រាជធានីភ្នំពេញ ៖ កម្លាំងអន្តរាគមន៍ខណ្ឌពោធិ៍សែនជ័យល្បាតពួនស្ទាក់មូលដ្ឋានឃើញជនសង្ស័យជិះម៉ូតូឆក់កាបូបនារីជនជាតិចិនម្នាក់ហើយបានដេញឃាត់បាន២នាក់ភ្លាមៗផងដែរ បង្កអោយមានការភ្ញាក់ផ្អើលកាលពីវេលាម៉ោង១០និង៤០នាទីយប់ ថ្ងៃទី១០ ខែមេសា ឆ្នាំ២០១៩ នៅតាមបណ្ដោយផ្លូវសហព័ន្ធរុស្ស៊ីទល់មុខប្រលានយន្តហោះអន្តរជាតិភ្នំពេញ ដែលស្ថិតនៅភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ។
ជនសង្ស័យដែលសមត្ថកិច្ចឃាត់បាន២នាក់ទី១ឈ្មោះលឹម លាងហេង អាយុ១៧ឆ្នាំ មុខរបរកម្មរសំណង់ រស់នៅភូមិថ្មគោល សង្កាត់ចោមចៅទី២ ខណ្ឌពោធិ៍សែនជ័យ និងជន សង្ស័យទី២ឈ្មោះ ជាង សី អាយុ១៥ឆ្នាំ ស្នាក់នៅក្បែរសាលាគោកបញ្ជាន់ ភូមិចោមចៅទី២ សង្កាត់ចោមចៅទី២ ខណ្ឌពោធិ៍សែនជ័យ មានទីលំនៅកំណើតឃុំសំពៅពូន ស្រុកកោះធំ ខេត្តកណ្តាល ។
ជនសង្ស័យជិះម៉ូតូម៉ាក Click ពណ៌ខ្មៅ អត់ផ្លាកលេខ ដែលជាម៉ូតូថ្មីជិះទើបបានជាង១០០គីឡូនៅឡើយ ។ ចំណែកជនរងគ្រោះឈ្មោះ ZENG CHUN ភេទស្រី អាយុ៤២ឆ្នាំ ជាជនជាតិចិនដីគោក ស្នាក់នៅភូមិកើតហេតុខាងលើ ។ លុយដែលជនសង្ស័យឆក់កាបូបសរុបមានលុយដុល្លារចំនួន៣ម៉ឺនដុល្លារ និង លុយចិន១៥៦៦យ័ន ។
តាមប្រភពព័ត៌មានពីសមត្ថកិច្ចអន្តរាគមន៍ខណ្ឌពោធិ៍សែនជ័យបានឱ្យដឹងថា មុនពេលកើតហេតុពួកគាត់មានគ្នា៨នាក់ជិះម៉ូតូធំចំនួន៤គ្រឿងបានចេញល្បាតក្នុងភូមិសាស្ត្រ លុះបើកម៉ូតូមកដល់ចំណុចកើតហេតុនៅតាមបណ្ដោយផ្លូវសហព័ន្ធរុស្ស៊ីទៅមុខព្រលានយន្តហោះអន្តរជាតិភ្នំពេញ ស្រាប់តែឃើញជនសង្ស័យជិះម៉ូតូឆក់កាបូបពីស្ត្រីជនជាតិចិនម្នាក់ដែលកំពុងដើរលេងនៅតាមផ្លូវបណ្តាលឲ្យដួលហើយយកកាបូបពីជនរងគ្រោះបានភ្លាមផងដែរ ។
ប្រភពព័ត៌មានបានបន្តទៀតថា ពេលភ្លាមៗនោះកម្លាំងអន្តរាគមន៍ខណ្ឌពោធិ៍សែនជ័យខាងលើបានជិះដេញជនសង្ស័យដោយមានគ្នា៤នាក់ជិះម៉ូតូ២គ្រឿង ខណៈពេលនោះកម្លាំងនគរបាលអន្តរាគមន៍ខណ្ឌពោធិ៍សែនជ័យបានផ្ទុះអាវុធចំនួនប្រមាណ៣ទៅ៤គ្រាប់ហើយបណ្តាលឲ្យជនរងគ្រោះភ័យដួលម៉ូតូឃាត់បានជនសង្ស័យ២នាក់ភ្លាមៗផងដែរ ហើយបញ្ជូនជនសង្ស័យខាងលើទៅប៉ុស្តិ៍នគរបាលដើម្បីសាកសួរបន្ត ។
បើតាមការបកប្រែពីនារីរងគ្រោះបាននិយាយប្រាប់ថា នៅមុនពេលកើតហេតុ ជនរងគ្រោះមានគ្នា២នាក់ដើរទស្សនាតាមផ្លូវឃើញប្រជាពលរដ្ឋខ្មែរប្រុសស្រីកំពុងលេងល្បែងប្រជាប្រិយនៅជិតសណ្ឋាគាររបស់គាត់ក៏បានយកទូរស័ព្ទថតរូបភាពទុក ខណៈពេលកំពុងតែថតក៏ត្រូវបានជនសង្ស័យឆក់កាបូបគាត់បណ្តាលឲ្យដួលរងរបួសធ្ងន់ផងដែរតែសំណាងល្អជនសង្ស័យត្រូវបានសមត្ថកិច្ចឃាត់បានភ្លាមៗ ។
ក្រោយពេលកើតហេតុសមត្ថកិច្ចនគរបាលប៉ុស្តិ៍ចោមចៅ៣បានប្រគល់លុយអោយជនរងគ្រោះវិញភ្លាមៗផងដែរ ចំណែកឯជនសង្ស័យឆក់កាបូបខាងលើត្រូវបានសមត្ថកិច្ចសាកសួរ និងកសាងសំណុំរឿងបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធី ៕
ចែករំលែកព័តមាននេះ