រាជធានីភ្នំពេញ ៖ សម្តេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានស្នើឲ្យសមត្ថកិច្ចត្រួតពិនិត្យគ្រឿងញៀន និងគ្រឿងស្រវឹងនៅកន្លែងត្រួតពិនិត្យយានយន្តតែម្តង ។ សម្តេចស ខេង…
រាជធានីភ្នំពេញ ៖ សម្តេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានស្នើឲ្យសមត្ថកិច្ចត្រួតពិនិត្យគ្រឿងញៀន និងគ្រឿងស្រវឹងនៅកន្លែងត្រួតពិនិត្យយានយន្តតែម្តង ។ សម្តេចស ខេង បានថ្លែងក្នុងកិច្ចប្រជុំត្រួតពិនិត្យលទ្ធផលការងារសុវត្ថិភាពចរាចរណ៍ផ្លូវគោកប្រចាំត្រីមាសទី១ ឆ្នាំ២០១៩ កាលពីថ្ងៃទី៩ ខែមេសា ឆ្នាំ២០១៩ នៅទីស្តីក្រសួង។
ថា ខ្ញុំគាំទ្រចំពោះមតិរបស់លោកទេសរដ្ឋមន្ត្រីស៊ុន ចាន់ថុល ចំពោះបញ្ហាត្រួតពិនិត្យគ្រឿងញៀន និងគ្រឿងស្រវឹង ប៉ុន្តែខ្ញុំចង់បន្ថែមចំនុចមួយទៀត ប្រយុទ្ធប្រឆាំងគ្រឿងញៀនសហការជាមួយនឹងក្រុមការងារដែលចុះឈាករថយន្ត ដើម្បីឆែកឆេរគ្រឿងញៀនផងដែរ ។សម្តេចបញ្ជាក់ថា« យើងទៅឆែកត្រង់ហ្នឹង ។
តាមឮក្រុមហ៊ុនដែលមានរថយន្តច្រើនយើងឃើញថា ក្នុងចំណោមអ្នកបើកបរ គឺមានជក់គ្រឿងញឿន តិច ឬច្រើន ប៉ុន្តែ គឺមានអីញ្ចឹងតែម្តង ។ អាហ្នឺង គឺយើងជួយពួកគាត់ទេព្រោះថាពេលខ្លះអ្នកបើកធ្វើបាបថៅកែផងដែរ តាមខ្ញុំដឹង គឺអីញ្ចឹង ។ ឥឡូវយើងត្រួតពិនិត្យនៅកន្លែងណាខ្លះ» ។ សម្តេចក៏បានបញ្ជាក់ឲ្យបន្តសហការត្រួតពិនិត្យសាធាតុញៀនបន្ថែមទៀតដូចជាស្រវឹងស្រាលើកអ្នកបើកបរ ពិសេសអ្នកបើករថយន្តធំៗ រថយន្តដឹកស៊ីម៉ង់ រថយន្តដឹកអ្នកដំណើរ ដោយគិតទាំងអ្នកបើកជាមួយ (ព្រូឡាន) ។ ត្រូវត្រួតពិនិត្យចាប់ពីដើមទី ឬចុងទី ហើយចៃដន្យនៅពាក់កណ្តាលផ្លូវ ។
សម្តេចស ខេង ក៏បានលើកឡើងថា ការត្រួតពិនិត្យទាំងគ្រឿងស្រវឹង និងគ្រឿងញៀនដូច្នេះត្រូវមានឧបករណ៍ពិនិត្យសាធាតុញៀនផង និងឧបករណ៍ពិនិត្យគ្រឿងស្រវឹងផង ។ សម្តេចបញ្ជាក់ថា «ភារៈកិច្ចរបស់ក្រសួងសាធារណៈ និងដឹកជញ្ជូន គឺឈៀក (ត្រួតពិនិត្យ) ឡានត្រួតពិនិត្យប័ណ្ណបើកបរ ។ ចំណែកតួនាទីសមត្ថកិច្ចត្រួតពិនិត្យគ្រឿងញៀន និងគ្រឿងស្រវឹងនៅកន្លែងនឹងតែម្តង» ។ ជាមួយគ្នានោះដែរ សម្តេចក៏បានឲ្យក្រសួងសាធារណការ និងដឹកជញ្ជូនធ្វើការសហការជាមួយក្រុមហ៊ុននានា ដើម្បីត្រួតពិនិត្យអ្នកបើកបរក៏ដូចជា ការជ្រើសរើសអ្នកបើកបរផងដែរ ។ ត្រូវពិនិត្យអ្នកចូលរៀនបើកបរទាំងអស់ នៅមុនពេលចូលរៀនបើកបរ ឬក្រោយរៀនបើកបរ ដោយត្រូវសហការជាមួយសាលាឯកជន ។
សម្តេចក្រឡាហោមក៏បាន «ខ្ញុំគិតថា ដើម្បីកុំឲ្យខាតពេល យើងគួរពិនិត្យក្រោយពេលរៀន និងមុនពេលចេញប័ណ្ណបើកបរ ដើម្បីកុំឲ្យរំខាន ។ អីញ្ចឹងពេលរៀនទុកឲ្យខាងក្រសួងសាធារណការសម្រេចជ្រើសរើស ដើម្បីឲ្យទៅរៀន ។ ដល់ពេលរៀនហើយ សូមឲ្យសាលាបង្រៀនបើកបរផ្តល់ព័ត៌មាន មកឲ្យអគ្គស្នងការនគរបាល ដើម្បីឲ្យគេទៅពិនិត្យគ្រឿងញៀនមុននឹងចេញប័ណ្ណបើកបរឲ្យ» ៕
ចែករំលែកព័តមាននេះ