ខេត្តតាកែវ ៖ ដោយមើលឃើញពីអាកាសធាតុបានឡើងកំដៅឥតឈប់ឈរ ហើយណាមួយខ្វះខាតទឹកសម្រាប់ធ្វើស្រែយកស្រូវផងនោះប្រជាពលរដ្ឋដែលបានកាន់កាប់ដីបឹងដោយអាស្រ័យផលបាននាំធ្វើសំណើសុំស្តា ដើម្បីស្តុបទឹកទុកសម្រាប់ទុកទឹកធ្វើស្រែតាមរយៈលោកមេឃុំ រួចលោកអភិបាលស្រុកក៏បានឯកភាព ព្រោះការយកគ្រឿងចក្រស្តាដីបឹងសម្រាប់ស្តុបទឹកទុកធ្វើស្រែនេះ គឺប្រជាពលរដ្ឋនៅជុំនេះអាចយកទឹកពីក្នុងបឹងដែលស្តានេះបាន ព្រោះការស្តាដីបឹងនេះមិនមែនជាឯកជនទេ គឺជាសាធារណៈតែម្តង ។
បើតាមសំដីម្ចាស់ដីឈ្មោះ លុយ ដារ៉ា ភេទប្រុស អាយុ៤៩ឆ្នាំ រស់នៅភូមិទួលចារ ឃុំសំរោងស្រុកសំរោង បានអោយដឹងថា ពួកគាត់បានធ្វើស្រែដោយអាស្រ័យយកផលនៅក្នុងដីបឹងនេះមានរយៈពេលជាង៣០ឆ្នាំមកហើយ ដោយមិនមានសិទ្ធអ្វីយកមកធ្វើកម្មសិទ្ធធ្វើជាប្លង់សម្រាប់កាន់កាប់ឡើយ គឺរដ្ឋយកវិញពេលណា គឺពួកគាត់ជាប្រជាពលរដ្ឋនឹងប្រគល់ជូនវិញទាំងអស់ ។
លោកលុយ ដារ៉ា បានបន្តទៀតថា ដោយមើលឃើញពីស្ថានភាពបច្ចុប្បន្ននេះ មានសភាពក្តៅហែងណាមួយវាគ្មានទឹកសម្រាប់បូមដាក់ស្រូវផង លោកក៏បានស្នើសុំដល់លោកអភិបាលស្រុកតាមរយៈលោកមេភូមិ លោកមេឃុំ ដើម្បីស្តាដីស្រែរបស់គាត់សម្រាប់ស្តុបទឹកទុកអោយបងប្អូនប្រើប្រាស់ផង និងបូមដាក់ស្រែផង ទើបនៅព្រឹកថ្ងៃទី២១ ខែមីនា ២០១៩នេះ លោកក៏បានអោយគ្រឿងចក្រមកស្តាដីនេះសម្រាប់ស្តុបទឹក ហើយក៏មិនមែនលោកអភិបាលស្រុកឯណាមកលក់ដីបឹងអោយគេកាយដីលក់នោះទេ ព្រោះជាដីរបស់ប្រជាពលរដ្ឋអាស្រ័យផល។
លោកសុខ សេង មេឃុំសំរោងបានអោយដឹងថា ដីបឹងនេះលោកបានបែងចែកជូនប្រជាពលរដ្ឋអោយធ្វើស្រែដោយអាស្រ័យយកផល តែប៉ុណ្ណោះគ្មានសិទ្ធធ្វើជាប្លង់កាន់កាប់ឡើយតែដោយសារមួយរយៈពេលប៉ុន្មានឆ្នាំចុងក្រោយនេះ ទឹកក្នុងបឹងនេះបានរីង ធ្វើអោយប្រជាពលរដ្ឋខ្វះទឹកសម្រាប់ធ្វើស្រែ នោះទើបលោកបានឯកភាព ដើម្បីអោយប្រជាពលរដ្ឋស្តាដីបឹងនេះ ដើម្បីស្តុបទឹកទុកសម្រាប់ប្រើប្រាស់ផង និងបង្កបង្កើនផលស្រូវផង មិនមែនជាការលក់ដូរដូចការនិយាយគ្មានការពិតឡើយ ។
លោកកេត ម៉ៅ អភិបាលស្រុកសំរោងបានអោយដឹងថា លោកធ្វើការងារបម្រើដល់ផលប្រយោជន៍របស់ប្រជាពលរដ្ឋ ដូច្នេះនៅពេលប្រជាពលរដ្ឋជួបការលំបាកនោះលោកនឹងចុះជួយដោះស្រាយ ។ លោកអភិបាលស្រុកបានបញ្ជាក់ថា ដូចជា ករណីដីក្នុងអាងអូតាសុខដែលប្រជាពលរដ្ឋបានធ្វើស្រែដោយអាស្រ័យផលនៅទីរាប់ឆ្នាំមកហើយនោះ រួចនៅពេលនេះពួកគាត់មានការខ្វះខាតទឹកក្នុងការធ្វើស្រែរបស់ពួកគាត់ទើបម្ចាស់ដីបានស្នើសុំស្តា ដើម្បីស្តុបទុកសម្រាប់ប្រើប្រាស់ផង និងបូមដាក់ស្រែរបស់ពួកគាត់ផង លោកក៏បានអនុញាត្តអោយស្តាហើយលោកធ្វើការងាររាល់ថ្ងៃនេះ គឺបម្រើប្រជាពលរដ្ឋចុះជួបប្រជាពលរដ្ឋមិនមែនមន្ត្រីធ្វើការតែក្នុងម៉ាស៊ីនត្រជាក់នោះទេ ៕
ចែករំលែកព័តមាននេះ