រាជធានីភ្នំពេញ ៖ យុវជនដែលជាជនជាតិចិនម្នាក់ ខណៈពេលចូលទៅស្នាក់នៅក្នុងផ្ទះសំណាក់មួយកន្លែងបានមានទំនាស់ជាមួយស្ត្រីម្នាក់ទៀត ដែលជាជនជាតិចិនដូចគ្នា និងជាថៅកែផ្ទះសំណាក់រឿងតម្លៃជួលបន្ទប់ដេក ។ ដែលជាហេតុធ្វើឲ្យយុវជននេះខឹងក៏បានធ្វើសកម្មភាពគាស់ទូលួចយក លិខិតឆ្លងដែនដែលថៅកែផ្ទះសំណាក់ដកពីភ្ញៀវទុកអស់ចំនួន១០ក្បាល រួចហើយបានហែកកម្រាលពូកជាចម្រៀកតភ្ជាប់គ្នាចងជាប់បង្អួចសម្រូតចុះក្រោមគេចខ្លួនបាត់ ។
ក្រោយមកស្ត្រីថៅកែផ្ទះសំណាក់បានដាក់ពាក្យប្ដឹងចូលប៉ុស្តិ៍នគរបាលកាកាប២ ឲ្យជួយធ្វើការស្រាវជ្រាវរហូតឈានដល់ការចាប់ខ្លួនបាន និងដកហូតបានលិខិតឆ្លងដែនទាំងអស់នោះមកវិញ ។ ហេតុការណ៍នេះបានកើតឡើងកាលពីវេលាម៉ោង៣និង១០នាទីទៀបភ្លឺ ថ្ងៃទី១០ ខែមេសា ឆ្នាំ២០១៩ នៅផ្ទះសំណាក់«អានតា» មានទីតាំងស្ថិតនៅក្នុងភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវចាប់ខ្លួននោះឈ្មោះ LISHENGYUN អាយុ២១ឆ្នាំ ជនជាតិចិន មុខរបរមិនពិតប្រាកដ ស្នាក់នៅបន្ទប់ជួលលេខ១០២ ក្នុងផ្ទះសំណាក់ អានតា ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។ ចំណែកស្ត្រីជាថៅកែផ្ទះសំណាក់ខាងលើឈ្មោះ Ling Xiang ជាជនជាតិចិនអាយុ៣៥ឆ្នាំ ស្នាក់នៅក្នុង ផ្ទះសំណាក់ខាងលើ ។ ត្រូវជនសង្ស័យលួចលិខិតឆ្លងដែនដែលដកពីជនជាតិចិនភ្ញៀវចំនួន១៨ក្បាល ប៉ុន្តែក្រោយចាប់ខ្លួនត្រូវបាននគរបាលដកហូតបានមកវិញ ។
តាមប្រភពព័ត៌មានបានឲ្យដឹងថា កាលពី១២និង២៧នាទីរសៀលថ្ងៃទី០៤ ខែមេសា ឆ្នាំ២០១៩ ជនសង្ស័យខាងលើបានចូលទៅស្នាក់នៅក្នុងបន្ទប់លេខ៣០២ ជាន់ទី៣ ផ្ទះសំណាក់ខាងលើ ។ ក្រោយមកបានមានទំនាស់ជាមួយស្ត្រីថៅកែផ្ទះសំណាក់រឿងតម្លៃស្នាក់នៅ ដោយសុំឲ្យថៅកែចោល១៥ដុល្លារ ប៉ុន្តែថៅកែមិនព្រម ទើបទាស់ពាក្យសម្ដីគ្នាមួយប្រាវ ។ លុះដល់ពេលកើតហេតុជននេះក៏បានធ្វើសកម្មភាពគាស់ទូលួចយកលិខិត ឆ្លងដែន បន្ទាប់មកបានហែកកម្រាលពូកជាចម្រៀកៗចងតភ្ជាប់គ្នាសម្រូតចុះពីជាន់ទី៣ រួចគេចខ្លួនបាត់ស្រមោល ។ ប្រភពដដែលបានបន្តថា បន្ទាប់មកជនសង្ស័យបានគេចខ្លួនទៅសម្ងំដេកនៅផ្ទះសំណាក់មួយ ស្ថិតនៅក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ចំណែកស្ត្រីរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកាកាប២ ឲ្យជួយធ្វើការស្រវជ្រាវ ។
លុះរហូតវេលារសៀលថ្ងៃដដែលមានជនជាតិចិនម្នាក់មិនស្គាល់ឈ្មោះដែលស្គាល់លេខទូរស័ព្ទរបស់ស្ត្រីថៅកែផ្ទះសំណាក់បានឆាតមកប្រាប់ថៅកែរូបនោះពីទីតាំងដែលជនសង្ស័យកំពុងស្នាក់នៅ ទើបថៅកែផ្ទះសំណាក់រាយការណ៍ជូននគរបាលចុះទៅសហការណ៍ជាមួយកម្លាំងនគរបាលប៉ុស្តិ៍ជ័យជំនះធ្វើការចាប់ខ្លួនបានតែម្ដង ។ បន្ទាប់មកបានដកហូតយកលិខិតឆ្លងដែនទាំ១៨ក្បាលប្រគល់ជូនស្ត្រីរងគ្រោះវិញ រួចនាំខ្លួនជនសង្ស័យទៅកាន់ប៉ុស្តិ៍ធ្វើការសាកសួរ និងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ