ខេត្តព្រះសីហនុ ៖ តាមសេចក្តីរាយការណ៍ព័ត៌មានបឋមបានឱ្យដឹងថា មានគ្រោះថ្នាក់ចរាចរណ៍២ករណីផ្ទួនគ្នាបង្កឡើងដោយរថយន្ត២គ្រឿងក្រឡាប់ដោយខ្លួនឯង ត្រង់ចំណុចកើតហេតុតែមួយ នៅលើដងផ្លូវជាតិលេខ៤ ចន្លោះគីឡូម៉ែត្រលេខ១៥៩-១៦០ ស្ថិតក្នុងភូមិមនោរម្យ ឃុំតានៃ ស្រុកព្រៃនប់ កាលពីវេលាម៉ោង២និង៥០នាទីទៀបភ្លឺឈានចូលថ្ងៃទី១៩ មីនា ឆ្នាំ២០១៩ ។
តាមសេចក្តីរាយការណ៍បានឱ្យដឹងថា ករណីទី១-រថយន្តមួយគ្រឿងដែលក្រឡាប់ដោយខ្លួនឯងនៅចំណុចកើតហេតុខាងលើ ម៉ាកហ៊ីយ៉ាន់ដាយ ប្រភេទ២តោនកន្លះ ក្បាលពណ៍ខៀវ ពាក់ស្លាកលេខ ភ្នំពេញ ៣A-៣២៩៥ បើកបរដោយឈ្មោះជា សំណាង ភេទប្រុស អាយុ៤៥ឆ្នាំ មុខរបរបើកបរ មានទីលំនៅម័ល ឃុំដង្កោ ខណ្ឌដង្កោ រាជធានីភ្នំពេញ ។
ករណីទី២-រថយន្តមួយគ្រឿងទៀតដែលក្រឡាប់ដោយខ្លួនឯងនៅចំណុចកើតហេតុខាងលើម៉ាកកូរ៉េ ប្រភេទ២តោនកន្លះ ពណ៌ស ពាក់ស្លាកលេខ ព្រះសីហនុ ៣A-៧៣៨៧ បើកបរដោយឈ្មោះវ៉ាន់ ទូ ភេទប្រុស អាយុ៣២ឆ្នាំ មុខបរបរបើកបរ មានទីលំនៅ ភូមិអូរចំណា ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
តាមសេចក្តីរាយការណ៍បានឱ្យដឹងបន្តថា រថយន្តទាំង២គ្រឿងខាងលើបើកបរក្នុងទិសដៅពីភ្នំពេញទៅខេត្តព្រះសីហនុ លុះមកដល់ចំណុចកើតហេតុខាងលើ ដោយសាររថយន្តមានល្បឿនលឿនហើយរអិលទឹកភ្លៀងផងនោះ ក៍បណ្តាលឱ្យក្រឡាប់ទៅខាងស្តាំដៃដែលមានចម្ងាយពីគ្នាប្រមាណ៣០ម៉ែត្រ ។
ករណីរថយន្ត២គ្រឿងក្រឡាប់ដោយខ្លួនឯងនៅចំណុចតែមួយខាងលើនេះបានបណ្តាលឱ្យរថយន្តទាំង២គ្រឿងរងការខូចខាតអស់៥០ភាគរយ និងបាក់បង្គោលសុវត្ថិភាពចំនួន៧ដើម តែពុំបង្កឱ្យមានគ្រោះថ្នាក់ដល់មនុស្សណាម្នាក់ឡើយ ។
ក្រោយពេលកើតហេតុ កំលាំងស្នាក់ការ៤០១ និងប៉ូលិសរដ្ឋបាលឃុំតានៃ បានសហការសំរួលចរាចរណ៍ និងបានប្រគល់អោយទៅអោយប៉ូលិសប៉ុស្តិ៍ធ្វើការបន្ត ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ