ខេត្តស្វាយរៀង ៖ រថយន្តដឹកទំនិញមួយគ្រឿងទំនងអ្នកបើកបរងងុយដេក បានរេចង្កូតធ្លាក់ផ្លូវជ្រុលទៅបុកចូលតូបអ្នកលក់គ្រឿងទេសតាមចិញ្ចើមផ្លូវបណ្តាលឲ្យខូចខាតយ៉ាងដំណំសំណាងល្អម្ចាស់តូបរួចផុតពីគ្រោះថ្នាក់ទាំងបួននាក់ប្តីប្រពន្ធកូន ។ ករណីគ្រោះថ្នាក់ចរាចរណ៍នេះបានកើតឡើងកាលវេលាម៉ោង៥និង៣០នាទីព្រឹកថ្ងៃទី៧ មេសា នៅលេីផ្លូវជាតិលេខ១ ចន្លោះគីឡូម៉ែត្រលេខ១៣៨ លេខ១៣៩…
ខេត្តស្វាយរៀង ៖ រថយន្តដឹកទំនិញមួយគ្រឿងទំនងអ្នកបើកបរងងុយដេក បានរេចង្កូតធ្លាក់ផ្លូវជ្រុលទៅបុកចូលតូបអ្នកលក់គ្រឿងទេសតាមចិញ្ចើមផ្លូវបណ្តាលឲ្យខូចខាតយ៉ាងដំណំសំណាងល្អម្ចាស់តូបរួចផុតពីគ្រោះថ្នាក់ទាំងបួននាក់ប្តីប្រពន្ធកូន ។ ករណីគ្រោះថ្នាក់ចរាចរណ៍នេះបានកើតឡើងកាលវេលាម៉ោង៥និង៣០នាទីព្រឹកថ្ងៃទី៧ មេសា នៅលេីផ្លូវជាតិលេខ១ ចន្លោះគីឡូម៉ែត្រលេខ១៣៨ លេខ១៣៩ ចំណុចក្នុងភូមិលៀប ឃុំកណ្តៀងរាយ ស្រុកស្វាយទាប ។
បើតាមសមត្ថកិច្ចបានឲ្យដឹងថា រថយន្តបង្កហេតុម៉ាកហ៊ីយ៉ាន់ដាយពណ៌សលាយខៀវ ពាក់ស្លាកលេខ ប.មានជ័យ៣A-០០៣១ បើកបរដោយឈ្មោះ សរ ចាន់សុភ័ក្រ្ត ភេទប្រុស អាយុ៣២ឆ្នាំ មានទីលំនៅភូមិត្នោតជ្រំ៤ សង្កាត់បឹងទំពុន ខណ្ឌមានជ័យរាជធានីភ្នំពេញ បើកបរពីលិចទៅកេីត ។ លុះមកដល់ចំណុចកើតហេតុខាងលើ បានងោកមួយភាំងក៏បានរេចង្កូតជ្រុលទៅបុកចូលតូបលក់ដូរ ដែលសង់នៅមុខផ្ទះធំជាប់ចិញ្ចើមផ្លូវ ប៉ុន្តែសំណាងល្អពុំមានបង្កគ្រោះថ្នាក់ដល់ម្ចាស់តូបនោះទេ ។
ប្រភពបានបន្តទៀតថា ផ្ទះដែលរងគ្រោះនោះម្ចាស់ឈ្មោះ ពុត បារាំង ភេទប្រុសអាយុ៣៣ឆ្នាំ រស់នៅភូមិលៀប ឃុំកណ្តៀងរាយ ស្រុកស្វាយទាបមានប្រពន្ធឈ្មោះ ងួន សុខេង អាយុ២៤ឆ្នាំ មានកូន២នាក់ ម្នាក់ឈ្មោះ គីម លីហ្សា ភេទស្រី អាយុ២ឆ្នាំ និងម្នាក់ឈ្មោះ គីម សំរឹទ្ធ ភេទប្រុស អាយុ២ឆ្នាំ កំពុងដេកលង់លក់នៅក្នុងបន្ទប់ជិតចំណុចរថយន្តបុកចូលនោះដែរ តែសំណាងល្អមិនបណ្តាលឲ្យមានមនុស្សណាម្នាក់រងរបួសទេ គ្រាន់តែភ័យលស់ព្រលឹងចុងសក់នាំគ្នាស្ទុះក្រោកឡើងស្ទុះចេញមកក្រៅផ្ទះទាំងសើងមម៉ើងស្រែកឆោឡោអ្នកស្រុករត់មកជួយ ។
រីឯតូបលក់ដូរខូចខាតរោងសង់អំពីដែកប្រក់ស័ង្កសីទាំងស្រុង មានទំហំទទឹង៦,៥០ម៉ែត្រគុណនឹង១១,៦០ម៉ែត្រ និងសម្ភារមួយចំនួនទៀតដូចជា ស្រាបៀរប្រហែល២០០កេស និងភេសជ្ជៈ ទឹកបរិសុទ្ធប្រហែល៤០០កេស ទូទឹកកក២គ្រឿង ទូកញ្ចក់ដូរលុយ១គ្រឿង អីវ៉ាន់គ្រឿងទេសមួយចំនួនប៉ើងខ្ទាតខ្ចាយពាសពេញដីដែលទិញសម្រាប់លក់ពេលចូលឆ្នាំថ្មីនេះ ។
ក្រោយកេីតហេតុអ្នកបេីកបររថយន្តត្រូវសមត្ថកិច្ចឃាត់ខ្លួន នាំមកអធិការដ្ឋាននគរបាលស្រុកស្វាយទាបដើម្បីបំពេញសំណុំរឿងតាមនីតិវិធី។ រីឯរថយន្តបង្កហេតុសមត្ថកិច្ចបានយករថយន្តមកអូសទៅរក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយតាមច្បាប់ ។រាប់មិនអស់ទេកន្លងមកនេះរឿងផ្ទះដែលសង់នៅអមចិញ្ចើមផ្លូវ ត្រូវរថយន្តបុកចូលពេលយប់ក៏មាន ពេលថ្ងៃក៏មាន បង្កើតបាននូវមហន្តរាយគួរឱ្យរន្ធត់បំផុត ។ មានករណីខ្លះបាត់បង់អាយុជីវិតម្តាស់ផ្ទះក៏មានមិនតិចដែរ ៕
ចែករំលែកព័តមាននេះ