រាជធានីភ្នំពេញ ៖ រដ្ឋសភានៃព្រះរាជណាចក្រកម្ពុជានឹងបោះឆ្នោតជ្រើសរើសតាំងលោកស្រីលី វួចឡេង ជាសមាជិកក្រុមប្រឹក្សាធម្មនុញ្ញដែលមានកូតាពីរដ្ឋសភា នៅក្នុងសម័យប្រជុំពេញអង្គរដ្ឋសភានៅពេលខាងមុខនេះ ។ លោកឡេង ប៉េងឡុង អគ្គលេខាធិការដ្ឋានរដ្ឋសភា និងជាអ្នកនាំពាក្យរដ្ឋសភា បានឲ្យដឹងក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី២១ ខែមីនា ឆ្នាំ២០១៩ ក្រោមអធិបតីភាពសម្តេចហេង សំរិន ប្រធានរដ្ឋសភាថា ក្នុងកិច្ចប្រជុំបានសម្រេចជ្រើសរើសលោកស្រីលី វូចឡេង គឺជាបេក្ខជនសមាជិកក្រុមប្រឹក្សារដ្ឋធម្មនុជំនួសលោក មឹន ស៊ាង ដែលត្រូវបានចប់អាណត្តិ ។
លោកបញ្ជាក់ថា«លោកមឹន ស៊ាង ដែលជាអតីតសមាជិកក្រុមប្រឹក្សាធម្មនុញ្ញចេញពីកូតារដ្ឋសភា អីញ្ចឹងអចិន្ត្រៃយ៍រដ្ឋសភាបានសម្រេចជ្រើសរើសលោកស្រី លី វួចឡេង ដែលបានដាក់ពាក្យតែម្នាក់ហើយគោរពតាមបែបបទតាមជ្រើសរើស និងកំណត់ក្នុងច្បាប់ ។ ដូច្នេះអចិន្ត្រៃយ៍បានឯកភាពជ្រើសលោកស្រី ជាបេក្ខជនចេញពីតូតារដ្ឋសភា ជាសមាជិកក្រុមប្រឹក្សាធម្មនុញ្ញ ដើម្បីដាក់ជូនសម័យប្រជុំពេញអង្គរដ្ឋសភាបោះឆ្នោតអនុម័ត ហើយបញ្ជូនទៅធ្វើការនៅក្រុមប្រឹក្សាធម្មនុញ្ញ» ។ លោកក៏បានឲ្យដឹងថា ក្នុងកិច្ចប្រជុំអង្គប្រជុំក៏បានអនុម័តយល់ព្រម លើសំណើរសុំប្រកាសទទួលស្គាល់លោកស្រី គឹម សុវណ្ណា ជាតំណាងរាស្ត្រថ្មី មណ្ឌលរាជធានីភ្នំពេញ ជំនួសលោកប៉ា សុជាតិវង្ស ដែលបានសុំលាលែង ។
ការប្រកាសសុពលភាពនៃអាណត្តិរបស់លោកស្រី គឹម សុវណ្ណា ជាសមាជិករដ្ឋសភានីតិកាលទី៦ និងធ្វើឡើងនៅក្នុងសម័យប្រជុំរដ្ឋសភានៅពេលខាងមុខនេះ ។ ជាងនេះអង្គប្រជុំក៏បានយល់ព្រមជ្រើសតាំងលោកប្រាជ្ញា ច័ន្ទ ជាសមាជិកគណៈកម្មការសិទ្ធិមនុស្សទទួលពាក្យបណ្តឹងអង្កេត និងទំនាក់ទំនងរដ្ឋសភា និងព្រឹទ្ធសភានៃរដ្ឋសភា ដើម្បីដាក់ជូលសម័យប្រជុំរដ្ឋសភានាពេលខាងមុខនេះផងដែរ ។ ជាមួយគ្នានោះដែរអង្គប្រជុំក៏បានយល់ព្រមជ្រើសរើសតាំងលោក ច័ន្ទ សុផល ជាសមាជិកគណៈកម្មការមហាផ្ទៃការពារជាតិ និងមុខងារសាធារណៈនៃរដ្ឋសភា ដើម្បីដាក់ជូនសម័យប្រជុំរដ្ឋសភានាពេលខាងមុខនេះ ។
បើតាមលោកឡេង ប៉េងឡុងក៏បានបានឲ្យដឹងថា ក្នុងកិច្ចប្រជុំអនុម័យលើរបាយការណ៍ស្តីពីសកម្មភាពរបស់រដ្ឋសភាចន្លោះសម័យប្រជុំរដ្ឋសភាលើកទី១ និងលើកទី២ នីតិកាលទី៦ ដោយប្រគល់ជូនភារកិច្ចជូនអគ្គលេខាធិការដ្ឋានរដ្ឋសភាពិនិត្យ ។
អ្នកនាំពាក្យក៏បានឲ្យដឹងថា ក្នុងកិច្ចប្រជុំសម្តេច ហេងសំរិន ក៏ដូចជា សមាជិកអចិន្ត្រៃយ៍ទាំងអស់ក៏អំពាវនាវដល់ប្រជាជនទាំងអស់ត្រូវមានការប្រុងប្រយ័ត្នចំពោះសុខភាពក្នុងរដូវប្រាំងនេះ ដែលមានកម្តៅកើនឡើង ។ ជាងនេះឲ្យពលរដ្ឋរកវិធីក្នុងការទប់ទល់ដូចជា ការខ្វះទឹកប្រើប្រាស់ ការហូបចុក ការស្លៀកពាក់ជាដើម ។ សូមជម្រាបថា អាណត្តិរបស់សមាជិកក្រុមប្រឹក្សាធម្មនុញ្ញថ្មីមានរយៈពេល៩ឆ្នាំគឺចាប់ពីឆ្នាំ២០១៩ ដល់ ឆ្នាំ២០២៨ ៕
ចែករំលែកព័តមាននេះ