ខេត្តសៀមរាប ៖ សមត្ថកិច្ចបានឲ្យដឹងថា ចោរឆក់កាបូបជើងខ្លាំង នៅភ្នំពេញចំនួន២នាក់ បានមកធ្វើសកម្មភាពឆក់កាបូបភ្ញៀវទេសចរណ៍នៅកណ្តាលក្រុងសៀមរាបបានសម្រេច រួចប្រុងគេចខ្លួន ។ ប៉ុន្តែត្រូវបានកម្លាំងនគរបាលចម្រុះនៃខេត្តសៀមរាបបានសហការគ្នាដេញប្រផាប់ចាប់ប្រផីងបានដោយជោគជ័យ ។
ហេតុការណ៍ចុះបង្ក្រាបនេះធ្វើឡើងនៅម៉ោង២១និង៣០នាទី ថ្ងៃទី១១ ខែមេសា ឆ្នាំ២០១៩ នៅចំណុចផ្លូវប៊េតុងក្បែរស្ពានអាងក្រពើ ភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប ។ លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលព្រហ្មទណ្ឌនៃស្នងការដ្ឋានខេត្តសៀមរាប បានឲ្យដឹងថា ដោយទទួលបានព័ត៌មានពីជនរងគ្រោះឈ្មោះ Adriana sislova ភេទស្រី អាយុ២៨ឆ្នាំ ជនជាតិឆេកូស្លូវាគី ថា មានចោរឆក់កាបូបទើបកម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងនគរបាលទេសចរណ៍ កម្លាំងនគរបាលការពារ និងអន្តរាគមន៍បានធ្វើការល្បាតប្រទាក់ក្រឡាគ្នា តាមគោលដៅដែលបានកំណត់រហូតដល់ដេញប្រផាប់ចាប់ប្រភីងបានជនសង្ស័យចំនួន២នាក់ ករណីឆក់កាបូបភ្ញៀវទេសចរណ៍ ។
លោកបន្តថា ដំណើររឿងនៅថ្ងៃទី១១ ខែមេសា ឆ្នាំ២០១៩ វេលាម៉ោង២១និង៣០នាទី ពេលដែលជនរងគ្រោះនិងមិត្តភក្តិចំនួនបីនាក់ទៀតកំពុងដើរនៅចំណុចផ្លូវប៊េតុងក្បែរស្ពានអាងក្រពើ ភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប ស្រាប់តែមានជនសង្ស័យចំនួនពីរនាក់បានធ្វើសកម្មភាពជិះឆក់កាបូបស្ពាយពណ៌ខ្មៅពីដៃជនរងគ្រោះខាងលើ ក្នុងនោះមាន១.កូនកាបូបដៃដាក់លុយ ពណ៌សចំនួន០១ ។ ២.កាតធនាគារចំនួន០១សន្លឹក ។ ៣.កាតធានារ៉ាប់រងធ្វើដំណើរចំនួនសន្លឹក ។ ៤.អត្តសញ្ញាណប័ណ្ណជនរងគ្រោះចំនួន០១សន្លឹក ។ ៥.ប្រាក់អាមេរិកចំនួន១០០ដុល្លារ និងប្រាក់អ៊ឺរ៉ុបចំនួន៤០អ៊ឺរ៉ូ ។ ៦.ប័ណ្ណបើកបរជនរងគ្រោះចំនួន០១សន្លឹក ក្រោយពីធ្វើសកម្មភាពឆក់បានរួចជនសង្ស័យទាំងពីរនាក់បានជិះម៉ូតូរត់គេច ពេលដែលសមត្ថកិច្ចបានទទួលព័ត៌មានរួចមកកម្លាំងការិយាល័យនគរបាលព្រហ្មទណ្ឌកម្រិតស្រាលសហការជាមួយកម្លាំងនគរបាលទេសចរណ៍កម្លាំងនគរបាលការពារនិងអន្តរាគមន៍បានធ្វើការល្បាត ប្រទាក់ក្រឡាគ្នា ចាប់ជនសង្ស័យទាំងពីរនាក់នៅចំណុចផ្លូវបំបែកតាភុល មុខហាងលក់ទូរស័ព្ទចំរើនស៊ីនហ័រ ភូមិតាភុល សង្កាត់ស្វាយដង្គំ ក្រុង-ខេត្តសៀមរាប ។
ជនសង្ស័យមានឈ្មោះ ម៉ី សិលា ភេទប្រុស អាយុ១៨ឆ្នាំ ទីលំនៅភូមិចារយ៉ូវ ឃុំមេទឹក ស្រុកបាកាន ខេត្តពោធិសាត់ មុខរបរជាងភ្លើងនិងឈ្មោះ វុទ្ធី បញ្ញាវុធ ភេទប្រុស អាយុ១៨ឆ្នាំ ទីលំនៅភូមិប៉ាលយ័ ឃុំប៉ាល័យ ក្រុងប៉ោយប៉ែត ខេត្តបន្ទាយមានជ័យ មុខរបរជាងភ្លើង ។ ទាំងពីរនាក់ស្នាក់នៅបណ្តោះអាសន្នភូមិត្រពាំងសេះ សង្កាត់គោកចក ក្រុង/ខេត្តសៀមរាប ជិះម៉ូតូមួយគ្រឿងម៉ាកស៊ុយសុគីឡេត (suzuki Let) ពណ៌ក្រហមលាយខ្មៅ សេរីឆ្នាំ២០១៥ គ្មានស្លាកលេខ ។ លោកបន្ថែមថា កម្លាំងនគរបាលជំនាញបានធ្វើការសួរនាំជនសង្ស័យទាំងពីរបានឆ្លើយសារភាពថា ខ្លួនបានចូលខេត្តសៀមរាប នៅថ្ងៃទី០៤ ខែមេសា ឆ្នាំ២០១៩ ហើយបានយកប្រាក់ដែលសល់ពីការលួចឆក់ទ្រព្យសម្បត្តិគេបានចូលគ្នាទិញម៉ូតូដែលធ្វើសកម្មភាពលួចឆក់ខាងលើ ហើយធ្លាប់បានធ្វើសកម្មភាពឆក់ក្នុងនៅក្នុងរាជធានីភ្នំពេញចំនួន០៤លើកកន្លងមក ។
ជនសង្ស័យទាំងពីរពុំមានផ្ទុកសារធាតុញៀនទេ ។ ចំពោះវត្ថុតាងត្រូវបានកម្លាំងនគរបាលជំនាញដកហូតពីជនសង្ស័យប្រគល់ជូនទៅជនរងគ្រោះវិញ ។ បច្ចុប្បន្នករណីនេះកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្តសៀមរាប កំពុងរៀបចំសំណុំរឿងបញ្ជូនខ្លួនជនសង្ស័យទាំង២ទៅតុលាការដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ