ខេត្តមណ្ឌលគិរី ៖ សេចក្តីរាយការណ៍មួយបានឲ្យដឹងថា ដំរីព្រៃជាច្រើនក្បាលបានបង្ហាញខ្លួនជាថ្មីទៀត នៅបរិវេណខាងក្រោយសាលាស្រុកកែវសីមា និងនៅចំណុចស្រះទឹកក្នុងសង្កាត់រដ្ឋបាលព្រៃឈើស្រែ
ព្រះ មានចម្ងាយប្រហែល៣០០ម៉ែត្រប៉ុណ្ណោះពីផ្លូវជាតិលេខ៧៦ ក្នុងភូមិអូរអាម ឃុំស្រេខ្ទុម ស្រុកកែវសីមា ។
វត្តមានជាថ្មីរបស់ហ្វូងដំរីព្រៃទាំងនោះគឺតាំងពីថ្ងៃទី២០ មេសា ហើយរហូតមកដល់ព្រឹកថ្ងៃទី២៣ ខែមេសា ពួកវាកំពុងស្ថិតនៅចំណុចដដែល ។ ជាទូទៅ ដំរីព្រៃទាំងនោះ តែងចេញមកចំណុចខាងលើជារៀងរាល់ឆ្នាំក្នុងរដូវនេះ ព្រោះទីតាំងខាងក្រោយសាលាស្រុកកែវសីមា និងបរិវេណសង្កាត់រដ្ឋបាលព្រៃឈើស្រែព្រះ ជាជម្រកចាស់របស់ពួកវា ។
ហ្វូងដំរីព្រៃទាំងនេះ មិនបង្កឲ្យមានផលប៉ះពាល់ដល់ប្រជាពលរដ្ឋនៅក្បែរនោះទេ គិតរហូតមកដល់ពេលនេះ ប៉ុន្តែទោះជាយ៉ាងណាមន្ត្រីបរិស្ថានក្នុងតំបន់បានឃ្លាំមើលពីបំលាស់ទីរបស់ពួកវាជាប្រចាំ ដើម្បីបង្ការហានិភ័យផ្សេងៗដែលអាចកើតឡើងពីសកម្មភាពរបស់ពួកវាមកលើអ្នកស្រុក ។ បើតាមមន្ត្រីបរិស្ថាននិយាយថា ដំរីព្រៃទាំងអស់នេះមានចំនួន៧ក្បាល ហើយការចេញពីព្រៃជ្រៅមកក្បែរភូមិអ្នកស្រុក គឺពួកវាមករកផឹកទឹក និងស៊ីចំណី ។
លោក កែវ សុភគ៌ ប្រធានមន្ទីរបរិស្ថានខេត្ត បានឲ្យដឹងថា មួយរយៈនេះសម្រាប់ខេត្តមណ្ឌលគិរីមានភ្លៀងធ្លាក់ជោកជាំ ដែលជារឿងដ៏ប្រសើរមួយព្រោះថា ក្នុងព្រៃនៅតែមានប្រភពទឹកដើម្បីឲ្យសត្វព្រៃផឹក ។ ករណីនេះ មន្ត្រីបរិស្ថាននិងមន្ត្រីអង្គការ WCS ក្នុងតំបន់ក៏បានត្រៀមដឹកទឹកទៅចាក់ក្នុងថ្លុក ឬត្រពាំង ក្នុងព្រៃឲ្យមានប្រភពទឹកជាប្រចាំដែរ ប្រសិនបើប្រភពទឹកនោះត្រូវរីងហួត ។
នៅរដូវប្រាំងបែបនេះ មន្ត្រីជំនាញក៏នឹងបង្កើនការល្បាតព្រៃ និងចាំឃ្លាំមើលយ៉ាងយកចិត្តទុកដាក់ដែរ ព្រោះព្រានព្រៃតែងចេញប្រមាញ់ក្នុងរដូវនេះ ហើយការបរបាញ់សត្វព្រៃពីសំណាក់ជនល្មើស គឺធ្វើឡើងនៅតំបន់មានប្រភពទឹកដែលសត្វព្រៃអាស្រ័យប្រចាំថ្ងៃនោះ ។ លោកប្រធានមន្ទីរបញ្ជាក់ថា បច្ចុប្បន្នចំនួនដំរីព្រៃនៅខេត្តមណ្ឌលគិរី មានចន្លោះពី៣៧០ក្បាលទៅ៥០០ក្បាល គឺមានការកើនឡើង ហើយដំរីព្រៃនៅខេត្តមណ្ឌលគិរី មានតែមួយប្រភេទប៉ុណ្ណោះ គឺដំរីអាស៊ី ។
លោកក៏បានអំពាវនាវដល់បងប្អូនប្រជាពលរដ្ឋ នៅពេលទៅមើលឬថតរូបហ្វូងដំរីទាំងនោះ សូមកុំបង្កការរំខានដល់ពួកវាដែលអាចមានគ្រោះថ្នាក់នានា ព្រោះចរិតដំរីព្រៃបើយើងមិនរំខានវាទេ វាក៏មិនធ្វើអី្វដល់មនុស្សដែរ ៕
ចែករំលែកព័តមាននេះ