រាជធានីភ្នំពេញ ៖ ទីតាំងសង្វៀនបញ្ជល់មាន់លួចលាក់មួយកន្លែង ស្ថិតនៅភូមិកប់ស្រូវ ក្នុងសង្កាត់គោករកា ខណ្ឌព្រែកព្នៅ ត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ចុះបង្ក្រាប ដោយឃាត់ខ្លួនអ្នកញៀនល្បែងភ្នាល់ចំនួន២២នាក់ ចាប់អាគកបាន១១ក្បាល…
រាជធានីភ្នំពេញ ៖ ទីតាំងសង្វៀនបញ្ជល់មាន់លួចលាក់មួយកន្លែង ស្ថិតនៅភូមិកប់ស្រូវ ក្នុងសង្កាត់គោករកា ខណ្ឌព្រែកព្នៅ ត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ចុះបង្ក្រាប ដោយឃាត់ខ្លួនអ្នកញៀនល្បែងភ្នាល់ចំនួន២២នាក់ ចាប់អាគកបាន១១ក្បាល និងម៉ូតូ២២គ្រឿង ។ ការបង្ក្រាបល្បែងស៊ីសងនេះ ធ្វើឡើងកាលពីវេលាម៉ោង១២ថ្ងៃត្រង់ទី៧ មេសា ឆ្នាំ២០១៩ ដឹកនាំដោយលោកវរសេនីយ៍ឯក ប៊ុន សត្យាប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ។
តាមព័ត៌មានបានឱ្យដឹងថា ទីតាំងបញ្ជល់មាន់នោះ បានបើកលេងជាយូរមកហើយ ដោយមានការត្រូវរ៉ូវគ្នា ជាមួយសមត្ថកិច្ចមូលដ្ឋានផងដែរ គឺឱ្យតែពូកែសែនព្រេនអ្នកតាម្ចាស់ស្រុកមិនកាច់ទេ ។ បើហ៊ានកាច់ មានតែអ្នកតាមកពីថ្នាក់វត្តភ្នំ ព្រោះម្ចាស់សង្វៀនគិតគូរមិនដល់ ។ តាមព័ត៌មានបានឱ្យដឹងបន្តទៀតថា នៅមុនពេលកើតហេតុ គេឃើញក្រុមអ្នកញៀនល្បែង បានជួបជុំប្រមូលផ្តុំគ្នាភ្នាល់បញ្ជល់មាន់ស្រែកហោកញ្ចៀវម៉ាសេរី ។
ខណៈនោះ សមត្ថកិច្ចក៏បានឡោមព័ទ្ធដេញចាប់រត់ប្រសាច និងឃាត់ខ្លួនបាន២២នាក់ ព្រមទាំងដកហូតមាន់១១ក្បាលនិងម៉ូតូ២២គ្រឿង ។ ក្រុមអ្នកញៀនល្បែង និងវត្ថុតាងត្រូវបានសមត្ថកិច្ចបញ្ជូនទៅកាន់ការិយាល័យព្រហ្មទណ្ឌកំរិតស្រាលដើម្បីចាត់ការតាមច្បាប់ ៕
ចែករំលែកព័តមាននេះ