ការសិក្សាមួយដែលចុះផ្សាយនៅក្នុងព្រឹត្តិបត្រ American Heart Assosiation បានអះអាងថា អ្នកដែលទទួលទានអាហារចម្អិនដោយប្រេងល្ងលាយគ្នាជាមួយប្រេងកន្ទក់ សម្ពាធឈាមចុះទាបហើយព្រមទាំងអាចធ្វើឱ្យល្អប្រសើរនូវកម្រិតកូឡេស្តេរ៉ូលបានទៀតផង ។ អ្នកស្រាវជ្រាវបានរកឃើញថា អាហារចម្អិនដោយប្រេងល្ងនិងប្រេងកន្ទក់ ពិតជាមានប្រសិទ្ធភាពល្អស្មើនឹងឱសថបញ្ចុះឈាម ហើយវារឹតតែផ្តល់នូវផលប្រយោជន៍ច្រើនជាងនេះ ប្រសិនជាគេប្រើប្រេងនេះលាយជាមួយឱសថ ។
អ្នកស្រាវជ្រាវនៅមន្ទីរពេទ្យសាកលវិទ្យាល័យ Fukuoka University Chikishi Hospital ប្រទេសជប៉ុន Devarajan Sankar បានថ្លែងថា ប្រេងកន្ទក់់ ក៏ដូចជាប្រេងល្ង គឺមានខ្លាញ់ឆ្អែត (ជាខ្លាញ់ដែលមាននៅក្នុងសាច់ ស៊ុត ទឹកដោះគោ ដែលត្រូវបានគេគិតថាផ្តល់ផលអាក្រក់ដល់សុខភាព) កម្រិតទាប ហើយវាអាចធ្វើឱ្យល្អប្រសើរនូវកម្រិតកូឡេស្តេរ៉ូលបានទៀតផង ។ និយាយជារួម វាអាចកាត់បន្ថយអត្រាគ្រោះថ្នាក់ដោយជំងឺបេះដូងបាន ។
នៅក្នុងការពិសោធរយៈពេល៦០ថ្ងៃលើមនុស្ស៣ក្រុមមានគ្នា ៣០០នាក់ និងមានអាយុជាមធ្យម៥៧ឆ្នាំ បានបង្ហាញឱ្យឃើញថា សម្ពាធឈាម systolic (លេខផ្នែកខាងលើនៃឧបករណ៍វាស់ឈាម)របស់ពួកគេមានការថយចុះគឺ ១៤ ពិន្ទុ សម្រាប់អ្នកប្រើតែប្រេងកន្ទក់ ១៦ពិន្ទុសម្រាប់ក្រុមប្រើថ្នាំ និង៣៦ពិន្ទុសម្រាប់ក្រុមប្រើទាំងប្រេងកន្ទក់និងប្រេងល្ង ។ ចំណែកឯសម្ពាធឈាម Diastolic (លេខផ្នែកខាងក្រោមនៃឧបករណ៍វាស់ឈាម) របស់ពួកគេក៏ថយចុះគួរឱ្យកត់សម្គាល់ដែរក្នុងនោះ ១១ពិន្ទុសម្រាប់ក្រុមទទួលទានតែប្រេងកន្ទក់ ១២ពិន្ទុសម្រាប់ក្រុមប្រើថ្នាំ និង២៤ពិន្ទុសម្រាប់ក្រុមទទួលទានប្រេងទាំង២ប្រភេទ ។ ទិន្នន័យលើការប្រែប្រួលកូឡេស្តេរ៉ូលវិញគឺ ក្រុមអ្នកប្រើប្រេងទាំង២លាយគ្នា កូឡេស្តេរ៉ូលអាក្រក់ LDL ថយចុះ២៦ភាគរយ ខណៈកូឡេស្តេរ៉ូលល្អ HDL កើនឡើង ៩.៥ភាគរយ ៕
ចែករំលែកព័តមាននេះ