ខេត្តឧត្តរមានជ័យ ៖ មនុស្សប្រុសស្រី១៤នាក់ស្លាប់ និងរបួសជាច្រើន ខណៈជួបគ្រោះថ្នាក់ចរាចរណ៍ ដោយបើកគោយន្តកន្ត្រៃមិនប្រុងប្រយ័ត្នបណ្តាលឱ្យក្រឡាប់នៅលើភ្នំ ហេតុការណ៍នេះកើតឡើងកាលពីម៉ោង១១និង៣០នាទីព្រឹក ថ្ងៃទី១២ មេសា ២០១៩ ស្ថិតនៅចង្កេះភ្នំដងរ៉ែកអូរត្រជាក់ចិត្ត ច្រកទ្វារតំបន់ជប់គគី ក្នុងភូមិជប់គគីខាងលិច ឃុំអម្ពឹល ស្រុកបន្ទាយអម្ពឹល ។
ជនរងគ្រោះខាងលើ ឈ្មោះគុណ បារាំ ភេទប្រុស អាយុ១៧ឆ្នាំ ជាអ្នកបើកបរគោយន្តកន្ត្រៃ រងរបួសធ្ងន់ ដោយឡែកអ្នករួមដំណើរ ១-ឈ្មោះ គុណ វិសាល ភេទប្រុស អាយុ២៨ឆ្នាំ (ស្លាប់) ២-ឈ្មោះ នឹម គុណ ភេទប្រុស អាយុ៦០ឆ្នាំ រងរបួសធ្ងន់ ៤-ឈ្មោះវង់ មិក ភេទស្រី អាយុ៤៥ឆ្នាំ រងរបួសធ្ងន់ ៤-ឈ្មោះណែម ធី ភេទស្រី អាយុ៥៥ឆ្នាំ រងរបួសធ្ងន់ ៥-ឈ្មោះវង់ យ៉ៃ ភេទប្រុស អាយុ២៧ឆ្នាំ រងរបួសធ្ងន់ ៦-ឈ្មោះគុណ ស្រី ម៉េង ភេទស្រី អាយុ៩ឆ្នាំ រងរបួសធ្ងន់ ៧-ឈ្មោះគុណ ស្រីយ៉េត ភេទស្រី អាយុ២០ឆ្នាំ រងរបួសធ្ងន់
៨-ឈ្មោះគុណ ផល្លា ភេទស្រី អាយុ៣២ឆ្នាំ រងរបួសធ្ងន់ ៩-ឈ្មោះហិត ហាក ភេទប្រុស អាយុ៣៧ឆ្នាំ រងរបួសធ្ងន់ ១០-ឈ្មោះ សាន រាត្រី ភេទស្រី អាយុ៥ឆ្នាំ រងរបួសធ្ងន់ ១១-ឈ្មោះគុណ សុផុន ភេទស្រី អាយុ២៧ឆ្នាំ រងរបួសធ្ងន់ ១២-ឈ្មោះគុណ សុភាព ភេទស្រី អាយុ៣២ឆ្នាំ រងរបួសធ្ងន់ និង១៣-ឈ្មោះ គុណ សុថា ភេទស្រី អាយុ៣០ឆ្នាំ រងរបួសធ្ងន់ ជនរងគ្រោះទាំង១៤នាក់ខាងលើនេះរស់នៅក្នុងភូមិគោកថ្លាន់ ឃុំបន្ទាយឆ្មា ស្រុកថ្មពួក ខេត្តបន្ទាយមានជ័យ ត្រូវបានបញ្ជូនទៅធ្វើការសង្គ្រោះនៅឯប្រទេសថៃក្នុងថ្ងៃកើតហេតុ។
ប៉ូលិសអធិការស្រុកបន្ទាយអម្ពឹល បានឱ្យដឹងថា ជនរងគ្រោះសុទ្ធតែសាច់ញាតិបងប្អូនប្រពន្ធ និងកូនបាននាំគ្នាទៅមាត់ច្រកទ្វារតំបន់ជប់គគីទិញសម្ភារសម្រាប់ទុកចូលឆ្នាំថ្មីប្រពៃណីជាតិខ្មែរខាងមុននេះ ខណៈពេលកំពុងធ្វើដំណើរត្រឡប់មកផ្ទះវិញ ស្រាប់តែបានជួបគ្រោះអកុសលមួយ ខណៈអ្នកបើកបរគោយន្តកន្ត្រៃចុះពីលើភ្នំក្នុងល្បឿនយ៉ាងលឿន បណ្តាលឱ្យក្រឡាប់ចាក់មនុស្សចោលធ្វើឱ្យស្លាប់ម្នាក់នៅនឹងកន្លែងកើតហេតុ និងមនុស្សប្រុសស្រីចាស់ក្មេងផ្សេងៗទៀតរងរបួសធ្ងន់នាំទៅសង្គ្រោះឯប្រទេសថៃ ចំណែកអ្នកស្លាប់បានប្រគល់សពទៅឱ្យសាច់ញាតិបុណ្យទៅតាមប្រពៃណី៕
ចែករំលែកព័តមាននេះ