រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា ស្ត្រីម្នាក់ត្រូវបានចោរឆក់កាបូបបណ្តាលឲ្យធ្លាក់ពីលើម៉ូតូដួលបោកក្បាលទៅក្រោយរងរបួសធ្ងន់ ត្រូវបានបញ្ជូនទៅមន្ទីរពេទ្យហុងហាក់ ក្រោយមកក៏បញ្ជូនទៅកាន់មន្ទីរពេទ្យកាល់ម៉ែត្រសង្គ្រោះបន្ទាន់ ដែលហេតុការណ៍គ្រោះថ្នាក់ខាងលើនេះកើតឡើងនៅវេលាម៉ោង៦និង១០នាទីព្រឹកថ្ងៃទី១០ ខែមេសានេះ នៅលើចំណុចវិថីព្រះមុន្នីរ៉េត ក្នុងសង្កាត់បឹងសាឡាង ខណ្ឌទួលគោក ខាងកើតស្ពានអាកាសស្ទឹងមានជ័យប្រមាណជា២០០ម៉ែត្រ ។
សេចក្តីរាយការណ៍បានបន្តថា ជនសង្ស័យមានតែម្នាក់ឯង ហើយជិះម៉ូតូមួយគ្រឿងធ្វើសកម្មភាពឆក់បានសម្រេច ទើបបណ្តាលឲ្យស្ត្រីខាងលើធ្លាក់ពីលើម៉ូតូបោកក្បាលដួល ។
មុនពេលកើតហេតុជនរងគ្រោះធ្វើដំណើរមកផ្សារដើមគរ ហើយត្រឡប់ទៅផ្ទះកូននៅបឹងក្រពើដែលហៅម៉ូតូដុបទាំងទៅទាំងមកផ្សារ លុះធ្វើដំណើរដល់ចំណុចខាងលើក៏ស្រាប់តែមានជនសង្ស័យខាងលើជិះស្របគ្នា ហើយបានធ្វើសកម្មភាពឆក់កាបូបគាត់តែម្តង រួចហើយក៏ជិះគេចខ្លួនបាត់ ។
ចំណែកក្នុងកាបូបនោះយើងមិនបានដឹងថា មានទឹកប្រាក់ប៉ុន្មាននោះទេ តែលុយចំនួន៩ម៉ឺនជាងត្រូវបានជ្រុះចេញពីកាបូបក្នុងពេលធ្វើសកម្មភាពឆក់ តែត្រូវបានអ្នករត់ម៉ូតូឌុប និងសមត្ថកិច្ចរក្សារទុកដើម្បីឲ្យបងប្អូនជនរងគ្រោះវិញ ។
បញ្ជាក់៖ ស្ត្រីខាងលើពុំទាន់ស្គាល់អត្តសញ្ញាណនៅឡើយទេ ខណៈនេះសមត្ថកិច្ចកំពុងស្រាវជ្រាវរកប្អូន ។
ចែករំលែកព័តមាននេះ