ខេត្តកណ្តាល ៖ កូនប្រុសដែលមានសន្ដានចិត្តជាសត្វតិរច្ឆានម្នាក់ បានត្រូវនគរបាលព្រហ្មទណ្ឌស្រុកអង្គស្នួល និងនគរបាលប៉ុស្តិ៍ព្រៃពួចចាប់ឃាត់ខ្លួន តាមពាក្យបណ្ដឹងរបស់ម្ដាយបង្កើតដែលបានប្ដឹងចោទប្រកាន់ថា ជនអកតញ្ញូម្នាក់នេះជាមនុស្សចោលម្សៀត ប្រើប្រាស់សារធាតុញៀនយ៉ាងងប់ងុលរហូតត្រូវប្រពន្ធរត់ចោល ។ មិនតែប៉ុណ្ណោះ ជននេះដែលមានចំណង់តណ្ហាពុះកញ្ជ្រោលខ្លាំង បានសុំរូបគាត់ដែលជាម្ដាយបង្កើតរួមរ័កជាច្រើនដង ប៉ុន្តែគាត់មិនព្រម ។
លុះចុងក្រោយ ជននេះបានយកកាំភ្លើង១ដើមដែលកប់ទុកក្នុងផ្ទះ មកគំរាមបាញ់សម្លាប់គាត់ ព្រោះតែខឹងសុំរួមរ័កមិនបាន ហេតុនេះហើយទើបគាត់សម្រេចចិត្តប្ដឹងសុំឲ្យនគរបាលជួយអន្តរាគមន៍ចាប់ខ្លួនចាត់ការតាមច្បាប់តែម្ដង ។ ប៉ុន្តែសម្រាប់ជនជាប់ចោទជាកូនប្រុសរូបនេះ ក្រោយពីត្រូវនគរបាលចាប់ខ្លួននាំទៅសាកសួរបានប្រកែកថា ខ្លួនមិនបានប្រព្រឹត្តដូចការចោទប្រកាន់របស់ម្ដាយឡើយ ។
ការចាប់ខ្លួនកូនប្រុសតិរច្ឆាននេះ បានធ្វើឡើងកាលពីវេលាម៉ោង៩ព្រឹកថ្ងៃទី២៣ ខែមេសា នៅក្នុងផ្ទះជនសង្ស័យស្ថិតក្នុងភូមិព្រៃមាន ឃុំព្រៃពួច ស្រុកអង្គស្នួល ។ ជនសង្ស័យខាងលើឈ្មោះ ប្រាក់ ឡា អាយុ៣៣ឆ្នាំ មុខរបរមិនពិតប្រាកដ មានប្រពន្ធនិងកូន៣នាក់ក្នុងនោះស្រី២នាក់១នាក់ ។ ជាមួយនឹងការចាប់ខ្លួននេះ នគរបាលដកហូតបានកាំភ្លើងអាកា៤៧មួយដើម ប៉ុន្តែនគរបាលអះអាងថា ជាកាំភ្លើងខូចគុណភាពមិនអាចប្រើបានទេ ។ ចំណែកស្ត្រីជាម្ដាយឈ្មោះចំរើន សុីវុន អាយុ៦០ឆ្នាំ ជាកសិករ ។
ស្ត្រីជាម្តាយនិយាយប្រាប់នគរបាលថា កូនប្រុសអកតញ្ញូរបស់គាត់ម្នាក់នេះបានប្រើប្រាស់សារធាតុញៀនរហូតដល់ញៀនខ្លាំងណាស់ទៅហើយ ។ ដោយសារតែមិនអាចទ្រាំទ្របាន ទើបប្រពន្ធរបស់គេរត់ចោល ដែលរហូតមកដល់ពេលនេះមានរយៈពេលជាង១ខែមកហើយ ។ ក្រោយពេលប្រពន្ធរត់ចោលបាត់ កូនតិរច្ឆានម្នាក់នេះ ពេលមានចំណង់តណ្ហាពុះកញ្ជ្រោល ស្រាប់តែមកលួងលោមរូបគាត់ ដែលជាម្ដាយបង្កើតសុំរួមរ័កជាច្រើនលើកច្រើនសា ប៉ុន្តែគាត់មិនព្រមឡើយនិងបានណែនាំកុំឲ្យធ្វើបែបនេះ ។ ក្រោយមក កូនប្រុសរូបនេះ បានយកកាំភ្លើង១ដើមច្រកក្នុងការុងរួចយកទៅកប់ដីក្នុងផ្ទះដែលគាត់គិតថា ជាការកំញើញឲ្យរូបគាត់ភ័យខ្លាច យល់ព្រមរួមរ័កជាមួយ ។
ស្ត្រីចំណាស់ជាម្តាយនិយាយទៀតថា ដំបូងឡើយគាត់គិតថាមិនចង់ប្ដឹងទៅនគរបាលឲ្យជួយអន្តរាគមន៍
ទេ ដោយនឹកស្មានថាកូននេះកែខ្លួន ប៉ុន្តែរហូតមកដល់វេលាម៉ោង២រំលងអធ្រាត្រ ឈានចូលថ្ងៃទី២៣
ខែមេសា ខណៈរូបគាត់កំពុងដេកនៅលើផ្ទះ ស្រាប់តែកូនប្រុសម្នាក់នេះស្រែកហៅសុំគាត់រួមរ័កទៀត ។ខណៈនោះ គាត់នៅតែមិនព្រមដដែល ហើយកូនតិរច្ឆានខាងលើបាននិយាយគំរាមថា «បើម៉ែឯងមិនព្រម យប់នេះ ខ្ញុំនឹងសម្លាប់ចោលហើយ» ដែលធ្វើឲ្យគាត់មានការភ័យខ្លាចខ្លាំងណាស់ ក៏រត់ចេញពីផ្ទះទៅដេកនៅផ្ទះកូនប្រុសម្នាក់ទៀត ឈ្មោះ ប្រាក់ លាង ស្ថិតនៅក្នុងភូមិព្រៃមាន ឃុំព្រៃពួចនោះដែរ ។ ដោយអត់ទ្រាំនឹងទង្វើដ៏លាមករបស់កូនអកតញ្ញូនេះតទៅទៀតលែងបាន ទើបគាត់សម្រេចចិត្តប្ដឹងទៅនគរបាលសុំឲ្យជួយអន្តរាគមន៍ចាប់ខ្លួនចាត់ការតាមច្បាប់តែម្ដង ។
មន្ត្រីនគរបាលឲ្យដឹងថា ក្រោយពីទទួលបានព័ត៌មាននេះភ្លាម កម្លាំងបានចុះទៅកាន់កន្លែងកើតហេតុ ហើយចាប់ខ្លួនជនសង្ស័យនិងគាស់យកកាំភ្លើងអាកា៤៧កាត់ស្វាយខូចគុណភាព ដែលជនសង្ស័យច្រកក្នុងការុងកប់ដីក្បែរផ្ទះ ទុកសម្រាប់គំរាមម្ដាយរួមភេទ ។ បន្ទាប់មក បាននាំជននេះទៅសាកសួរនៅអធិការដ្ឋាននគរបាលស្រុក តែជនសង្ស័យបដិសេធថាខ្លួនមិនបានសុំម្ដាយរួមរ័កទេ ហើយការស្រែកហៅម្ដាយឲ្យចុះពីលើផ្ទះទាំងយប់អធ្រាត្រនោះ គឺដើម្បីឲ្យជួយមើលកូនរបស់ខ្លួនឈឺតែប៉ុណ្ណោះ ។
ដោយឡែក កាំភ្លើងអាកានោះខ្លួនរើសបានជាង១ឆ្នាំមកហើយ និងយកកប់ដីព្រោះមិនចង់ឲ្យអ្នកផ្សេងឃើញ មិនបានទុកគំរាមម្ដាយរបស់ខ្លួននោះឡើយ ។ ប៉ុន្តែទោះបីជាជនសង្ស័យប្រកែកដោះសាបែបណាក៏មិនរួចខ្លួនដែរ ព្រោះយោងតាមពាក្យបណ្ដឹងរបស់ស្ត្រីជាម្ដាយគឺជននេះមិនអាចរួចខ្លួនឡើយ និងត្រូវបានកសាងសំណុំចាត់ការតាមផ្លូវច្បាប់ ៕
ចែករំលែកព័តមាននេះ