ខេត្តកណ្តាល ៖ ព្រឹកថ្ងៃទី២២ ខែមេសាសាលាដំបូងខេត្ត បានបើកសវនាការប្រកាសសាលក្រមផ្តន្ទាទោសឃាតករសុីឈ្នួលបាញ់សម្លាប់បុរសម្នាក់នៅស្រុកខ្សាច់កណ្តាល កាលពីខែតុលា ឆ្នាំ២០១៧កន្លងទៅ ។ក្នុងសវនាការប្រកាសសាលក្រមផ្តន្ទាទោសនេះ មានលោក សាយ សម្ភស្សន៍សេរី ជាចៅក្រម និងមានការចូលរួមពីលោកឯក ស៊ុនរស្មី ព្រះរាជអាជ្ញារងអមសាលាដំបូងខេត្ត ដោយបានសម្រេចផ្តន្ទាទោសជនជាប់ចោទឈ្មោះ ហ៊ាប ធី ភេទប្រុស អាយុ៤៥ឆ្នាំ មុខរបរមិនពិតប្រាកដ មានទីលំនៅភូមិអូរចិញ្ចៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ ស្នាក់នៅបណ្តោះអាសន្នក្នុងសង្កាត់ស្វាយដង្គំ ក្រុងសៀមរាម ខេត្តសៀមរាប ដាក់ពន្ធនាគារ៣០ឆ្នាំ និងអ្នកផ្តើមគំនិតឈ្មោះ ខេង ឡា ភេទស្រី អាយុ៣៩ឆ្នាំ ជាកសិករ រស់នៅភូមិពោធិ៍រៀងត្បូង ឃុំពោធិ៍រៀង ស្រុកពោធិ៍រៀង ខេត្តព្រៃវែង ដាក់ពន្ធនាគារ១ឆ្នាំ៦ខែ ។ជនរងគ្រោះដែលត្រូវឃាតករបាញ់សម្លាប់ឈ្មោះ សោ សុជាតិ ហៅជ័រ ។
សូមរំឭកថា កាលពីវេលាម៉ោងប្រមាណ៥ល្ងាចថ្ងៃទី៣១ ខែតុលា ឆ្នាំ២០១៧ មានករណីឃាតកម្មគិតទុកជាមុនមួយកើតឡើងនៅមាត់ច្រាំងព្រែកដូង ស្ថិតក្នុងភូមិត្បូងដំរី ឃុំកំពង់ចម្លង ស្រុកខ្សាច់កណ្តាល ។ ក្រោយកើតហេតុភ្លាម កម្លាំងអាវុធហត្ថស្រុកខ្សាច់កណ្តាល និងកម្លាំងអាវុធហត្ថខេត្តដឹកនាំដោយលោកវរសេនីយ៍ឯក ទូច អុីណានមេបញ្ជាការរងកងរាជអាវុធហត្ថខេត្តទទួលផែននគរបាលយុត្តិធម៌ និងដោយមានការសហការដឹកនាំពីជំនាញអាវុធហត្ថលើផ្ទៃប្រទេស និងសហការពីអាវុធហត្ថខេត្តព្រៃវែង ខេត្តសៀមរាម និងអាវុធហត្ថខេត្តឧត្តរមានជ័យ ក្រោមការសម្របសម្រួលពីលោកព្រះរាជអាជ្ញាអមសាលាដំបូងខេត្តកណ្តាល និងខេត្តពាក់ព័ន្ធ បានចុះស្រាវជ្រាវនិងឃាត់ខ្លួនជនសង្ស័យឈ្មោះ ខេង ឡា ភេទស្រី អាយុ៣៩ឆ្នាំនាថ្ងៃទី៤ ខែវិច្ឆិកា ឆ្នាំ២០១៧ នៅផ្ទះជនសង្ស័យ ក្នុងភូមិពោធិ៍រៀងត្បូង ឃុំពោធិ៍រៀង ស្រុកពោធិ៍រៀង ខេត្តព្រៃវែង ដែលជាជនផ្តើមគំនិតជួលឃាតករឈ្មោះ ហ៊ាប ធី មកសម្លាប់ជនរងគ្រោះ សោ សុជាតិ ហៅជ័រ ។
បន្ទាប់មក កម្លាំងអាវុធហត្ថខេត្តឧត្តរមានជ័យ និងខេត្តសៀមរាប បានឃាត់ខ្លួនជនសង្ស័យឈ្មោះ ហ៊ាប ធី ភេទប្រុស អាយុ៤៥ឆ្នាំ មានទីលំនៅភូមិអូរចិញ្ចៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ ស្នាក់នៅបណ្តោះអាសន្ន ក្នុងសង្កាត់ស្វាយដង្គំ ក្រុងសៀមរាប ខេត្តសៀមរាប នៅថ្ងៃទី១៣ ខែវិច្ឆិកា ឆ្នាំ២០១៧ តាមដីកាបង្គាប់ឲ្យចាប់ខ្លួនរបស់ចៅក្រមស៊ើបសួរសាលាដំបូងខេត្តកណ្តាល នៅចំណុចអណ្តូង៣ ភូមិអូរតាម៉េង ឃុំអន្លង់វែង ស្រុកអន្លង់វែង ។
ជនសង្ស័យឈ្មោះ ហ៊ាប ធី និងបក្ខពួកបានព្យាយាមតបតដោយបោកគ្រាប់បែកចំនួន២គ្រាប់ និងបាញ់មកលើសមត្ថកិច្ចអាវុធហត្ថខេត្តសៀមរាប និងខេត្តឧត្តរមានជ័យ នៅចំណុចផ្ទះឈ្មោះ ជា ស្ថិតក្នុងភូមិអូរតាម៉េង ឃុំអន្លង់វែង ស្រុកអន្លង់វែង កាលពីនៅថ្ងៃទី១១ ខែវិច្ឆិកា ឆ្នាំ២០១៧ បណ្តាលឲ្យនាយអាវុធហត្ថខេត្តសៀមរាបមួយរូបត្រូវរបួសកំភួនជើង និងកំប៉េះគូទ ។ ជនសង្ស័យត្រូវបានបញ្ជូនពីខេត្តឧត្តរមានជ័យមកអាវុធហត្ថខេត្តកណ្តាល នៅថ្ងៃទី១៤ ខែវិច្ឆិកា ឆ្នាំ២០១៧ ដើម្បីបញ្ជូនទៅចៅក្រមស៊ើបសួរសាលាដំបូងខេត្តកណ្តាលចាត់ការតាមនីតិវិធី ។
ពាក់ព័ន្ធនឹងករណីបោកគ្រាប់បែក និងបាញ់តបតជាមួយសមត្ថកិច្ចនេះ អាវុធហត្ថខេត្តឧត្តរមានជ័យធ្វើការស្រាវជ្រាវនិងឃាត់ខ្លួនជនសង្ស័យ២នាក់ ៖ ១-ឈ្មោះ អ៊ាន ឡៃ ភេទស្រី អាយុ៤៥ឆ្នាំ មុខរបរលក់ដូរ ជាប្រពន្ធឃាតករ មានទីលំនៅភូមិអូរចិញ្ចៀន ឃុំអន្លង់វែង ស្រុកអន្លង់វែង ពាក់ព័ន្ធនឹងករណីឲ្យកូនយកគ្រាប់បែកដែលប្តីលាក់ទុកនៅផ្ទះទៅឲ្យជនសង្ស័យ និង២-ឈ្មោះ វុធ លាងតេង ភេទប្រុស អាយុ២១ឆ្នាំ មុខរបរលក់ដូរ ជាកូនឃាតករ មានទីលំនៅភូមិអូរចិញ្ចៀន ឃុំអន្លង់វែង ស្រុកអន្លង់វែង ពាក់ព័ន្ធនឹងករណីយកគ្រាប់បែកទៅឲ្យឪពុកជាជនសង្ស័យ ។ជនសង្ស័យ២នាក់ខាងលើ កម្លាំងអាវុធហត្ថខេត្តឧត្តរមានជ័យ បានកសាងនីតិវិធីដើម្បីបញ្ជូនទៅសាលាដំបូងខេត្ត ។
តាមការស្រាវជ្រាវនិងចម្លើយសារភាពរបស់ជនសង្ស័យឈ្មោះ ខេង ឡា និងឈ្មោះ ហ៊ាប ធី ក្នុងអំពើឃាតកម្មនេះ មានការពាក់ព័ន្ធនឹងបក្សពួករបស់ខ្លួនចំនួន៣នាក់ទៀត ដែលបានគេចខ្លួនជាបន្តបន្ទាប់ ចាប់ពីថ្ងៃកើតហេតុ ។
ដោយឡែក ជនសង្ស័យឈ្មោះ ហ៊ាប ធី បានសារភាពថា កន្លងមកខ្លួនធ្លាប់ធ្វើសកម្មភាព លួចកាច់សោ.កម៉ូតូ តាមបណ្តាខេត្តជាច្រើនលើក និងលើកចុងក្រោយបានប្រព្រឹត្តអំពើឃាតកម្មគិតទុកជាមុន ដោយស៊ីឈ្នួលបាញ់សម្លាប់មនុស្ស។តាមដំណើររឿងហេតុ គឺជនរងគ្រោះឈ្មោះសោ សុជាតិ ហៅជ័រ ធ្លាប់មានទំនាក់ទំនងស្នេហាជាមួយស្ត្រីឈ្មោះ ខេង ឡា កាលនៅយុវវ័យ ។
ក្រោយមក អ្នកទាំងពីរក៏មានគ្រួសារនិងមានកូនរៀងៗខ្លួន ហើយជនរងគ្រោះនៅតែព្យាយាមតាមស្រឡាញ់ដដែល ព្រមទាំងបាននិយាយបញ្ចុះបញ្ចូលលួងលោមម្តងហើយម្តងទៀតឲ្យលែងលះប្តី និងឲ្យដាក់ថ្នាំបំពុលសម្លាប់ប្តីជាដើម ។
ការដើរហើរទៅណាមកណារបស់ស្ត្រីឈ្មោះ ខេង ឡា គឺជនរងគ្រោះព្យាយាមតាមរហូត មានពេលខ្លះទៀត ប្តីមិននៅផ្ទះ ជនរងគ្រោះក៏ឆ្លៀតឱកាសផ្លោះរបងចូលទៅរក ដើម្បីលួងលោមសុំរួមមេត្រី ប៉ុន្តែជនសង្ស័យមិនយល់ព្រមឡើយធ្វើឲ្យឈ្មោះ សោ សុជាតិ រឹតតែតាម និងប្រចណ្ឌខ្លាំងឡើងៗ ព្រមទាំងគំរាមមិនឲ្យប្រាប់រឿងនេះឲ្យអ្នកណាដឹងទេ ជាហេតុធ្វើឲ្យស្ត្រីឈ្មោះ ខេង ឡា ពុំមានសេរីភាពគ្រប់គ្រាន់ក្នុងការរស់នៅឡើយ ដោយសារមានគំនាបពីអតីតសង្សារ ។
ហេតុនេះហើយទើបមានគំនិតសម្លាប់ឈ្មោះ សោ សុជាតិ និងសម្រេចចិត្តសុំលេខទូរស័ព្ទជនឈ្មោះ ហ៊ាប ធី ដោយសុំពីឈ្មោះ ហ៊ាប ប៊ុនហ៊ាន ហៅ ស រស់នៅក្នុងភូមិជាមួយគ្នា ។ បន្ទាប់មក បានណាត់ជួបនិយាយត្រូវរ៉ូវគ្នាជាមួយឃាតករឈ្មោះ ហ៊ាប ធី ក៏រៀបចំគម្រោងសម្លាប់ ។
មុនពេលកើតហេតុ ស្ត្រីឈ្មោះ ខេង ឡា បានជិះម៉ូតូទៅជួបឈ្មោះ ហ៊ាប ធី នៅតាមផ្លូវ ហើយបានជិះទៅកន្លែងកើតហេតុរង់ចាំឈ្មោះ សោ សុជាតិ ហៅជ័រ ដែលមានទីលំនៅក្នុងភូមិពោធិ៍រៀងត្បូង ឃុំពោធិ៍រៀង ស្រុកពោធិ៍រៀង ខេត្តព្រៃវែង ។ លុះនៅរសៀលថ្ងៃទី៣១ ខែតុលា ឆ្នាំ២០១៧ ស្ត្រីឈ្មោះ ខេងឡា បានទូរស័ព្ទហៅអតីតសង្សារមកជួបគ្នា ដោយបញ្ឆោតឲ្យជនរងគ្រោះមកជួយមើលទិញដីចម្ការស្វាយមួយកន្លែង ដោយជិះម៉ូតូមួយគ្រឿងចេញពីផ្ទះនៅស្រុកពោធិ៍រៀង ខេត្តព្រៃវែង មកយកជនសង្ស័យជាឃាតករនៅតាមផ្លូវ រួចចេញដំណើរមកចាំនៅចំណុចកើតហេតុជាមុន ។
មុនពេលកើតហេតុបន្តិច ជនសង្ស័យ ហ៊ាបធី និងជនរងគ្រោះក៏បានជួបគ្នា ហើយនៅពេលជនរងគ្រោះ សោ សុជាតិ កំពុងឈរនិយាយភ្លេចខ្លួន ជនសង្ស័យជាឃាតករក៏បានទាញកាំភ្លើងខ្លីម៉ាកកា៥៩ប្រើគ្រាប់ឡុកច្នៃ បាញ់ចំក្បាលជនរងគ្រោះមួយគ្រាប់ពីក្រោយ បណ្តាលឲ្យដួលផ្កាប់មុខស្លាប់ភ្លាមៗ ។ បន្ទាប់មកជនសង្ស័យក៏យកម៉ូតូជនរងគ្រោះ ជិះគេចខ្លួនទៅខេត្តសៀមរាបបាត់ទៅ ៕
ចែករំលែកព័តមាននេះ