រាជធានីភ្នំពេញ ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈលោកស្រីភឿង សកុណា បញ្ជាក់ថាក្រសួងមានការពិបាកក្នុងការទប់ស្កាត់អំពើអសីលធម៌របស់មហាជន ឬសិល្បៈករខ្លះ ដោយសារសម័យបច្ចេកវិទ្យាជឿនលឿន ។ ការបញ្ជាក់របស់លោកស្រីរដ្ឋមន្ត្រីក្នុងកិច្ចប្រជុំជាមួយគណៈកម្មការអប់រំ…
រាជធានីភ្នំពេញ ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈលោកស្រីភឿង សកុណា បញ្ជាក់ថាក្រសួងមានការពិបាកក្នុងការទប់ស្កាត់អំពើអសីលធម៌របស់មហាជន ឬសិល្បៈករខ្លះ ដោយសារសម័យបច្ចេកវិទ្យាជឿនលឿន ។ ការបញ្ជាក់របស់លោកស្រីរដ្ឋមន្ត្រីក្នុងកិច្ចប្រជុំជាមួយគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ (គ៧) នៅវិមានរដ្ឋសភា កាលពីពេលកន្លងមកនេះ ។
លោកហ៊ុន ម៉ានី ប្រធានគណៈកម្មការបានសង្កត់ធ្ងន់ថា ស្របពេលដែលមានការអភិរក្សនូវអ្វីដែលមានស្រាប់ ការអប់រំក៏ត្រូវតែធ្វើឡើងផងដែរ ។ លោកបានគូសបញ្ជាក់ថា «ការអប់រំពីសិល្បៈដល់សាធារណជន គឺជាការលើកកម្ពស់នូវដួងព្រលឹងស្នេហាជាតិ» ។ លោកបានកត់សម្គាល់ឃើញពីវឌ្ឍនភាពជាច្រើននៅក្នុងវិស័យវប្បធម៌ និងសិល្បៈ ក្រោមការដឹកនាំរបស់លោកស្រីរដ្ឋមន្ត្រីក្នុងនោះមានការអភិរក្ស និងអភិវឌ្ឍន៍បេតិកភណ្ឌវប្បធម៌ តាមរយៈ0ការចុះបញ្ជីបេតិកភណ្ឌពិភពលោក ។
ការផ្សព្វផ្សាយសកម្មភាពវប្បធម៌ ឬការបំផុសស្នាដៃ និងការស្រាវជ្រាវ ។ ការចងក្រងឯកសារសំខាន់ៗអំពីវប្បធម៌ និងសិល្បសម្រាប់សាធារណជន និងអ្នកជំនាន់ក្រោយជាដើម ។ ចំណែកលោកជំទាវ ភឿង សកុណា បានគូសបញ្ជាក់យ៉ាងដូច្នេះថា « បញ្ហាប្រឈមមួយចំនួនរបស់ក្រសួងដូចជា ក្នុងពេលសម័យបច្ចេកវិទ្យាជឿនលឿន ពិសេសបណ្តាញសង្គមសម្បូរបែបនោះក្រសួងពិបាកទប់ស្កាត់ការផ្សព្វផ្សាយស្នាដៃសិល្បៈរបស់មហាជន ឬសិល្បៈករខ្លះដែលមានលក្ខណៈ អសីលធម៌ ឬបានធ្វើអោយប៉ះពាល់ដល់ប្រពៃណីវប្បធម៌ជាតិ» ។
ប្រធានគណៈកម្មការអប់រំយុវជនកីឡាធម្មការ កិច្ចការសាសនាវប្បធម៌ និងទេសចរណ៍នៃរដ្ឋសភា (គ៧)បានវាយតម្លៃខ្ពស់ចំពោះលទ្ធផលការងារដែលក្រសួងសម្រេចបាន និងបានចាត់ទុកកិច្ចប្រជុំនាឱកាសនេះជាវេទិកាដ៏មានប្រសិទ្ធភាពមួយក្នុងស្មារតីសហការកែលំអ និងជំរុញអនុវត្តការងារក្នុងវិស័យវប្បធម៌ និងវិចិត្រសិល្បៈនៅក្នុងនីតិកាលទី៦នេះឲ្យទទួលបាន លទ្ធផលល្អជូនដល់ប្រជាជាតិ ។
សូមជម្រាបថា ក្នុងកិច្ចប្រជុំគណៈកម្មការទី៧ នៃរដ្ឋសភាបានកត់សម្គាល់លើចំណុចប្រឈមមួយចំនួនដែលទាំងអស់នោះក៏ទទួលបានការចាប់អារម្មណ៍ពីសាធារជននាពេលកន្លងមករួមមាន ១-ការផ្ទេរមរតកសិល្បៈវប្បធម៌តាមរយៈការលើកទឹកចិត្ត និងជំរុញកម្មវិធីអប់រំបណ្តុះបណ្តាលវិស័យសិល្បៈដល់កូនខ្មែរនៅមានកម្រិត ដោយសារចំនួននៃសិស្សានុសិស្សចូលរៀននៅមានកម្រិតទាប បើធៀបទៅនឹងវិស័យផ្សេងៗដែលអាចឈានទៅរកការខ្វះអ្នកបន្តវេនសាបព្រោះ ចំណេះដឹងទៅកាន់សិល្បករ សិល្បការិនីជំនាន់ក្រោយ ។
២-យន្តការផ្សព្វផ្សាយព័ត៌មាន និងការឆ្លើយតបទៅសាធារណមតិឱ្យទាន់ពេលវេលា ដើម្បីបញ្ជៀសការភណ្ឌច្រឡំ ឬការរិះគន់ពីសាធារណៈនៅមានការខ្វះចន្លោះដែលទាមទាមឲ្យមានការសិក្សាបន្ថែម ដើម្បី ដើរទាន់ការវិវត្តនៃបច្ចេកវិទ្យា និងសង្គមដែលសាធារណជនមានសេរីភាពក្នុងការបញ្ចេញមតិបានទូលំទូលាយ ។ ៣-ស្របពេលដែលភាពជឿនលឿននៃបច្ចេកវិទ្យាកំពុងតែបើកទូលាយឱ្យ ប្រតិបត្តិការសិល្បៈមហាជនអាចបង្ហាញស្នាដៃសិល្បៈរបស់ខ្លួនយន្តការនៃការគ្រប់គ្រងរបស់ ក្រសួងក្នុងការបង្កើតស្នាដៃសិល្បៈដែលអសីលធម៌ បន្ទាបតម្លៃនៃសិល្បៈខ្មែរ និងការផ្សព្វ ផ្សាយនានាតាមបណ្តាញសង្គម នៅមិនទាន់ទប់ស្កាត់បានទាំងស្រុងនៅឡើយ ។
និង៤- រីឯការអប់រំផ្នត់គំនិតស្នេហាជាតិ និងមនសិកាស្រឡាញ់នូវវប្បធម៌ សិល្បៈក្នុងនាមជាកូនខ្មែរដែលប្រកបដោយសីលធម៌ និងគុណធម៌ខ្ពស់ ដើម្បីទប់ស្កាត់ការបង្ហាញពីមោទនភាពជាតិបែបជ្រុលនិយមក្នុងទម្រង់ណាមួយដែលអាចឈានដល់ការរើសអើងជាតិសាសន៍ជាដើម ក៏មិនទាន់បានបណ្តុះបណ្តាល និងផ្សព្វផ្សាយឱ្យទូលំទូលាយនៅឡើយ ៕
ចែករំលែកព័តមាននេះ