រាជធានីភ្នំពេញ ៖ ប្រជាពលរដ្ឋទីទ័លក្រចំនួន២០គ្រួសារដែលរស់នៅក្នុងសង្កាត់ពីរ គឺសង្កាត់ពន្សាំង និងសង្កាត់ឪឡោក បានទទួលអំណោយពីអនុសាខាកាកបាទក្រហមកម្ពុជាខណ្ឌពោធិ៍សែនជ័យ ដែលបាននាំយកទៅចែកជូនដល់ដៃពួកគាត់ ដើម្បីជាការជួយរំលែកទុក្ខលំបាក ខ្វះខាតក្នុងជីវភាពគ្រួសាររបស់ពួកគាត់នៅក្នុងមូលដ្ឋានខណ្ឌពោធិ៍សែនជ័យ ។
ពិធីនោះបានប្រព្រឹត្តទៅកាលពីវេលាម៉ោង៩ព្រឹកថ្ងៃទី៦ វិច្ឆិកា ២០១៣ នៅក្នុងសង្កាត់ពន្សាំងខណ្ឌពោធិ៍សែនជ័យ រាជធានីភ្នំពេញដោយមន្ត្រីអនុសាខាកាកបាទក្រហមខាងលើ មានការដឹកនាំដោយលោកគិត សុផា ប្រធានកិត្តិយសអនុសាខាកាកបាទក្រហមខណ្ឌពោធិ៍សែនជ័យ និងជាអភិបាលខណ្ឌ, លោកហែម ដារិទ្ធិ ប្រធានអនុសាខាកាកបាទក្រហមខណ្ឌ, លោកធៀម ថា ប្រធានសាខាគយ និងរដ្ឋាករខណ្ឌ ព្រមទាំងសមាជិក សមាជិកាអនុសាខាកាកបាទក្រហមខណ្ឌ និងអាជ្ញាធរសង្កាត់ទាំង២ផងដែរ ។
អំណោយដែលត្រូវចែកជូនក្នុងមួយគ្រួសារៗទទួលបានអង្ករចំនួន២៥គីឡូក្រាម, ទឹកដោះគោ២កំប៉ុង, ស្ករស១គីឡូក្រាម, ទឹកក្រូច១កេស, ទឹកបរិសុទ្ធវីតាល់១កេស, ទឹកត្រី១យួរ, ទឹកស៊ីអ៊ីវ១យួរ, មី២កេស, សារុង១ និងថវិកាចំនួន១០ម៉ឺនរៀល ។
ចែករំលែកព័តមាននេះ