រាជធានីភ្នំពេញ៖ អតីតតារាសម្តែងថៃ នរៈពិទូ បានធ្វើឲ្យមហាជនភ្ញាក់ផ្អើលព្រោះបណ្តោយខ្លួនឲ្យលង់នឹងបញ្ហាគ្រឿងញៀន ។ ទោះជាយ៉ាងណាក្តីលោកបានព្យាយាមតាំងចិត្តកែប្រែខ្លួនឡើងវិញរហូតក្លាយជាមនុស្សថ្មីម្នាក់នាពេលនេះ ។
កាលពីពេល ថ្មីៗកន្លងមកលោកថៃ នរៈពិទូ និយាយថា «ខ្ញុំជាមនុស្សថ្មីហើយមិនជាប់វាក់វិនរឿងចាស់ជាដាច់ខាត »។ ការនិយាយបែបនេះរបស់ថៃ នរៈពិទូ ដោយសារតែលោកបានផ្តាច់ខ្លួនចេញពីសារជាតិញៀនបានទាំងស្រុង ហើយថែមទាំងបានឱកាសប្រកបមុខថ្មីប្រកបដោយភាពជឿជាក់ ។ លោកទើបតែក្លាយជាអ្នកតំណាងចែកចាយផលិតផលមួយជួយរក្សាសុខភាព និងសម្រស់តាមរយៈអ្នកមានគុណទាំង២ជួយតម្រង់ទិស ។ លើសពីនេះទៅទៀតពិទូ ត្រៀមថតភាពយន្តថ្មីក្នុងអំឡុងខែឧសភា ព្រមទាំងពិចារណាការថតកម្មវិធី ផ្សេងៗទៀតតាមសំណូមពររបស់ផលិតករ ។
ថៃ នរៈពិទូ និយាយថា«ប្រសិនបើខ្ញុំមិនដឹងកំហុស មិនអាចងាកមកផ្លូវសិល្បៈ ងាកមករកជំនួញប្រចាំថ្ងៃបានទេ ។ ធម្មតាជីវិតមានខុសមានត្រូវ បើខុសមិនកែជាកំហុសមួយដ៏ធំ ។ សូមផ្ញើសារដល់យុវជនទាំងអស់មេត្តាចៀសឆ្ងាយពីគ្រឿនញៀន ព្រោះអត់មានផ្លូវល្អនោះទេ មានតែបំផ្លាញអនាគតខ្លួនឯង ហើយឲ្យសង្គមយើងកាន់តែពិបាកប៉ុណ្ណោះ ។
ខ្ញុំមានឱកាសចូលសិល្បៈវិញដោយសារតែបានកម្លាំងចិត្តពីឪពុកម្តាយ មិត្តភក្តិ ហើយពិសេសគឺបានខាងភរិយាជួយជាទឹកចិត្ត ទើបខ្ញុំរឹងមាំអាចវិលមកការសម្តែងឡើងវិញ ហើយម្តងនេះខ្ញុំនឹងពង្រឹងស្នាដៃក្នុងសិល្បៈ ក៏ដូចជាមុខជំនួញឲ្យកាន់តែល្អគ្មានថ្ងៃវិលត្រឡប់រកដានចាស់វិញឡើយ »។
ថៃ នរៈពិទូ ជាហ្វ្រេស៊ីប៊យឆ្នាំ២០០៦ក្រោយមកបានថតរឿងភាគ២រឿង ក្នុងនោះល្បីរឿង«ពិសស្នេហ៍»ដឹកនាំដោយលោកហ្វៃ សំអាងនិងបានសម្តែងរឿងដុំជាច្រើនរឿងទៀតមុនពេលបាត់មុខ ៕
ចែករំលែកព័តមាននេះ