រាជធានីភ្នំពេញ ៖ ការស្រែកយំបានលាន់ឮទ្រហឹងពេញបន្ទប់ប្រកាសសាលក្រម ដោយក្រុមសាច់ញាតិនិងភរិយាជនត្រូវចោទបានស្រែកយំឡាំប៉ានៅមុខសាលាដំបូងរាជធានីភ្នំពេញ ខណៈជនត្រូវចោទត្រូវបានឆ្មាំពន្ធនាគារយកក្រណាត់គ្របក្បាលរុញចូលរថយន្តដឹកទៅកាន់ពន្ធនាគារព្រៃ.ស ។ នោះគឺជាការប្រកាសសាលក្រមនៅសៀលថ្ងៃទី២៦ ខែមីនា លើសំណុំរឿងឃាតកម្មបាញ់សម្លាប់ឧកញ៉ា អឹុង…
រាជធានីភ្នំពេញ ៖ ការស្រែកយំបានលាន់ឮទ្រហឹងពេញបន្ទប់ប្រកាសសាលក្រម ដោយក្រុមសាច់ញាតិនិងភរិយាជនត្រូវចោទបានស្រែកយំឡាំប៉ានៅមុខសាលាដំបូងរាជធានីភ្នំពេញ ខណៈជនត្រូវចោទត្រូវបានឆ្មាំពន្ធនាគារយកក្រណាត់គ្របក្បាលរុញចូលរថយន្តដឹកទៅកាន់ពន្ធនាគារព្រៃ.ស ។ នោះគឺជាការប្រកាសសាលក្រមនៅសៀលថ្ងៃទី២៦ ខែមីនា លើសំណុំរឿងឃាតកម្មបាញ់សម្លាប់ឧកញ៉ា អឹុង ម៉េងជឺ ដោយក្រុមឧកញ៉ា ថោង សារ៉ាត់ ។
តាមសាលក្រមរបស់សាលាដំបូងរាជធានីភ្នំពេញ បានប្រកាសផ្តន្ទាទោសជនជាប់ចោទដាក់ពន្ធនាគារក្នុងម្នាក់ៗអស់១ជីវិត ។ ជនជាប់ចោទមាន ១-ឈ្មោះ ថោង សារ៉ាត់ ថៅកែក្រុមហ៊ុន ៩៩៩ ។ ២-ឈ្មោះ សៀង វាសនា ៣-ឈ្មោះ កូយ ចាន់ថុល ៤-ឈ្មោះ មាស សម្បត្តិ និង៥-ឈ្មោះ ឈុន ចិត្រា ។ សាលក្រមបានប្រកាសជាសាធារណៈចំពោះមុខជនជាប់ចោទ៤នាក់ និងកំបាំងមុខឈ្មោះ ថោង សារ៉ាត់ ប៉ុន្តែចាត់ទុកចំពោះមុខដោយជនជាប់ជាប់ចោទមានមេធាវីការពារក្តី ចូលរួមស្តាប់ការប្រកាសសាលក្រមនេះដែរ ។
សំណុំរឿងឃាតកម្មមួយនេះ ត្រូវបានសាធារណជនតាមដានយ៉ាងយកចិត្តទុកដាក់អស់រយៈពេលជាច្រើនឆ្នាំមកហើយ ឯសវនាការក៏បានធ្វើឡើងជាច្រើនលើកច្រើនសាដែរ រហូតដល់មានសាលក្រមប្រកាសចាត់របៀបទៀតផង ។ សាធារណជនតែងតែទន្ទឹងរង់ចាំមើលសំណុំរឿងឃាតកម្មលើឧកញ៉ា អឹុង ម៉េងជឺ នេះថា តើនរណាជាឃាតករ ។ ឧកញ៉ា អឹុង ម៉េងជឺ ដែលជាថៅកែក្រុមហ៊ុនស៊ីម៉ង់ត៍ត្បូងពេជ្រ ត្រូវបានឃាតករបាញ់សម្លាប់ កាលពីយប់ថ្ងៃទី២២ ខែវិច្ឆិកា ឆ្នាំ២០១៤ នៅមុខហាងលក់ផ្លែឈើយីហោ «ឡោ តិចសេង» ស្ថិតក្នុងខណ្ឌចំការមន រាជធានីភ្នំពេញ ។ គេនៅចាំបានថា ការបាញ់សម្លាប់ឧកញ៉ា អុឹង ម៉េងជឺ នោះ ត្រូវបានថតដោយកាមេរ៉ាសុវត្ថិភាពតែម្តង និងជាសំណុំរឿងដែលលេចធ្លោបំផុតចុងឆ្នាំ២០១៤ ។
ក្រោយពីកើតមានអំពើឃាតកម្មនោះ សមត្ថកិច្ចនគរបាលការិយាល័យព្រហ្មទណ្ឌរាជធានីភ្នំពេញ បានធ្វើការស្រាវជ្រាវនិងកំណត់មុខសញ្ញា រហូតឈានដល់ការចាប់ខ្លួនជនសង្ស័យជាបន្តបន្ទាប់ចំនួន៦នាក់ ។
យោងតាមរបាយការណ៍របស់សមត្ថកិច្ចនៅក្នុងសវនាការថា ឧកញ៉ា ថោង សារ៉ាត់ ជាអ្នកផ្តើមគំនិតក្នុងអំពើឃាតកម្ម ឯឈ្មោះ សៀង វាសនា ជាអង្គរក្ស គឺជាជនដៃដល់កាន់កាំភ្លើងខ្លីចុះពីលើម៉ូតូ ដើរទៅបាញ់ប្រហារឧកញ៉ា អឹុង ម៉េងជឺ ស្លាប់ក្នុងថ្លុកឈាមនៅនឹងកន្លែង ខណៈជនរងគ្រោះចុះពីរថយន្តទំនើបមួយគ្រឿងដើរទៅរកទិញផ្លែឈើ ។ ចំណែកឈ្មោះ លី សៅ ជាអង្គរក្ស និងស្លាប់ក្នុងគុក ជាអ្នកជិះម៉ូតូឌុប ឈ្មោះ សៀង វាសនា ។ រីឯឈ្មោះ កូយ ចាន់ថុល ឈ្មោះ មាស សម្បត្តិ និងឈ្មោះ ឈុន ចិត្រា ក៏ជាប់ពាក់ក្នុងអំពើឃាតកម្មនោះដែរ ។
នៅក្នុងសវនាការលើកចុងក្រោយនេះ ជនជាប់ចោទ៤នាក់ ហាក់ដូចជាមានការកែប្រែចម្លើយវិញថា ពួកគេមិនបានសម្លាប់ឧកញ៉ា អឹុង ម៉េងជឺ ទេ ចំណែកឧកញ៉ា ថោង សារ៉ាត់ ក៏កម្របង្ហាញមុខក្នុងសវនាការថែមទៀត ។ នៅលើកចុងក្រោយនេះ តុលាការបានតម្រូវ ឲ្យអ្នកផ្តើមគំនិតចូលរួម ដើម្បីបំភ្លឺឬប្រើសិទ្ធិដោះបន្ទុកទៅលើការចោទប្រកាន់នេះ ។ ផ្ទុយទៅវិញ ថោង សារ៉ាត់ ចូលសវនាការដោយការដឹកតាមរទេះរុញ និងដឹកតាមរថយន្តសង្គ្រោះរបស់មន្ទីរពេទ្យព្រះកុសុមៈ ដោយអះអាងថា ជនជាប់ចោទមានសុខភាពមិនល្អ ហើយនៅពេលតុលាការចាប់ផ្តើមបើកសវនាការ ថោង សារ៉ាត់ បែរជាកើតរោគរកកល់ចង់គាំងបេះដូងស្លាប់ ។ ពេលនោះ ប្រធានក្រុមប្រឹក្សាជំនុំជម្រះ បានអនុញ្ញាតឲ្យអនុរក្សពន្ធនាគារ រួមជាមួយពេទ្យអមដំណើរដឹក ថោង សារ៉ាត់ ទៅកាន់មន្ទីរពេទ្យវិញ ។
ចាប់តាំងពីសមត្ថកិច្ចចាប់ខ្លួន និងឃំុខ្លួនជាង៥ឆ្នាំ ថោង សារ៉ាត់ មិនដែលដេកនៅក្នុងពន្ធនាគារទេ គឺយកមន្ទីរពេទ្យមិត្តភាពខ្មែរ-សូវៀត ធ្វើជាកន្លែងឃុំខ្លួនបណ្តោះអាសន្ន ហើយប្រមាណជាង១ឆ្នាំចុងក្រោយនេះ ថោង សារ៉ាត់ ត្រូវបានដូរទៅដេកព្យាបាលជំងឺនៅមន្ទីរពេទ្យព្រះកុសុមៈវិញ ។ ថោង សារ៉ាត់ ដេកក្នុងមន្ទីរពេទ្យជាង៥ឆ្នាំមកហើយ មានម៉ាសីុនត្រជាក់ មានទូរទស្សន៍ និងមានទូរស័ព្ទដៃសម្រាប់ប្រើប្រាស់គ្រប់ពេលវេលា ។ បើតាមការបង្ហើបពីក្រុមអនុរក្សពន្ធនាគារដែលទៅយាមប្រចាំការខ្សឹបថា ថោង សារ៉ាត់ គ្មានជំងឺអ្វីធំដំុទេ និងស្ទើរតែគ្មានជំងឺទៀតផង ។ ប៉ុន្តែដោយសារមានលុយចេះតែបាននៅថែរក្សាសុខភាពដូច្នោះទៅ ខណៈមិនទាន់ក្លាយជាទណ្ឌិត តែពេលកាត់ទោសហើយ ថោង សារ៉ាត់ គ្មានវាសនាបានដេកម៉ាសុីនត្រជាក់ទៀតទេ ។
មានការកត់សម្គាល់ថា បន្ទាប់ពីសាលក្រមប្រកាសផ្តន្ទាទោស ថោង សារ៉ាត់ និងបក្សពួកដាក់ពន្ធនាគារម្នាក់ៗអស់១ជីវិតភ្លាម ក្រុមគ្រួសារនិងប្រពន្ធកូនពួកគេ ដែលបានចូលមកតាមដានការប្រកាសនោះ បានស្រែកឡាំប៉ានិងទ្រហោយំពេញបន្ទប់សវនាការ ធ្វើឲ្យមានការភ្ញាក់ផ្អើលគ្រប់គ្នា ។ ក្នុងចំណោមអ្នកស្រែកទ្រហោយំនេះ គេឃើញមានវត្តមានអ្នកស្រី ទាវ ធីតា ដែលជាភរិយាឧកញ៉ា ថោង សារ៉ាត់ បានស្ទុះចេញទៅមុខច្រកចូលអគារសាលាដំបូង ហើយស្រែកយំខ្លាំងៗដោយចោទថា តុលាការគ្មានយុត្តិធម៌ ដាក់គុកប្តីគាត់អស់១ជីវិត ។ អ្នកស្រីនិយាយទៀតថា ប្តីគាត់មិនបានសម្លាប់ឧកញ៉ា អឹុង ម៉េងជឺ ទេ ។ ការស្រែកទ្រហោយំពីសំណាក់ក្រុមគ្រួសារ និងសាច់ញាតិជនជាប់ចោទ នៅមុខសាលាដំបូងរាជធានីភ្នំពេញ ធ្វើឲ្យមន្ត្រីបម្រើការនៅសាលា ដំបូង និងអ្នកដំណើរតាមផ្លូវភ្ញាក់ផ្អើលផងដែរ ។
លុះពេលរសៀលបន្តិច អនុរក្សពន្ធនាគារបានដឹកជនជាប់ចោទ៤នាក់ ដោយគ្មាន ថោង សារ៉ាត់ទេ ចេញ
ពីសាលាដំបូង ទៅឃុំនៅពន្ធនាគារព្រៃសវិញ ។ ពេលនោះប្រពន្ធកូន និងសាច់ញាតិជនជាប់ចោទបាននាំ
គ្នាឈររារាំងរថយន្តរបស់ពន្ធនាគារមិនឲ្យដឹកប្តី និងឪពុកចាកចេញ ។ ទោះជាយ៉ាងណា ការអនុវត្តច្បាប់ដោយកម្លាំងនគរបាលគោលដៅការពារសាលាដំបូង សហការជាមួយនគរបាលមូលដ្ឋានខណ្ឌ៧មករា
បានធ្វើអន្តរាគមន៍ ចាប់ប្រពន្ធ កូន និងសាច់ញាតិជនជាប់ចោទចេញពីមុខរថយន្ត ទើបរថយន្តដឹកពួកគេទៅកាន់ពន្ធនាគារព្រៃសបាត់ទៅ ។ ក្រោយការប្រកាសសាលក្រមភ្លាមៗ មិនទាន់ដឹងថា នឹងមានការប្តឹងទាស់ទៅសាលាឧទ្ធរណ៍ឬបែបណាទេ ។ សាលក្រមក៏បានទុកពេល១ខែសម្រាប់ការប្តឹងទាស់នេះ ៕
ចែករំលែកព័តមាននេះ