ខេត្តបាត់ដំបង ៖ កុមារអាយុទើប១៤ឆ្នាំម្នាក់ ត្រូវកម្លាំងនគរបាលមូលដ្ឋានឃាត់ខ្លួនភ្លាមៗ ក្រោយពីលេងកាំភ្លើងច្នៃ ហើយរាលកៃផ្ទុះបណ្ដាលឱ្យត្រូវកុមារាម្នាក់ទៀតស្លាប់ កាលពីវេលាម៉ោង១០ព្រឹកថ្ងៃទី០៩ មេសា ស្ថិតនៅចំណុចភូមិដូនត្រឹក ឃុំតាសាញ…
ខេត្តបាត់ដំបង ៖ កុមារអាយុទើប១៤ឆ្នាំម្នាក់ ត្រូវកម្លាំងនគរបាលមូលដ្ឋានឃាត់ខ្លួនភ្លាមៗ ក្រោយពី
លេងកាំភ្លើងច្នៃ ហើយរាលកៃផ្ទុះបណ្ដាលឱ្យត្រូវកុមារាម្នាក់ទៀតស្លាប់ កាលពីវេលាម៉ោង១០ព្រឹកថ្ងៃទី
០៩ មេសា ស្ថិតនៅចំណុចភូមិដូនត្រឹក ឃុំតាសាញ ស្រុកសំឡូត។
មន្ត្រីមូលដ្ឋានបានរាយការណ៍ថា ករណីរាលកៃកាំភ្លើងច្នៃបណ្ដាលឱ្យស្លាប់មនុស្សខាងលើនេះ បង្កឡើងដោយកុមារាឈ្មោះមួង ម៉េត អាយុជាង១៤ឆ្នាំ ។ រីឯជនរងគ្រោះឈ្មោះ ខុន ស៊ីថៃ ភេទប្រុស អាយុ៩ឆ្នាំ ដែលរស់នៅក្នុងភូមិ-ឃុំកើតហេតុជាមួយគ្នាខាងលើនេះ ។
មន្ត្រីដដែលឱ្យដឹងទៀតថា ឈ្មោះមួង ម៉េត នេះ បានយកកាំភ្លើងកែច្នៃរបស់ឪពុក ដែលបានបញ្ចូលគ្រាប់ជាស្រេចមកលេង ហើយក៏បានរាលកៃផ្ទុះត្រូវចំក្មេងប្រុសឈ្មោះខុន ស៊ីថៃ ត្រង់មាត់ធ្លាយចេញតាមគុម្ពត្រចៀកម្ខាងទៀត បណ្តាលឲ្យស្លាប់ភ្លាមៗនៅកន្លែងកើតហេតុ ។
តាមការបំភ្លឺនានាពីអ្នកភូមិបានឲ្យដឹងថា ដំបូងគេមិនបានដឹងឬបានឃើញក្មេងប្រុសទាំង២នាក់នេះនាំគ្នាយកកាំភ្លើងច្នៃនោះ មកលេងទេ លុះពេលឮស្នូរផ្ទុះទើបមានការភ្ញាក់ផ្អើល ។ អ្នកភូមិបានប្រាប់សមត្ថកិច្ចថា ក្រោយឮសំឡេងផ្ទុះ គេបាននាំគ្នារត់ទៅមើលស្រាប់តែឃើញកុមារាឈ្មោះស៊ីថៃ ដេកស្ដូកជោកទៅឈាមនិងបាត់ដង្ហើមទៅហើយ ខណ:ឈ្មោះម៉េត ដែលជាអ្នកបង្កហេតុអង្គុយកាន់កាំភ្លើងក្នុងដៃទាំងមុខស្លេកស្លាំង តែគេមិនបានរត់គេចទៅណាទេ ហើយពេលនោះអ្នកភូមិក៏បានរាយការណ៍ប្រាប់សមត្ថកិច្ចឲ្យជួយអន្តរាគមន៍ភ្លាមៗដែរ។
លោកឧត្តមសេនីយត្រីជេត វណ្ណនី ស្នងការរងខេត្តបានមានប្រសាសន៍ថា បើតាមការសាកសួររបស់មន្ត្រីជំនាញកាំភ្លើងដែលបង្កគ្រោះថ្នាក់នោះ គឺជាកាំភ្លើងកែច្នៃ ហើយវាជារបស់ឪពុកជនដៃដល់នោះតែម្ដង ។ លោកស្នងការរងបានប្រាប់ថា ពេលនេះ លោកស្នងការខេត្តនិងលោកព្រះរាជអាជ្ញា បានបញ្ជាសមត្ថកិច្ខឃាត់ខ្លួនក្មេងប្រុសបង្កហេតុនោះហើយដែលជាប់សង្ស័យពីបទ«មនុស្សឃាតដោយអចេតនា»។ រីឯឪពុកជនដៃដល់ដែលជាម្ចាស់កាំភ្លើងច្នៃ ក៏ត្រូវបានហៅមកសាកសួរដែរ ពាក់ព័ន្ធនឹងការកែច្នៃ និងរក្សាអាវុធខុសច្បាប់។
ប៉ុន្តែលោកជេត វណ្ណនី ក៏បានបញ្ជាក់ដែរ ជុំវិញជនដៃដល់ដែលមានអាយុជាង១៤ឆ្នាំ ដោយលោកបានប្រាប់ថា ពេលនេះយើងបានឃាត់ខ្លួនជនដៃដល់ ជាបណ្ដោះអាសន្នយកមកសួរនាំ ដើម្បីកសាងសំណុំរឿងបញ្ជូនទៅតុលាការតាមនីតិវិធី ។ ប៉ុន្តែចំពោះការចោរប្រកាន់បែបណាទៅលើជនសង្ស័យ ឬសម្រេចឃុំខ្លួន ឬមិនឃុំខ្លួននោះ វាអាស្រ័យលើការសម្រេចរបស់តំណាងអយ្យការ តែយ៉ាងណាមន្ត្រីជំនាញកំពុងចាត់ការលើករណីនេះហើយ៕
ចែករំលែកព័តមាននេះ