្រុកក្រឡាញ់ ខេត្តសៀមរាប ។
លោកវរសេនីយ៍ឯកជី បេងជន អធិការស្រុកក្រឡាញ់បានប្រាប់នៅវេលាម៉ោង២និង៣០នាទីថ្ងៃទី២ ខែឧសភា ឆ្នាំ២០១៩នេះថា មានករណីគ្រោះថ្នាក់ចរាចរណ៍កើតឡើងរវាងរថយន្តកែច្នៃ ពណ៌ខៀវ គ្មានផ្លាកលេខ បើកបរដោយឈ្មោះ លន់ លីន ភេទប្រុស អាយុ២៨ឆ្នាំ រស់នៅភូមិល្បើក ឃុំរោងគោ ស្រុកក្រឡាញ់ ខេត្តសៀមរាប បានបើកថយក្រោយបើកក្នុងទិសដៅពីជើងទៅត្បូង ហើយបានបុកម៉ូតូម៉ាកហុងដាឌ្រីម ពណ៌ខ្មៅ សេរីឆ្នាំ2016 ពាក់ផ្លាកលេខ ពោធិសាត់ 1F-7834 បើកបរដោយឈ្មោះយាត យ៉ា ភេទស្រី អាយុ១៣ឆ្នាំ និងអ្នកជិះជាមួយពីនាក់ទៀត ទី១-ឈ្មោះ យាត សារិកា ភេទស្រី អាយុ១៤ឆ្នាំ និងទី២-ឈ្មោះ ង៉ា វីសា ភេទប្រុស អាយុ១១ឆ្នាំ រស់នៅភូមិព្រៃគាប ឃុំរោងគោ ស្រុកក្រឡាញ់ ខេត្តសៀមរាប ជាមួយគ្នាបើកបរក្នុងទិសដៅពីត្បូងទៅជើងរួចឈប់ ។ បណ្តាលឱ្យស្លាប់ ឈ្មោះ យាត យ៉ា និងរបួសស្រាល ឈ្មោះ យាត សារិកា និងឈ្មោះ ង៉ា វីសា របួសស្រាល ។
លោកបានបញ្ជាក់ថា ពេលកើតហេតុរួចអ្នកបើកគោយន្តកែច្នៃបានចុះរត់បាត់ ។ ក្រោយមកកម្លាំងជំនាញបានចុះទៅដល់កន្លែងកើតហេតុធ្វើការត្រួតពិនិត្យ និងវាស់វែងភ្លាមៗផងដែរ ។ លោកបានបញ្ជាក់ទៀតថា ករណីគ្រោះថ្នាក់ចរាចរណ៍នោះខូចខាតម៉ូតូចំនួន១គ្រឿង និងខូចខាតគោយន្តកែច្នៃស្រាល១គ្រឿង ។
បច្ចុប្បន្នសពជនរងគ្រោះត្រូវបានកម្លាំងជំនាញនៃអធិការស្រុកបានធ្វើការប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។ ចំណែកអ្នករងរបួសកំពុងយកទៅព្យាបាលនៅមន្ទីរពេទ្យបង្អែកស្រុកក្រឡាញ់ផងដែរ ។ រីឯវត្ថុតាងទាំងពីរកម្លាំងបានយកមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ