ខេត្តកំពង់ចាម ៖ វត្តភ្នំហាន់ជ័យមានទីតាំងអំណោយផលល្អនៅលើកំពូលភ្នំ ប្របតាមដងទន្លេមេគង្គ ក្នុងឃុំហាន់ជ័យ ស្រុកកំពង់សៀម ។ វត្តនេះមានបារមីពូកែសក្តិសិទ្ធិ សូម្បីតែយន្តហោះធ្លាប់ទម្លាក់គ្រាប់បែកប៉ងកម្ទេចចោលក៏មិនខ្ទេចដែរ ។…
ខេត្តកំពង់ចាម ៖ វត្តភ្នំហាន់ជ័យមានទីតាំងអំណោយផលល្អនៅលើកំពូលភ្នំ ប្របតាមដងទន្លេមេគង្គ ក្នុងឃុំហាន់ជ័យ ស្រុកកំពង់សៀម ។ វត្តនេះមានបារមីពូកែសក្តិសិទ្ធិ សូម្បីតែយន្តហោះធ្លាប់ទម្លាក់គ្រាប់បែកប៉ងកម្ទេចចោលក៏មិនខ្ទេចដែរ ។ សព្វថ្ងៃនេះប្រជាពលដ្ឋគ្រប់ស្រទាប់វណ្ណៈ ពីគ្រប់ទិសទីតែងទៅបែបន់បួងសួងសុំសេចក្តីសុខក្នុងគ្រួសារ និងប្រាថ្នាប៉ងអ្វីមួយគឺបានសម្រេចតាមបំណង ។
លោកម៉ន ខុន អាយុ៦០ឆ្នាំ នៅភូមិបុសពោធិ៍ ឃុំមេសជ្រៃ ស្រុកស្ទឹងត្រង់ ឲ្យដឹងកាលពីពេល ថ្មីៗកន្លងមកថា នៅព្រឹកព្រលឹម ស្រាងៗគាត់ និងប្រពន្ធបានជិះម៉ូតូចេញពីផ្ទះទៅសែនផ្នូរឪពុកម្តាយនៅវត្តបឹងស្នាយ សង្កាត់សំបួរមាស ក្រុងកំពង់ចាម ធ្វើទៅតាមប្រពៃណីរាល់ឆ្នាំមិនដែលអាក់ខានម្តងណាឡើយ ។ បន្ទាប់មកមុនពេលត្រឡប់ទៅផ្ទះវិញ ក៏ចូលសម្រាកពិសាបាយនៅក្រោមរោងមួយក្នុងវត្តភ្នំហាន់ជ័យ ។
លោកម៉ន ខុន ថា កន្លងមករូបលោក និងប្រពន្ធបានយកបច្ច័យខ្លះចូលបុណ្យសម្រាប់ទុកកសាងសមិទ្ធផលនានាក្នុងទីអារាម ហើយប្រាថ្នាសុំសេចក្តីសុខ គឺបានសម្រេចមែន ហេតុដូច្នេះហើយបានជាក្រុមគ្រួសារលោកតែងតែទៅលេងវត្តភ្នំហាន់ជ័យ ។ កាលពីមុននៅក្នុងបរិវេណវត្តមិនសូវមានអ្វីប្លែកច្រើនទេ តែមកដល់សព្វថ្ងៃក្រោមការដឹកនាំរបស់ព្រះចៅអធិការវត្ត មានសមិទ្ធផលច្រើនស្ទើរពេញបរិវេណវត្តទៅហើយ។ វត្តនេះតែងតែមានមនុស្សម្នាទៅលេងរាល់ថ្ងៃមិនដាច់ទេ ។ តាមរយៈការបែបន់កន្លងមកក្រុមគ្រួសាររបស់គាត់ បានសេចក្តីសុខរហូតមក ។ ជាក់ស្តែងដំណាំស្វាយចន្ទី និងដំឡូងមី ផលដែលបានមកគឺដោះស្រាយជីវភាពគ្រួសារសមល្មម និងសល់ប្រាក់មួយចំនួនសម្រាប់ធ្វើបុណ្យ ។
លោកតាហួន ឈាងលី វ័យ៧២ឆ្នាំ ដែលជាចាស់ទុំនៅវត្តហាន់ជ័យ មានប្រសាសន៍ឲ្យដឹងថាចាប់តាំងពីពេលដែលគាត់ទៅនៅវត្តនេះរយៈពេល៤ឆ្នាំឃើញប្រជាពលរដ្ឋខ្លះទៅបែបន់សុំឲ្យមានកូន និងសេចក្តីសុខសាន្តក្នុងក្រុមគ្រួសារ ហើយបានដូចសេចក្តីប្រាថ្នាមែន ។ បន្ទាប់មកអ្នកបួងសួងនោះបានយករបស់របរទៅលាបំណន់ និងបានចូលបច្ច័យ សម្រាប់កសាងសមិទ្ធផល ផ្សេងៗក្នុងនោះមានតាំងពីឧកញ៉ាផងដែរ ។
លោកតាឈាង លី រំលឹកថា កាលពីក្នុងសម័យលន់ នល់ យន្តហោះបានទម្លាក់គ្រាប់ណាប៉ាល់ពីលើអាកាសប៉ងកម្ទេចវត្តភ្នំហាន់ជ័យចោលទាំងស្រុង តែដោយមានបារមីពូកែសក្តិសិទ្ធិ គ្រាន់តែធ្វើឲ្យព្រះបដិមាក្នុងព្រះវិហាររោលខ្មៅប៉ុណ្ណោះ ។
ព្រះមុនីសោភ័ណប៊ត តាំងឆេង ចៅអធិការវត្តភ្នំហាន់ជ័យ និងជាមេគណខេត្ត មានថេរដីកាថា ទីអារាមនេះនៅក្នុងសម័យលន់ នល់ ការទម្លាក់គ្រាប់បែកធ្វើឲ្យសមិទ្ធផលក្នុងទីអារាម រងការខូចខាត ក្នុងនោះនៅសល់ព្រះបដិមាក្នុងព្រះវិហារ សល់កុដិ២ខ្នង និងសាលា១ខ្នង ។ សម័យប៉ុល ពត ត្រូវបានបំផ្លាញខ្ទេចដោយរុះកុដិ និងសាលាក្នុងបរិវេណទីអារាម ។
នៅឆ្នាំ១៩៧៩ វត្តបានកកើតឡើងវិញ។ បន្ទាប់មកក្នុងឆ្នាំ១៩៨៧ បានកសាងសមិទ្ធផលជា បណ្តើរៗ ។ ចំពោះក្នុងអំឡុងពេលព្រះមុនីសោភ័ណប៊ត តាំងឆេង ឡើងជាចៅអធិការ វត្តនេះបានចាប់ផ្តើមមានឈ្មោះបោះសំឡេងតាមរយៈជំនឿ ដោយពុទ្ធបរិស័ទមកឲ្យស្រោចទឹក និងធ្វើពិធី ផ្សេងៗ ។ បុគ្គលទាំងនោះសម្រេចតាមក្តីប្រាថ្នារបស់ពួកគេ ។ បន្ទាប់មកគេយកបច្ច័យចូលបុណ្យរួមចំណែកកសាងវត្ត ដែលរហូតមកដល់សព្វថ្ងៃមានការរីកចម្រើន ជាក់ស្តែងទីធ្លាវត្តបានចាក់បេតុង ។
ចៅអធិការវត្តនៅចាំបានថា កាលពីមុនផ្លូវចេញពីក្រុងកំពង់ចាមទៅកាន់ភ្នំហាន់ជ័យពិបាកក្នុងការធ្វើដំណើរ ហើយពឹងឲ្យភ្នាក់ងារកោះសន្តិភាពប្រចាំខេត្តកំពង់ចាម ជួយសរសេរផ្សាយ ។ តាមរយៈការផ្សាយនោះលោកហ៊ុន ណេង អតីតអភិបាលខេត្តបានជួយកសាងផ្លូវ១ខ្សែទៅកាន់ជើងភ្នំហាន់ជ័យ។ ចាប់ពីពេលនោះមកបានធ្វើឲ្យមហាជននៅគ្រប់ទិសទី នាំគ្នាធ្វើបុណ្យនៅវត្តភ្នំហាន់ជ័យជាហូរហែ មានទាំងអ្នកនៅក្នុងប្រទេស និងនៅក្រៅប្រទេស ។
មហាជនមានជំនឿលើចៅអធិការវត្តដោយសារតែគេឃើញកសាងសមិទ្ធផលក្នុងវត្តបានច្រើន គឺបានបច្ច័យមកប៉ុន្មានកសាងអស់ ហើយបានមកទៀត កសាងបន្តទៀត ។
លោកសឹង ភារុំ ប្រធានមន្ទីរវប្បធម៌ និងវិចិត្រសិល្បៈខេត្តឲ្យដឹងថា នៅលើភ្នំហាន់ជ័យមានប្រាសាទបុរាណចំនួន២ ក្នុងនោះប្រាសាទកសាងឡើងពីឥដ្ឋ និងប្រាសាទគុកឦសាន កសាងនៅក្នុងសម័យចេនឡា ។ នៅចង្កេះភ្នំមានប្រាសាទគុកព្រះធាតុបានជួសជុលរួច១០០ភាគរយ ។ ប្រាសាទមួយទៀតបានខូចខាតអស់សល់តែគ្រឹះខាងក្រោម ។ ប្រាសាទខូចខាតដោយសារតែកត្តាអាកាសធាតុច្រើនជាងមនុស្សបំផ្លាញ ។
នៅលើភ្នំហាន់ជ័យមានឆ្មាំការពារម្នាក់ គឺលោកឡាន គឹមហាន ។ កន្លងមកក្រសួងវប្បធម៌បានចាត់ឲ្យក្រុមបច្ចេកទេសជួសជុលប្រាសាទលើភ្នំហាន់ជ័យ ដែលបានខូចខាតដោយជួសជុលឲ្យដូចដើមវិញ ។ ប្រាសាទឥដ្ឋកសាងឡើងសម្រាប់គោរពតាមជំនឿព្រហ្មញ្ញសាសនា ពលរដ្ឋភាគច្រើននាំគ្នាគោរពតាមជំនឿ២បែប គឺព្រះពុទ្ធសាសនា និងព្រហ្មញ្ញសាសនា ៕
ចែករំលែកព័តមាននេះ