រាជធានីភ្នំពេញ ៖ បុរសម្នាក់ជាអតីតជាកីឡាប្រដាល់នៅក្លឹបពុទ្ធសិរីវង្សពោធិ៍សែនជ័យ បច្ចុប្បន្នជាសណ្តាប់ធ្នាប់ ខណ្ឌពោធិ៍សែនជ័យ ជិះម៉ូតូលឿនពេកជ្រុលទៅបុករបាំងថ្មពុះចែកទ្រូងផ្លូវពេញទំហឹងបណ្ដាលឲ្យដួលបោកក្បាលនឹងបង្គោលភ្លើងបំភ្លឺផ្លូវបែកក្បាលស្លាប់ភ្លាមៗ កាលពីម៉ោង៣និង៤០នាទីទៀបភ្លឺ ថ្ងៃទី២០ ខែមេសា ឆ្នាំ២០១៩ ត្រង់ចំណុចខាងជើងស្នងការដ្ឋាននគរបាលរាជធានីភ្នំពេញ ប្រមាណ៥០០ម៉ែត្រ តាមបណ្ដោយផ្លូវ៥៩៨ ស្ថិតក្នុងសង្កាត់ច្រាំងចំរះទី១ ខណ្ឌឬស្សីកែវ។
សពជនរងគ្រោះមានឈ្មោះ យឿន យន ហៅ ពុទ្ធ សុជាតិ ភេទប្រុស អាយុ៣៣ឆ្នាំ អតីតជាកីឡាប្រដាល់នៅក្លឹបពុទ្ធសិរីវង្សពោធិ៍សែនជ័យ បច្ចុប្បន្នជាសណ្តាប់ធ្នាប់ ខណ្ឌពោធិ៍សែនជ័យ មានស្រុកកំណើតនៅភូមិស្រឹង ឃុំទំនប់ ស្រុកបាធាយ ខេត្តកំពង់ចាម ។
តាមប្រភពពីកន្លែងកើតហេតុបានឱ្យដឹងថា នៅមុនកើតហេតុ គេឃើញជនរងគ្រោះខាងលើបានជិះម៉ូតូមួយគ្រឿងម៉ាកហុងដាស្កុបភី ស៊េរី០១៩ ពណ៌ស ពាក់ស្លាកលេខ ភ្នំពេញ1HO-8788 ធ្វើដំណើរតាមបណ្តោយផ្លូវ៥៩៨ ពីត្បូងទៅជើងក្នុងល្បឿនយ៉ាងលឿន នៅលើម៉ូតូមានដឹងស្រាបៀរចំនួន២កេសដាក់នៅខាងមុខទៀតផង។ លុះដល់ចំណុចកើតហេតុ រេចង្កូតទៅខាងឆ្វេងបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យម៉ូតូរងខូចខាតបែកក្បាំងខាងមុខ។ រីឯជនរងគ្រោះដួលបោកក្បាលជាមួយនឹងបង្គោលភ្លើងបំភ្លឺផ្លូវដែលនៅចំកណ្ដាលទ្រូងផ្លូវ បណ្តាលឲ្យបែកក្បាលដាច់ខ្យល់ស្លាប់ភ្លាមៗនៅនឹងកន្លែងកើតហេតុ។
ប្រភពដដែលបន្តទៀតថា ភ្លាមនោះក៏ស្រាប់តែលេចមុខជនឆ្លៀតឱកាសចំនួន២នាក់ ជិះម៉ូតូមួយគ្រឿងមិនចាំម៉ាកមកឈប់នៅកន្លែងកើតហេតុ រួចចុះទៅលូកហោប៉ៅខោជនរងគ្រោះលួចយកកាបូបលុយនិងទូរស័ព្ទដៃ១គ្រឿងបានហើយឡើងជិះម៉ូតូគេចចេញពីកន្លែងកើតហេតុបាត់ស្រមោល ទើបមានសមត្ថកិច្ចមូលដ្ឋានចុះមកដល់កន្លែងកើតហេតុធ្វើការឆែកឆេរលើខ្លួនជនរងគ្រោះឃើញនៅសល់ទូរស័ព្ទដៃមួយគ្រឿងទៀតម៉ាក សាំសុង តែសមត្ថកិច្ចមិនអាចឆែកឆេរទូរស័ព្ទនោះបានទេ ព្រោះជាប់លេខសម្ងាត់។
ក្រោយពេលកើតហេតុសមត្ថកិច្ចមូលដ្ឋានមិនទាន់ស្គាល់អត្តសញ្ញាណទេ បានទាក់ទងហៅសមត្ថកិច្ចជំនាញឱ្យចុះមកធ្វើការវាស់វែងយកម៉ូតូរបស់ជនរងគ្រោះខាងលើទៅរក្សាទុកនៅអធិការដ្ឋាននគរបាលខណ្ឌឬស្សីកែវ ចំណែកឯសពជនរងគ្រោះមិនទាន់មានសាច់ញាតិបានយកទៅតម្កល់ទុកនៅវត្ត ទួល រហូតព្រឹកឡើងទើបមន្ត្រីសាលាខណ្ឌពោធិ៍សែនជ័យ ដឹកយកមកតម្កល់ទុកនៅវត្តពោធិ៍ចិនតុងរង់ចាំសាច់ញាតិយកទៅធ្វើបុណ្យតាមប្រពៃណីនៅស្រុកកំណើត ៕
ចែករំលែកព័តមាននេះ