រាជធានីភ្នំពេញ ៖ យុវជន២នាក់ឡូយកប់តែម្ដង មិនខ្លាចញញើតសមត្ថកិច្ច សូម្បីតែបន្តិច សោះឡើយ ហើយទំនងឃ្លានខ្លាំងរហូតទ្រាំលែងបានហើយមើលទៅទើបនាំគ្នា សេពគ្រឿងញៀនកណ្ដាលវាល មិនបានរកបន្ទប់បិទបាំងសោះ ដែលមានប្រជាពលរដ្ឋ…
រាជធានីភ្នំពេញ ៖ យុវជន២នាក់ឡូយកប់តែម្ដង មិនខ្លាចញញើតសមត្ថកិច្ច សូម្បីតែបន្តិច សោះឡើយ ហើយទំនងឃ្លានខ្លាំងរហូតទ្រាំលែងបានហើយមើលទៅទើបនាំគ្នា សេពគ្រឿងញៀនកណ្ដាលវាល មិនបានរកបន្ទប់បិទបាំងសោះ ដែលមានប្រជាពលរដ្ឋ ជាច្រើននាក់បានប្រទះឃើញ ក៏បានរាយការណ៍ជូននគរបាលឲ្យចុះទៅធ្វើការចាប់ខ្លួន បានទាំង២នាក់ រួចនាំទៅសាកសួរ និងចាត់ការតាមច្បាប់ ។
មិនតែប៉ុណ្ណោះក្រោយចាប់ខ្លួនបានបែកធ្លាយបទល្មើស១ករណីទៀត គឺជាមុខសញ្ញា ទទួលផលចោរកម្មទិញម៉ូតចោរថែមទៀតផង។ ហេតុការណ៍នេះ បានកើតឡើង កាលពីវេលាម៉ោង១០និង៣០នាទីព្រឹកថ្ងៃទី២០ ខែមិនា ឆ្នាំ២០១៩ នៅដីវាល ស្ថិតនៅបណ្ដោយតាមផ្លូវបេតុង ក្នុងភូមិវាល សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ ។ យុវជនសង្ស័យខាងលើនេះម្នាក់ឈ្មោះ ព្រំ វិបុល អាយុ១៨ឆ្នាំ មុខរបរមិន ពិតប្រាកដ និងម្នាក់ទៀតឈ្មោះ ឈុន ស៊ីណន អាយុ១៦ឆ្នាំ មុខរបរ មិនពិតប្រាកដ ។ អ្នកទាំង២នាក់នេះមានទីលំនៅក្នុងភូមិសាមគ្គី៤ សង្កាត់ត្រពាំងក្រសាំង ខណ្ឌពោធិសែនជ័យ ។
នគរបាលដកហូតបានម៉ូតូជាប់ពាក់ព័ន្ធនឹងបទល្មើសទទួលផលចោរកម្ម១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០០៧ បកតែមស្រ៊ីនចោល បិទតែមស៊េរីឆ្នាំ២០១៩ ពណ៌ខ្មៅជំនួសវិញ ហើយម៉ូតូនេះពាក់ស្លាកលេខភ្នំពេញ 1U-3471 ។ នគរបាលបានឲ្យដឹងថា យុវជនសង្ស័យទាំង២នាក់នេះ គឺជាមុខសញ្ញាទទួលផលចោរកម្ម ហើយនៅមុនកើតហេតុ ពួកគេបាននាំគ្នាសេពគ្រឿងញៀននៅកណ្ដាលវាលតែម្ដង ។ ហើយត្រូវបានប្រជាពលរដ្ឋជាច្រើននាក់ប្រទះឃើញក៏រាយការណ៍ជូននគរបាលប៉ុស្តិ៍ត្រពាំងក្រសាំងចុះទៅកាន់កន្លែងនោះ ហើយបានឃើញអ្នកទាំង២កំពុងប្រើប្រាស់គ្រឿងញៀនពិតប្រាកដ រួចក៏បានធ្វើការចាប់ខ្លួនតែម្ដង ។
មិនតែប៉ុណ្ណោះនៅពេលភ្លាមៗបានឃើញម៉ូតូមួយគ្រឿងដែលពួកគេជិះ ខាងលើនោះអត់មានស្លាកលេខឡើយ បន្ទាប់មកនគរបាលបាននាំទៅសាកសួរ ទើបបែកធ្លាយរឿងម៉ូតូទិញពីចោរក្នុងតម្លៃ២១០ដុល្លារពីបុរសម្នាក់មិនស្គាល់អត្តសញ្ញា នៅភូមិត្រពាំងអញ្ចាញ សង្កាត់ត្រពាំងក្រសាំង រយៈពេលជាង១ខែហើយ ។ ដោយម៉ូតូមានស្លាកលេខដែរ តែពួកគេបានដោះចេញ និងបកតែមចាស់ចេញប្តូរដាក់តែមថ្មីជំនួសវិញ ព្រោះខ្លាចម្ចាស់ដើមគេស្គាល់ ៕
ចែករំលែកព័តមាននេះ